Fiainana Mifanaraka Amin’ny Fanoloran-tena Kristiana ao Anatin’ny Fahafahana
“Izay itoeran’ny Fanahin’[i Jehovah, NW ] no itoeran’ny fahafahana.” — 2 KORINTIANA 3:17.
1. Nanolo-tena ho an’iza moa ny Vavolombelon’i Jehovah, ary nahoana izy ireo no mampiasa fikambanana ara-dalàna?
MINO ny Vavolombelon’i Jehovah fa haharitra mandrakizay ny fivavahan’izy ireo. Noho izany, dia efa miandrandra ny hanompo an’Andriamanitra mandrakizay doria “amin’ny fanahy sy ny fahamarinana”, izy ireo. (Jaona 4:23, 24). Noho izy ireo afaka manao izay tiany hatao, ireo Kristiana ireo dia nanolo-tena tsy nisy fepetra ho an’i Jehovah Andriamanitra, ary tapa-kevitra ny hiaina mifanaraka amin’izany. Miantehitra amin’ny Tenin’Andriamanitra sy ny fanahiny masina izy ireo mba hanaovana izany. Amin’ny fo manontolo sy ao anatin’ny fahafahana nomen’Andriamanitra azy no anohizan’ny Vavolombelona miaina mifanaraka amin’ny fanoloran-tenany kristiana. Etsy an-danin’izany anefa, dia omeny ny fanajana tandrify azy ny anjara asan’ireo “fahefana lehibe” eo amin’ny fitondrana, ary ampiasainy araka ny tokony ho izy ireo fitaovana sy fandaharana araka ny lalàna. (Romana 13:1; Jakoba 1:25). Mampiasa ny Fikambanana Watch Tower ho fitaovana ara-dalàna, ohatra, ny Vavolombelona, mba hoenti-manantanteraka ny asa fanampiana ataony amin’ny mpiara-belona aminy, indrindra fa eo amin’ny lafiny ara-panahy. Iray amin’ireo fitaovana maro ampiasainy any amin’ny tany samihafa izy io. Nanolo-tena ho an’Andriamanitra fa tsy ho an’ny fikambanana ara-dalàna na inona na inona anefa ny Vavolombelona, ary haharitra mandrakizay ny fanoloran-tenany ho an’i Jehovah.
2. Nahoana no ankasitrahan’ny Vavolombelon’i Jehovah fatratra ny Fikambanana Watch Tower sy ireo fikambanana ara-dalàna mitovy aminy?
2 Noho izy ireo mpanompon’Andriamanitra vita fanoloran-tena, ny Vavolombelon’i Jehovah dia tsy maintsy manaraka ny toromarik’i Jesosy ‘hanao mpianatra ny firenena rehetra, hanao batisa azy amin’ny anaran’ny Ray sy ny Zanaka ary ny Fanahy Masina sady hampianatra azy’. (Matio 28:19, 20). Hitohy mandra-pahatongan’ny faran’ny fandehan-javatra io asa io, satria hoy koa i Jesosy: “Hotorina amin’ny tany onenana manontolo itỳ vaovao tsaran’ilay fanjakana itỳ, ho vavolombelona amin’ny firenena rehetra; ary avy eo dia ho tonga ny farany.” (Matio 24:3, 14, NW ). Isan-taona, ireo trano fanaovam-pirintin’ny Fikambanana Watch Tower sy ireo fikambanana ara-dalàna mitovy aminy dia mamatsy Baiboly sy boky sy bokikely ary gazety an-tapitrisany maro ho an’ny Vavolombelon’i Jehovah, mba hampiasaina amin’ny asa fitoriana ataon’izy ireo maneran-tany. Noho izany, dia tsy hay tombanana ny hasarobidin’ireny fitaovana ara-dalàna manana ny maha-izy azy ireny, eo amin’ny fanampiana ireo mpanompon’Andriamanitra vita fanoloran-tena, mba hiaina mifanaraka amin’ny fanoloran-tenany ho azy.
