Manatanteraka Izay Nampanantenainy ny Olona Mahatoky i Jehovah
“Mahatoky Ilay [nampanantena, NW ]”. — HEBREO 10:23.
1, 2. Nahoana isika no afaka matoky tanteraka ny fampanantenan’i Jehovah?
I JEHOVAH dia mitaky amin’ny mpanompony mba hampitombo sy hihazona finoana matanjaka Azy sy ireo fampanantenany. Noho izany finoana izany, dia afaka matoky tanteraka an’i Jehovah ny olona iray fa hanefa izay nampanantenainy hatao izy. Manambara toy izao ny Teniny ara-tsindrimandry: “Jehovah, Tompon’ny maro, efa nianiana hoe: Araka izay noheveriko no hatao aminy, ary araka izay nokasaiko no hotovina aminy”. — Isaia 14:24.
2 Ilay teny hoe “Jehovah, Tompon’ny maro, efa nianiana”, dia mampiseho fa mianiana amin’ny fomba hentitra ny hanatanteraka ny fampanantenany izy. Izany no antony ahafahan’ny Teniny milaza hoe: “Matokia an’i Jehovah amin’ny fonao rehetra, fa aza miankina amin’ny fahalalanao; maneke Azy amin’ny alehanao rehetra, fa Izy handamina ny làlanao.” (Ohabolana 3:5, 6). Rehefa matoky an’i Jehovah isika ka mamela ny tenantsika hotarihin’ny fahendreny, dia azo antoka fa hitarika ho amin’ny fiainana mandrakizay ny lalantsika, satria “hazon’aina ho an’izay rehetra mifikitra aminy” ny fahendren’Andriamanitra. — Ohabolana 3:18; Jaona 17:3.
Ny tena finoana tamin’ny andro fahiny
3. Ahoana no nampisehoan’i Noa finoana an’i Jehovah?
3 Ny fitantarana momba ireo zava-bitan’i Jehovah tamin’ireo olona nanana ny tena finoana dia manamarina fa azo iankinana izy. Maherin’ny 4 400 taona lasa izay, ohatra, dia nilaza tamin’i Noa Andriamanitra fa ho ravan’ny Safo-drano iray haneran-tany ilay tontolo tamin’ny androny. Nandidy an’i Noa hanamboatra sambo fiara goavana iray izy, mba hitsimbinana ny ain’ny olona sy ny biby. Inona no nataon’i Noa? Izao no lazain’ny Hebreo 11:7 amintsika: “Finoana no nanamboaran’i Noa sambo-fiara hamonjena ny ankohonany, fa natahotra izy, rehefa notoroan’Andriamanitra hevitra ny amin’ny zavatra tsy mbola hita”. Nahoana i Noa no nino zavatra mbola tsy nitranga mihitsy teo aloha, izany hoe, zavatra “tsy mbola hita”? Satria fantany tsara ny fomba nifampiraharahan’Andriamanitra tamin’ny fianakavian’olombelona tany aloha. Takany, noho izany, fa tanteraka avokoa izay lazain’Andriamanitra, na inona izany na inona. Natoky àry i Noa fa hitranga koa ny Safo-drano. — Genesisy 6:9-22.
4, 5. Nahoana i Abrahama no natoky tanteraka an’i Jehovah?
4 Ohatra hafa iray ny amin’ny olona nanana ny tena finoana i Abrahama. Efa ho 3 900 taona lasa izay, dia nasain’Andriamanitra nanao sorona an’i Isaka, zanany lahy tokana tamin’i Saraha vadiny, i Abrahama. (Genesisy 22:1-10). Nanao ahoana ny fihetsik’i Abrahama? Hoy ny Hebreo 11:17: “Finoana no nanateran’i Abrahama an’Isaka, raha nizahan-toetra izy”. Tamin’ny fotoana farany anefa, dia nosakanan’ny anjelin’i Jehovah i Abrahama. (Genesisy 22:11, 12). Nahoana anefa i Abrahama no nieritreritra ny hanao zavatra toy izany? Satria “nihevitra izy fa Andriamanitra dia mahay manangana ny maty [Isaka] aza”, araka ny Hebreo 11:19. Ahoana anefa no ninoan’i Abrahama fitsanganana amin’ny maty, kanefa mbola tsy nahita an’izany izy, no sady mbola tsy nisy fitantarana momba izany akory tany alohany?
5 Tadidio fa 89 taona i Saraha fony nampanantena azy ireo zanakalahy Andriamanitra. Efa dila ny fahafaha-miteraka ny kibon’i Sahara — maty, raha izay no ilazana azy. (Genesisy 18:9-14). Novelomin’Andriamanitra indray ny kibon’i Saraha, ka niteraka an’i Isaka izy. (Genesisy 21:1-3). Fantatr’i Abrahama fa raha nahavelona indray ny kibon’i Saraha efa maty Andriamanitra, dia ho azony atao koa ny hamelona indray an’i Isaka, raha ilaina izany. Izao no lazain’ny Romana 4:20, 21 momba an’i Abrahama: “Tsy niahanahana ny amin’ny teny fikasan’Andriamanitra tamin’ny tsi-finoana izy, fa nampaherezin’ny finoana ka nanome voninahitra an’Andriamanitra ary natoky indrindra fa izay nolazainy dia hainy hatao koa.”
6. Ahoana no nampisehoan’i Josoa fatokiana an’i Jehovah?
6 Maherin’ny 3 400 taona lasa izay, rehefa 100 taona mahery i Josoa ary efa nahita nandritra ny androm-piainany fa mendri-pitokiana Andriamanitra, dia izao no antony nambarany fa nahatonga azy hanana fatokiana: “Fantatrareo ao amin’ny fonareo rehetra sy ny fanahinareo rehetra fa tsy misy latsaka na dia zavatra iray akory aza ny zava-tsoa rehetra izay nilazan’i Jehovah Andriamanitrareo anareo; efa tanteraka taminareo avokoa izy rehetra: tsy nisy latsaka izy na dia zavatra iray akory aza.” — Josoa 23:14.
7, 8. Inona no nataon’ny Kristiana tamin’ny taonjato voalohany mba hamonjena ny ainy, ary nahoana?
7 Tokony ho 1 900 taona lasa izay, dia olona nanetry tena maro no nampiseho tena finoana. Takatr’izy ireo avy tamin’ny fahatanterahan’ny faminanian’ny Baiboly fa i Jesosy no Mesia, ka nanaiky ny fampianarany izy. Nino izay nampianarin’i Jesosy izy ireo satria nanana fototra mafy orina, niainga avy tamin’ny zava-nisy sy ny Soratra Hebreo. Noho izany, rehefa nilaza i Jesosy fa hiharan’ny didim-pitsaran’Andriamanitra i Jodia sy i Jerosalema noho ny tsy fahatokiany, dia nino azy izy ireo. Ary rehefa nolazain’i Jesosy tamin’izy ireo izay zavatra tsy maintsy hataony mba hamonjena ny ainy, dia nanao izany izy ireo.
8 Nilaza tamin’ireo mpino i Jesosy fa tokony handositra izy ireo rehefa hohodidinin’ny miaramila i Jerosalema. Tena tonga nanafika an’i Jerosalema tokoa ny miaramila romana tamin’ny taona 66 am.f.i. Avy eo anefa dia niala noho ny antony tsy fantatra ny Romana. Izany dia famantarana ho an’ny Kristiana fa tokony handao ilay tanàna izy, araka ny tenin’i Jesosy manao hoe: “Raha mahita an’i Jerosalema voahodidin’ny miaramila hianareo, dia aoka ho fantatrareo fa efa mby akaiky ny fandravana azy. Ary izay any Jodia amin’izany andro izany aoka handositra ho any an-tendrombohitra; ary izay ao Jerosalema aoka handositra ho any ivelany; ary izay any an-tsaha aoka tsy hiditra ao an-tanàna intsony.” (Lioka 21:20, 21). Nandao an’i Jerosalema sy ny faritra manodidina azy ny olona nanana ny tena finoana, ka nandositra tany amin’ny toerana azo antoka.
Ireo vokatry ny tsy fananam-pinoana
9, 10. a) Ahoana no nampisehoan’ireo mpitondra fivavahana fa tsy nanam-pinoana an’i Jesosy izy ireo? b) Inona avy ireo vokatr’izany tsy fananam-pinoana izany?