3. Tamin’ny heviny ahoana taloha no nampiasan’ny Vavolombelon’i Jehovah ilay teny hoe “ny Fikambanana”?
3 Mety hilaza ny sasany fa ny fomba iresahan’ny Vavolombelon’i Jehovah ny amin’ny Fikambanana Watch Tower — na “ny Fikambanana” fotsiny, matetika kokoa — dia mampiseho fa mihoatra noho ny fitaovana ara-dalàna fotsiny no iheveran’izy ireo azy io. Angaha moa izy ireo tsy mihevitra azy io ho ny fahefana farany tokony hekena eo amin’ireo zavatra mahakasika ny fanompoam-pivavahana? Manazava io hevitra io ilay boky hoe Les Témoins de Jéhovah: Prédicateurs du Royaume de Dieu, amin’ny filazana hoe: “Rehefa nilaza hoe ‘ny Fikambanana’ Ny Tilikambo Fiambenana [1 Jona 1938], dia tsy te hilaza fitaovana ara-dalàna fotsiny izy, fa ilay fitambarana Kristiana voahosotra izay namorona sy nampiasa io fitaovana ara-dalàna io kosa.”a Noho izany, io fitenenana io dia nanondro ny “mpanompo mahatoky sy malina”. (Matio 24:45, NW ). Amin’io heviny io mazàna no nampiasan’ny Vavolombelona ilay fitenenana hoe “ny Fikambanana”. Mazava ho azy fa teny tsy azo ampifamadihana ny fikambanana ara-dalàna sy ny “mpanompo mahatoky sy malina”. Fidina amin’ny alalan’ny latsa-bato ireo mpitantana ao amin’ny Fikambanana Watch Tower, fa voahosotry ny fanahin’i Jehovah kosa ireo Vavolombelona anisan’ny “mpanompo mahatoky”.
4. a) Milaza zavatra amin’ny fomba ahoana ny Vavolombelona maro mba hialana amin’ny tsy fahazoan-kevitra? b) Nahoana isika no tokony hahay handanjalanja raha ny amin’ny voambolana manokana?
4 Mba hialana amin’ny tsy fahazoan-kevitra, dia miezaka ny Vavolombelon’i Jehovah mba hitandrina ny fomba ilazany zavatra. Vavolombelon’i Jehovah maro no tsy milaza hoe “izao no ampianarin’ny Fikambanana”, fa mampiasa kosa ny fitenenana toy ny hoe “izao no lazain’ny Baiboly”, na hoe “araka ny fahazoako azy, dia izao no ampianarin’ny Baiboly”. Amin’izany fomba izany no anantitranterany fa nanao fanapahan-kevitra manokana ny Vavolombelona tsirairay rehefa nanaiky ny fampianaran’ny Baiboly. Amin’izany fomba izany koa no tsy anomezan’izy ireo hevi-diso ao an-tsain’ny olona, dia ny hoe voafatotr’ireo didin’ny sekta ara-pivavahana, ny Vavolombelona. Mazava ho azy fa tsy tokony hahatonga fifandirana mihitsy ireo teny aroso mahakasika voambolana manokana. Rehefa misoroka tsy fahazoan-kevitra ihany mantsy ny voambolana manokana vao zava-dehibe. Ilaina ny fahaiza-mandanjalanja kristiana. Mananatra antsika ny Baiboly “mba tsy hiady teny”. (2 Timoty 2:14, 15). Milaza izao foto-pitsipika izao koa ny Soratra Masina: “Raha tsy mazava ny teny aloaky ny vavanareo, hatao ahoana no fahafantatra izay lazainareo?” — 1 Korintiana 14:9.
Mampihena ny ilana fitsipika ny fanahin’Andriamanitra
5. Ahoana no tokony handraisana ny hevitry ny 1 Korintiana 10:23?
5 “Ny zavatra rehetra azo atao, nefa tsy ny zavatra rehetra no mahasoa”, hoy ny nomarihin’ny apostoly Paoly. Nanampy teny toy izao izy: “Ny zavatra rehetra azo atao, nefa tsy ny zavatra rehetra no mampandroso.” (1 Korintiana 10:23). Miharihary fa tsy te hilaza akory i Paoly hoe azo atao ireo zavatra melohin’ny Tenin’Andriamanitra mazava tsara. Somary vitsy ihany ireo didy voafaritra tsara mifehy ny fiainana kristiana, raha ampitahaina amin’ireo lalàna 600 eo ho eo, nomena ny Isiraely. Araka izany, dia raharaha maro no apetraka amin’ny feon’ny fieritreretan’ny tsirairay. Ny olona iray nanolo-tena ho an’i Jehovah dia manana ilay fahafahana vokatry ny fitarihan’ny fanahin’Andriamanitra. Koa satria nandray manokana ny fahamarinana ny Kristiana iray, dia manaraka ny feon’ny fieritreretany voataizan’ny Baiboly izy, ary miantehitra amin’ny fitarihan’Andriamanitra amin’ny alalan’ny fanahy masina. Izany dia manampy ny Kristiana vita fanoloran-tena hamaritra izay “mahasoa” sy izay “mampandroso” ho an’ny tenany sy ny hafa. Takany fa hisy akony eo amin’ny fifandraisany manokana amin’Andriamanitra izay nanolorany tena, ny fanapahan-kevitra ataony.
6. Any amin’ireo fivoriana kristiana, ahoana no ahafahantsika mampiseho fa nandray manokana ny fahamarinana ny tenantsika?
6 Asehon’ny Vavolombelona iray fa nandray manokana ny fahamarinana ny tenany, rehefa manome valin-teny any amin’ireo fivoriana kristiana izy. Amin’ny voalohany dia mety hamaky izay voalaza ao amin’ilay zavatra vita an-tsoratra ianarana izy. Rehefa mandeha anefa ny fotoana, dia handroso izy ka ho tonga hatramin’ny filazana amin’ny fiteniny manokana ireo fampianarana ao amin’ny Baiboly. Porofoiny amin’izany fa mampitombo ny fahaizany mieritreritra izy, fa tsy mamerina fotsiny izay nolazain’ny hafa. Ny famoahany hevitra amin’ny fiteniny manokana sy ny fanambarany amim-pahatsorana sy araka ny marina ireo tenin’ny fahamarinana, dia hitondra fahafinaretana ho azy sy hampiseho fa miaiky tsara izy ao an-tsainy ao. — Mpitoriteny 12:10; ampitahao amin’ny Romana 14:5b.
7. Nanaiky an-tsitrapo ny hanao fanapahan-kevitra inona avy ny mpanompon’i Jehovah?
7 Atosiky ny fitiavana an’Andriamanitra sy ny mpiara-belona aminy, ny Vavolombelon’i Jehovah. (Matio 22:36-40). Marina fa tafaray ao anatin’ny fikambanan’ny mpirahalahy maneran-tany izy ireo, noho ilay fehim-pitiavana toy ny an’i Kristy. (Kolosiana 3:14; 1 Petera 5:9). Kanefa, satria olona afaka manao izay tiany hatao ny tsirairay amin’izy ireo, dia nanapa-kevitra manokana izy ny hanambara ny vaovao tsaran’ny Fanjakan’Andriamanitra sy hitoetra tsy homba ny atsy na ny aroa eo amin’ny politika, hifady ra sy hanalavitra karazam-pialam-boly sasany ary hiaina mifanaraka amin’ny fari-pitsipiky ny Baiboly. Tsy fanapahan-kevitra nanerena azy ireo akory izany. Ireo dia fanapahan-kevitra izay tafiditra ao anatin’ny fomba fiaina iray. Mifidy an-tsitrapo izany fomba fiaina izany ireo olona mety ho tonga Vavolombelona, alohan’ny hanaovany ilay dingana ho amin’ny fanoloran-tena kristiana.
Ampamoahina eo anatrehan’ny Fitambara-mpitantana ve?