9 Inona no nataon’ireo olona tsy nanana ny tena finoana? Tsy nandositra izy ireo tamin’ny fotoana azo nohararaotina hanaovana izany. Nihevitra mantsy izy ireo fa afaka namonjy azy ny mpitarika azy. Samy nahita ny porofon’ny maha-Mesia an’i Jesosy anefa ireny mpitarika ireny sy ireo olona nomba azy. Nahoana àry izy ireo no tsy nanaiky izay nolazain’i Jesosy? Satria nanana toe-po ratsy izy ireo. Taloha kokoa dia efa nihanjahanja izany rehefa nahita ny ankamaroan’ny sarambabem-bahoaka nirohotra nankany amin’i Jesosy izy ireo, taorian’ny nananganana an’i Lazarosy tamin’ny maty. Toy izao no itantaran’ny Jaona 11:47, 48 izany: “Ny lohan’ny mpisorona sy ny Fariseo nanangona ny Synedriona [ny fitsarana ambony teo amin’ny Jiosy] ka nanao hoe: Ahoana no hataontsika? fa iny Lehilahy iny [Jesosy] dia manao famantarana maro. Raha avelantsika hanao toy izany ihany Izy, dia hino Azy avokoa ny olona rehetra; ary ho avy ny Romana ka handrava ny fonenantsika sy ny firenentsika.” Izao no lazain’ny andininy faha-53: “Koa hatramin’izany andro izany dia nihendry hahafaty Azy ireo.”
10 Fahagagana mahatalanjona tokoa no nataon’i Jesosy — nanangana an’i Lazarosy tamin’ny maty! Naniry hamono an’i Jesosy anefa ireo mpitondra fivavahana noho ny nanaovany izany. Vao mainka nihanjahanja ny halehiben’ny haratsiam-panahin’izy ireo, rehefa “nihendry hahafaty an’i Lazarosy koa ny lohan’ny mpisorona, satria izy no nialan’ny maro tamin’ny Jiosy ka ninoany an’i Jesosy”. (Jaona 12:10, 11). Vao natsangana tamin’ny maty i Lazarosy, kanefa dia nirin’ireo mpisorona ireo ny hahita azy ho faty indray! Tsy niraharaha ny sitrapon’Andriamanitra sy izay hahasoa ny olona izy ireo, fa tia tena ka ny toerana notanany sy ny tombontsoany ihany no tao an-dohany. “Tia ny voninahitra avy amin’ny olona izy ireo, fa tsy ny voninahitra avy amin’Andriamanitra.” (Jaona 12:43). Novidiny lafo anefa ny tsy fananany finoana. Tamin’ny taona 70 am.f.i., dia niverina ny tafika romana ka nandrava ny fonenan’izy ireo sy ny fireneny, eny, nandringana ny ankamaroan’izy ireo koa aza.
Fanehoana finoana amin’izao androntsika izao
11. Ahoana no nisehoan’ny tena finoana tany am-piandohan’itỳ taonjato itỳ?
11 Tamin’itỳ taonjato itỳ, dia nisy lehilahy sy vehivavy maro koa nanana ny tena finoana. Tany am-piandohan’ireo taona 1900, ohatra, dia niandrandra hoavy feno fiadanana sy fanambinana ny ankamaroan’ny olona. Tamin’izay fotoana izay ihany anefa, ireo nanam-pinoana an’i Jehovah dia nanambara fa efa nadiva hiditra tamin’ny fotoam-pikorontanana ratsy indrindra hitany hatramin’izay ny olombelona. Izany no nambara mialoha ao amin’ny Tenin’Andriamanitra, ao amin’ny Matio toko faha-24, 2 Timoty toko faha-3, ary any an-toeran-kafa. Tena nitranga tokoa izay nolazain’ireo olona nanam-pinoana ireo, nanomboka tamin’ny 1914, rehefa nipoaka ny Ady Lehibe Voalohany. Niditra marina tokoa tao amin’ilay “andro farany” nambara mialoha izao tontolo izao, ka nahita ‘andro sarotra tsy mora setraina’. (2 Timoty 3:1, NW ). Nahoana ny mpanompon’i Jehovah no nahalala ny marina momba izay ho toe-piainana teo amin’izao tontolo izao tamin’izany fotoana izany, kanefa ny hafa tsy mba toy izany? Satria, sahala amin’i Josoa, dia nino izy ireo fa tsy hisy ho latsaka na dia iray akory aza ny tenin’i Jehovah.