8. Fanontaniana inona no ilaina hatao mazava?
8 Asehon’ny Baiboly mazava tsara fa tsy terena hanompo an’Andriamanitra ny Kristiana marina. Hoy izy: “[I Jehovah, NW ] izany Fanahy izany; ary izay itoeran’ny Fanahin’[i Jehovah, NW ] no itoeran’ny fahafahana.” (2 Korintiana 3:17). Ahoana anefa no ifanarahan’io filazana io amin’ny hoe “mpanompo mahatoky sy malina” miaraka amin’ny Fitambara-mpitantana eo aminy? — Matio 24:45-47, NW.
9, 10. a) Ahoana no iharan’ny foto-pitsipika momba ny fahefan’izay lohany, ao amin’ny kongregasiona kristiana? b) Nitaky inona ny fanarahana ilay foto-pitsipika momba ny fahefan’izay lohany, tao amin’ny kongregasiona kristiana tamin’ny taonjato voalohany?
9 Mba hamaliana io fanontaniana io, dia tsy maintsy tadidintsika ilay foto-pitsipiky ny Soratra Masina momba ny fahefan’izay lohany. (1 Korintiana 11:3). Ao amin’ny Efesiana 5:21-24, dia ampahafantarina ho “Lohan’ny fiangonana” i Kristy, ilay tokony ‘heken’ny fiangonana’. Takatry ny Vavolombelon’i Jehovah fa ny mpanompo mahatoky sy malina dia voaforon’ireo rahalahin’i Jesosy ara-panahy. (Hebreo 2:10-13). Notendrena hanome ‘sakafo ara-panahy amin’ny fotoana mety’ ho an’ny vahoakan’Andriamanitra, io kilasin’ny mpanompo mahatoky io. Amin’izao fotoan’ny farany izao, dia notendren’i Kristy “hanapaka ny fananany rehetra” io mpanompo io. Noho izany, dia mendrika ny hohajain’izay milaza tena ho Kristiana, ny toerana tanan’izy io.
10 Ny zava-kendrena amin’ny fahefan’izay lohany dia mba hitsimbinana ny firaisan-tsaina sy mba hiantohana fa ‘atao amin’ny fahamendrehana sy ny filaminana ny zavatra rehetra’. (1 Korintiana 14:40). Mba hahavitana izany tamin’ny taonjato voalohany, dia nofidina hisolo tena an’ilay antokon’olona manontolo ny Kristiana voahosotra maromaro izay avy amin’ilay kilasin’ny mpanompo mahatoky sy malina. Araka ny noporofoin’ireo zava-nitranga nanaraka izany, dia nankasitrahan’i Jehovah sy notahiny ny fiandraiketan’io fitambara-mpitantana tamin’ny taonjato voalohany io. Nanaiky tamin-kafaliana io fandaharana io ireo Kristiana tamin’ny taonjato voalohany. Eny, tena nandray tamim-pahafinaretana sy velom-pankasitrahana tamin’ny vokatra tsara dia tsara naterak’izany, izy ireo. — Asan’ny Apostoly 15:1-32.
11. Ahoana no tokony hiheverana ny Fitambara-mpitantana amin’izao andro izao?
11 Mbola misy vidiny ihany izany fandaharana izany. Amin’izao fotoana izao, ny Fitambara-mpitantan’ny Vavolombelon’i Jehovah dia voaforon’ny Kristiana voahosotra folo, izay efa nandia fanandraman-javatra kristiana am-polony taona maro avy. Manome fitarihan-dalana ara-panahy ho an’ny Vavolombelon’i Jehovah izy ireo, toy ny nataon’ny fitambara-mpitantana tamin’ny taonjato voalohany. (Asan’ny Apostoly 16:4). Sahala amin’ireo Kristiana tany am-boalohany, ny Vavolombelona dia mitodika amim-pifaliana any amin’ireo rahalahy matotra anisan’ny Fitambara-mpitantana mba hahazoana toromarika sy tari-dalana miorina amin’ny Baiboly eo amin’ireo zavatra mahakasika ny fanompoam-pivavahana. Na dia mpanompon’i Jehovah sy i Kristy toy ireo Kristiana namany aza ireo anisan’ny Fitambara-mpitantana, dia mandidy antsika toy izao ny Baiboly: “Manekè ny mpitondra anareo, ka manoava azy; fa izy miambina ny fanahinareo araka izay tokony hataon’ny olona mbola hampamoahina, mba hanaovany izany amin’ny fifaliana, fa tsy amin’ny fisentoana; fa tsy hahasoa anareo izany.” — Hebreo 13:17.