12. Matoky tanteraka ny fampanantenan’i Jehovah inona ny mpanompony, amin’izao andro izao?
12 Amin’izao andro izao, ny mpanompon’i Jehovah mitoky aminy, dia miisa efa ho enina tapitrisa maneran-tany. Avy amin’ny porofo omen’ny fahatanterahan’ny teny faminanian’Andriamanitra, dia fantatr’izy ireo fa hofaranan’i Jehovah tsy ho ela itỳ fandehan-javatra mahery setra sy maloto fitondran-tena itỳ. Matoky àry izy ireo fa efa akaiky ny fotoana hahitany ny fahatanterahan’ny 1 Jaona 2:17, izay milaza hoe: “Mandalo izao fiainana izao sy ny filany; fa izay manao ny sitrapon’Andriamanitra no maharitra mandrakizay.” Matoky tanteraka ny mpanompony fa hotanterahin’i Jehovah io fampanantenana io.
13. Hatraiza no azonao itokiana amin’i Jehovah?
13 Hatraiza no azonao itokiana amin’i Jehovah? Azonao atao ny mitoky tanteraka aminy! Na dia mamoy ny ainao noho ny fanompoana azy aza ianao ankehitriny, dia hanome anao fiainana tsara lavitra izy amin’ny fitsanganana amin’ny maty. Manome toky antsika toy izao i Jesosy: “Avy ny ora handrenesan’izay rehetra ao amin’ny fasam-pahatsiarovana [izany hoe ao amin’ny fahatsiarovan’Andriamanitra] ny feony; dia hivoaka izy”. (Jaona 5:28, 29, NW ). Mahafantatra dokotera, mpitarika ara-politika, mpahay siansa, mpandraharaha, na olon-kafa na iza na iza, afaka manao izany ve ianao? Asehon’ny zavatra nataon’izy ireo tamin’ny lasa fa tsy afaka manao izany izy ireo. I Jehovah kosa anefa dia sady afaka manao izany no tena hanao izany!
Hoavy mahatalanjona ho an’ireo olona mahatoky
14. Hoavy mahatalanjona manao ahoana no ampanantenain’ny Tenin’Andriamanitra an’ireo olona mahatoky?
14 Nanondro ny maha-azo antoka ny hisian’ny tontolo vaovao iray eo ambany fitantanan’ny Fanjakan’Andriamanitra any an-danitra i Jesosy, rehefa nilaza hoe: “Sambatra ny malemy fanahy; fa izy no handova ny tany”. (Matio 5:5). Nanamafy ilay fampanantenan’Andriamanitra hita ao amin’ny Salamo 37:29 izany. Izao no lazain’izy io: “Ny marina handova ny tany ka honina eo aminy mandrakizay.” Taloha kelin’ny nahafatesan’i Jesosy, dia naneho finoana azy ny jiolahy iray, ka hoy izy tamin’io lehilahy io: “Hiaraka amiko ao amin’ny Paradisa ianao.” (Lioka 23:43, NW ). Eny, amin’ny maha-Mpanjakan’ny Fanjakan’Andriamanitra azy, dia hataon’i Jesosy izay hitsanganan’io lehilahy io amin’ny maty, eto an-tany, ka hananany fahafahana hiaina mandrakizay ao amin’io Paradisa io. Amin’izao andro izao, ireo izay mino ny Fanjakan’i Jehovah dia afaka miandrandra koa ny hiaina ao amin’ny Paradisa, rehefa “hofafan[’Andriamanitra] ny ranomaso rehetra amin’ny mason[’izy ireo]; ary tsy hisy fahafatesana intsony, sady tsy hisy alahelo, na fitarainana, na fanaintainana”. — Apokalypsy 21:4.
15, 16. Nahoana no handry feizay tokoa ny fiainana ao amin’ilay tontolo vaovao?