12. Eo anatrehan’iza ny Kristiana tsirairay no tsy maintsy ampamoahina?
12 Moa ve ny toeram-piandraiketana omen’ny Soratra Masina ny Fitambara-mpitantana midika fa tsy maintsy ampamoahina eo anatrehan’izy io momba ny asany avy, ny Vavolombelon’i Jehovah tsirairay? Tsia, raha araka ny tenin’i Paoly ho an’ireo Kristiana tany Roma manao hoe: “Nahoana hianao no mitsara ny rahalahinao? Ary nahoana kosa hianao no manao tsinontsinona ny rahalahinao? Fa samy hiseho eo anoloan’ny fitsaran’Andriamanitra isika rehetra. (...) Samy hampamoahin’Andriamanitra ny amin’ny tenany avy isika rehetra.” — Romana 14:10-12.
13. Nahoana ny Vavolombelon’i Jehovah no manao tatitra ny amin’ny asa fitoriana nataony?
13 Tsy marina ve anefa fa antenaina ny hanaovan’ny Vavolombelona tsirairay tatitra ny amin’ny asa fitoriana nataony? Eny, kanefa ny zava-kendren’izany dia voazava tsara ao amin’ny boky fianaran’ny Vavolombelona izay milaza toy izao: “Ireo mpanaraka voalohany an’i Jesosy Kristy dia nampiseho fahalianana tamin’ireo filazana momba ny fandrosoan’ny asa fitoriana. (Marka 6:30). Rehefa niroborobo ilay asa dia nangonina ny filazana isa niaraka tamin’ny fitantarana fanandraman-javatra niavaka hitan’ireo nandray anjara tamin’ny fitoriana ny vaovao tsara. (...) (Asa. 2:5-11, 41, 47; 6:7; 1:15; 4:4). (...) Endrey ny fampaherezana azon’ireny mpiasa kristiana nahatoky ireny noho ny fandrenesana filazana ny amin’izay notanterahina! (...) Toy izany koa, ny fandaminan’i Jehovah amin’ny andro ankehitriny dia miezaka mba hihazona tarehi-marika voafaritra marina tsara ny amin’ny asa atao ho fanatanterahana ny Matio 24:14”.
14, 15. a) Ahoana no iharan’ny 2 Korintiana 1:24 amin’ny Fitambara-mpitantana? b) Miorina amin’inona no tsy maintsy anaovan’ny Kristiana tsirairay fanapahan-kevitra manokana, ary noho ny fahatakarana zava-misy inona?
14 Sady fandaharana mampiseho fitiavana no oha-pinoana mendri-kotahafina ny Fitambara-mpitantana. (Filipiana 3:17; Hebreo 13:7). Noho ny fifikirany sy ny fanarahany an’i Kristy ho modely, dia azon’izy ireny averina ny tenin’i Paoly manao hoe: “Tsy mihambo ho tompon’ny finoanareo izahay, fa mpiara-miasa hampandroso ny fifalianareo, satria finoana no itoeranareo.” (2 Korintiana 1:24). Amin’ny fandinihana fironana misy, ny Fitambara-mpitantana dia manintona ny saina ho amin’ny soa entin’ny fanarahana ny torohevitry ny Baiboly sy manolotra soso-kevitra momba ny fampiharana ireo lalàna sy foto-pitsipika ao amin’ny Baiboly, mampitandrina ny amin’ireo loza miafina, ary manome fampaherezana ilain’ireo “mpiara-miasa” aminy. Amin’izany no anatontosan’izy io ny asa fitandremam-pananana kristiana nankinina taminy sy anampiany azy ireo hihazona ny fifaliany ary ampaherezany azy ireo ao amin’ny finoana, mba hahafahany hamahatra tsara. — 1 Korintiana 4:1, 2; Titosy 1:7-9.