15 Andeha isika haka sary an-tsaina ny tenantsika ho ao anatin’io tontolo vaovao io. Eritrereto hoe efa miaina sahady ao amin’izy io isika. Tonga dia tsikaritsika avy hatrany fa olona sambatra miara-miaina ao anatin’ny fiadanana tanteraka no tsinjo hatraiza hatraiza. Ao anatin’ny toe-piainana sahala amin’izay nolazalazain’ny Isaia 14:7 toy izao izy ireo: “Miadana ka mandry fahizay ny tany rehetra; velominy ao ny hoby”. Nahoana izy ireo no toy izany? Voalohany aloha, dia mariho fa tsy misy hidiny ny varavaran’ny trano. Tsy misy ilana izany, satria tsy misy heloka bevava na herisetra. Izany dia tena araka izay lazain’ny Tenin’Andriamanitra manao hoe: “Samy hipetraka eny ambanin’ny voalobony sy ny aviaviny izy, ary tsy hisy hanaitaitra azy”. — Mika 4:4.
16 Tsy hisy ady intsony koa, satria voarara ny ady, ao amin’io tontolo vaovao io. Ny fitaovam-piadiana rehetra dia navadika ho fitaovam-piasana mitondra fiadanana. Tanteraka amin’ny heviny feno itỳ Isaia 2:4 itỳ: “Hanefy ny sabany ho fangady ireny, ary ny lefony ho fanetezam-boaloboka; ny firenena tsy hanainga sabatra hifamely na hianatra ady intsony.” Zavatra efa nampoizintsika anefa izany! Nahoana? Satria nianatra ny hanao izany ny ankamaroan’ireo mponina ao amin’ilay tontolo vaovao, fony izy ireo nanompo an’Andriamanitra tao anatin’ilay tontolo tranainy.
17. Toe-piainana hanao ahoana avy no hanjaka eo ambany fitantanan’ny Fanjakan’Andriamanitra?
17 Zavatra hafa iray voamarikao koa ny hoe tsy misy intsony ny fahantrana. Tsy misy olona mipetraka ao anaty trano bongo maloto, na mitafy voro-kitsay, na tsy manan-kialofana. Manana trano mampiadana sy tanàna voakarakara tsara, misy hazo sy voninkazo tsara tarehy, ny rehetra. (Isaia 35:1, 2; 65:21, 22; Ezekiela 34:27). Tsy misy intsony ny hanoanana, satria notanterahin’Andriamanitra ilay fampanantenany hoe hisy sakafo tondraka ho an’ny rehetra. Hoy tokoa mantsy izy: “Hahavoka-bary betsaka ny tany, na dia any an-tampon’ny tendrombohitra aza”. (Salamo 72:16). Eny tokoa, eo ambany fitarihan’ny Fanjakan’Andriamanitra, dia miitatra maneran-tany ny paradisa be voninahitra iray, tsy misy hafa amin’izay nokasain’Andriamanitra tany Edena. — Genesisy 2:8.
18. Zavatra inona avy no tsy hahatandindomin-doza ny olona intsony ao amin’ilay tontolo vaovao?
18 Talanjona koa ianao mahita ny tanjaka sy ny havitrihan’ny rehetra. Izany no izy, satria manana vatana sy saina lavorary izao izy ireo. Tsy misy aretina na fanaintainana na fahafatesana intsony. Tsy misy olona eo amin’ny seza misy kodiarana na any amin’ny hopitaly. Efa navalon’ny lasa mandrakizay izany rehetra izany. (Isaia 33:24; 35:5, 6). Tsy misy biby mety hampidi-doza na dia iray aza, satria efa nanjary nalemy fanahy izy ireny noho ny herin’Andriamanitra! — Isaia 11:6-8; 65:25; Ezekiela 34:25.
19. Nahoana no ho ‘firavoravoana’ ny andro tsirairay ao amin’ilay tontolo vaovao?
19 Fandrosoana mahatalanjona tokoa no vitan’ireo mponina mahatokin’io tontolo vaovao io! Ny herin’izy ireo sy ny fahaizany ary ny haren’ny tany dia atokana hikatsahana zava-mahasoa, fa tsy manimba; hiaraha-miasa amin’ny hafa, fa tsy hifaninanana aminy. Olona azonao itokiana daholo ny olona rehetra tojo anao, satria “samy efa nampianarin’i Jehovah” ny rehetra, araka ny nampanantenain’Andriamanitra. (Isaia 54:13). Koa satria fehezin’ny lalàn’Andriamanitra ny rehetra, ny tany dia “ho henika ny fahalalana an’i Jehovah, tahaka ny anaronan’ny rano ny fanambanin’ny ranomasina”. (Isaia 11:9). Marina tokoa fa ho ‘firavoravoana’, araka ny voalazan’ny Salamo 37:11, ny andro tsirairay ao amin’io tontolo vaovao io.