15 Raha manao fanapahan-kevitra mifototra amin’ny torohevitry ny Baiboly aroson’ny Fitambara-mpitantana ny Vavolombelona iray, dia manao izany noho ny safidiny manokana izy, satria nampiaiky azy ny fianarany manokana ny Baiboly fa izany no lalana tokony harahina. Taomin’ny Tenin’Andriamanitra ny Vavolombelona tsirairay mba hampihatra ny torohevitra tsara araka ny Soratra Masina aroson’ny Fitambara-mpitantana, noho ny fahatakarana mazava tsara fa ny fanapahan-kevitra ataony dia hisy akony eo amin’ny fifandraisany manokana amin’Andriamanitra izay nanolorany ny tenany. — 1 Tesaloniana 2:13.
Mpianatra sy miaramila
16. Na dia raharahan’ny tena manokana aza ny fanapahan-kevitra momba ny fitondran-tena, nahoana no voaroaka ny olona sasany?
16 Raha raharahan’ny tena manokana anefa ny fanapahan-kevitra momba ny fitondran-tena, nahoana no roahina ny Vavolombelon’i Jehovah sasany? Tsy misy olona mamaritra araka izay tiany fotsiny hoe ny fanaovana ota toy izao dia mitaky fandroahana. Tsy takin’ny Soratra Masina kosa io fanaovan-javatra io, raha tsy hoe tsy mibebaka angaha ny mpikambana iray ao amin’ny kongregasiona manao fahotana lehibe, toy ireo voatanisa ao amin’ny toko fahadimy amin’ny Korintiana Voalohany. Araka izany, dia mety ho voaroaka noho ny fijangajangana ny Kristiana iray. Na dia izany aza, matoa izany nitranga, dia satria tsy nety nanaiky ilay fanampiana ara-panahy nomen’ireo mpiandry be fitiavana ilay olona. Tsy ny Vavolombelon’i Jehovah irery akory no mampiasa io fanao kristiana io. Izao no marihin’ny The Encyclopedia of Religion: “Rehefa mety ho fiaraha-monina dia mitaky ny zo hiaro tena amin’ireo mpikambana tsy tan-dalàna izay mety handrahona ny soa iombonana. Eo amin’ny lafiny ara-pivavahana, dia matetika io zo io no nohamafisin’ilay finoana hoe misy fiantraikany eo amin’ny toerana tanan’ny tena eo anatrehan’Andriamanitra, ilay sazy [fandroahana].”
17, 18. Ahoana no azo anazavana ny maha-mety ny fandroahana, a) raha ny sekoly no ohatra raisina? b) raha ny fandaminana ara-tafika no ohatra raisina?
17 Mpianatra ny Baiboly ny Vavolombelon’i Jehovah. (Josoa 1:8; Salamo 1:2; Asan’ny Apostoly 17:11). Ny fandaharam-pianarana ny Baiboly omen’ny Fitambara-mpitantana dia azo ampitahaina amin’ny fandaharam-pianaran-tsekoly izay faritan’ny filan-kevitry ny fampianarana. Na dia tsy ilay filan-kevitra aza no loharano iavian’ireo zavatra ampianarina, dia izy io no manorina ny fandaharam-pianarana, izy no mamaritra ny fomba fampianarana sy mamoaka ireo toromarika tena ilaina. Raha misy mandà an-karihary tsy hiaina mifanaraka amin’ireo zavatra takin’ilay sekoly, ka mahatonga zava-manahirana ho an’ireo mpiara-mianatra aminy, na manala baraka ilay sekoly, dia azo roahina izy. Manana zo hanao zavatra ho tombontsoan’ireo mpianatra amin’ny fitambarany, ireo manam-pahefana ao an-tsekoly.
18 Ankoatra ny maha-mpianatra ny Vavolombelon’i Jehovah, dia miaramilan’i Jesosy Kristy koa izy ireo, nampianarina mba ‘hiady ny ady tsaran’ny finoana’. (1 Timoty 6:12; 2 Timoty 2:3). Mazava ho azy fa mety hahatonga tsy fankasitrahan’Andriamanitra ny fikirizana amin’ny fitondran-tena tsy mendrika ny miaramila kristiana. Noho izy olona manana fahalalahana hanao safidy, dia afaka manapa-kevitra araka izay tiany ny miaramila kristiana iray, saingy tsy maintsy mizaka ny vokatry ny fanapahan-keviny izy. Nanjohy hevitra toy izao i Paoly: “Ny miaramila manafika dia tsy mba misy maningo-tena amin’ny raharahan’izao fiainana izao, mba hahafaly izay efa nifidy azy ho miaramila — Ary raha misy manezaka amin’ny filalaovana, dia tsy satrohana satroboninahitra izy, raha tsy manezaka araka ny lalàna.” (2 Timoty 2:4, 5). Ireo Kristiana matotra, anisan’izany ireo ao amin’ny Fitambara-mpitantana, dia manaiky tanteraka hatrany ny hampiasain’i Jesosy Kristy, ilay Mpitarika azy, ka mitandrina “ny lalàna” mba hahafahan’izy ireo hahazo ilay loka, dia ny fiainana mandrakizay. — Jaona 17:3; Apokalypsy 2:10.
19. Afaka mahazo antoka ny amin’inona isika rehefa avy nandinika ireo zava-misy momba ny fanoloran-tena kristiana?
19 Tsy mazava tsara avy amin’ireo zava-misy ve fa mpanompon’Andriamanitra ny Vavolombelon’i Jehovah, fa tsy mpanompon’olona? Kristiana vita fanoloran-tena izay manana ilay fahafahana nanafahan’i Kristy azy, izy ireo. Noho izany, dia avelany hanapaka ny fiainany ny fanahin’Andriamanitra sy ny Teniny, eo am-panompoana amim-piraisan-tsaina miaraka amin’ireo rahalahiny ao amin’ny kongregasionan’Andriamanitra. (Salamo 133:1). Ny fihariharian’izany dia tokony hanaisotra koa izay mety ho fisalasalana ny amin’ny loharanon’ny tanjak’izy ireo. Afaka miara-mihira amin’ny mpanao salamo toy izao izy ireo: “Jehovah no heriko sy ampingako; Izy no nitokian’ny foko, ka voavonjy aho; dia mifaly ny foko, ka ny hirako no hiderako Azy.” — Salamo 28:7.
[Fanamarihana ambany pejy]
a Navoakan’ny Watch Tower Bible and Tract Society of Pennsylvania, tamin’ny 1993.
Ahoana no Havalinao?
◻ Amin’ny fomba ahoana no manampy ny Vavolombelon’i Jehovah ny Fikambanana Watch Tower sy ireo fikambanana ara-dalàna mitovy aminy?
◻ Ahoana no andraisan’ny Kristiana soa avy amin’ny anjara asan’ny Fitambara-mpitantan’ny Vavolombelon’i Jehovah?
◻ Nahoana ny vahoakan’i Jehovah no manao tatitra ny amin’ny asa fitoriana nataony?
◻ Ao anatin’ny toe-javatra manao ahoana no mety ny fandroahana Kristiana iray vita fanoloran-tena?
[Sary, pejy 19]
Niaro ny maha-iray ny foto-pampianarana, ny fitambara-mpitantana tamin’ny taonjato voalohany
[Sary, pejy 23]
Maneran-tany, ny Vavolombelon’i Jehovah dia mankafy ilay fahafahana izay nanafahan’i Kristy azy ireo