Hoavy sambatra azo antoka
20. Inona no tsy maintsy ataontsika mba hananana hoavy feno fiadanana?
20 Inona no tsy maintsy ataontsika mba hahitana izany hoavy sambatra izany? Izao no lazain’ny Isaia 55:6 amintsika: “Mitadiava an’i Jehovah, dieny mbola hita Izy, miantsoa Azy, dieny mbola akaiky Izy.” Eo am-pitadiavantsika azy, dia tokony ho sahala amin’izao voalazalaza ao amin’ny Salamo 143:10 izao ny fihetsitsika: “Ampianaro hanao ny sitraponao aho; fa Hianao no Andriamanitro”. Izay manao izany dia afaka mandeha tsy misy tsiny eo anatrehan’i Jehovah mandritra izao andro farany izao, ary afaka miandrandra hoavy faran’izay tsara. “Diniho ny mahitsy, ka jereo ny marina; fa misy farany ho an’ny olona tia fihavanana. Fa ny mpanota haringana avokoa; ny hiafaran’ny ratsy fanahy ho fongotra.” — Salamo 37:37, 38.
21, 22. Eo am-pamolavolana inona Andriamanitra amin’izao andro izao, ary ahoana no anatontosana ilay fampiofanana?
21 Ankehitriny i Jehovah dia miantso ny olona avy amin’ny firenena rehetra izay maniry hanao ny sitrapony. Eo am-pamolavolana azy ireo ho fototra hiorenan’ilay fitambaran’olona vaovao eto an-tany izy, araka ny voalaza mialoha ao amin’ny faminanian’ny Baiboly, manao hoe: “Any am-parany [ny fotoana iainantsika ankehitriny] (...), [dia] maro ny firenena no hiainga ka hanao hoe: Andeha isika hiakatra any an-tendrombohitr’i Jehovah [ny fanompoam-pivavahana marina sy nasandratra izay atolotra azy], (...) mba hampianarany antsika ny amin’ny làlany”. — Isaia 2:2, 3.
22 Ny Apokalypsy 7:9 dia milazalaza azy ireo ho “olona betsaka (...) avy tamin’ny firenena rehetra sy ny fokom-pirenena sy ny olona ary ny samy hafa fiteny”. Milaza toy izao ny andininy faha-14: “Ireo no avy tamin’ny fahoriana lehibe”, izany hoe tafita velona tamin’ny faran’ny fandehan-javatra ankehitriny. Olona efa ho enina tapitrisa ankehitriny io fototra hiorenan’ilay tontolo vaovao io, ary misy olona vaovao maro manatevin-daharana azy io isan-taona. Ankehitriny, ireny mpanompon’i Jehovah mahatoky rehetra ireny dia ampiofanina ho amin’ny fiainana ao amin’ilay tontolony vaovao. Mianatra izy ireo mba hananana ireo fahaizana ara-panahy sy fahaizana hafa ilaina mba hanovana itỳ tany itỳ ho paradisa. Matoky tanteraka izy ireo fa tena hisy tokoa ny Paradisa, satria “mahatoky Ilay [nampanantena, NW ]”. — Hebreo 10:23.
Famerenana
◻ Nitondra vokany inona avy ny tsy fananam-pinoana, tamin’ny taonjato voalohany?
◻ Hatraiza no azon’ny mpanompon’Andriamanitra itokiana aminy?
◻ Hoavy manao ahoana no miandry an’ireo olona mahatoky?
◻ Inona no tsy maintsy ataontsika mba ho azo antoka ny hananan’ny tenantsika hoavy sambatra ao amin’ilay tontolo vaovaon’Andriamanitra?
[Sary, pejy 18]
Eo am-pamolavolana ny fototra hiorenan’ny fitambaran’olona vaovao iray i Jehovah dieny izao