Iza moa i Jehovah?
HOY i Jehovah tamin’ny iray tamin’ireo mpivavaka aminy mahatoky: “Tsy misy olona mahita Ahy ka ho velona.” (Eksodosy 33:20). “Andriamanitra dia Fanahy”, ka tsy afaka mahita azy amin’ny mason’izy ireo ara-bakiteny ny olombelona. (Jaona 4:24). Tsy misy hafa amin’ny hoe hanimba ny masontsika ny fijerena mivantana ny masoandro amin’ny mitataovovonana, dia toy izany koa fa hanimba antsika ny fijerena ilay Loharanon-kery faran’izay lehibe, izay tsy vitan’ny hoe namorona ny masoandrontsika mamirapiratra fotsiny, fa ireo masoandro hafa tsy tambo isaina eo amin’izao rehetra izao koa.
Soa ihany fa tsy mila mahita an’Andriamanitra isika vao hahafantatra ny momba azy. Ny Baiboly dia mampahafantatra hoe iza Ilay nanomana ho antsika ilay fonosan’entana mahatalanjona, dia ny tany, no sady mampiharihary koa ny toetran’izy io. Koa mendrika ny hanaovana ezaka àry ny fandinihana lalina ny Baiboly mba hahafantarana ny momba ilay Ray izay nanome fiainana antsika sady nanome fonenana mahafinaritra hahazoantsika mifaly amin’izany fiainana izany.
Ny dikan’ny anarany
Samy misy dikany avokoa ny anarana rehetra, na dia maro aza no mety tsy hahafantatra azy ireny, amin’izao andro izao. Ilay anarana mahazatra hoe Davida, ohatra, dia avy amin’ny teny hebreo iray midika hoe “Malala”. Misy dikany koa ny anaran’ny Mpamorona hoe Jehovah. Inona izany? Amin’ny teny hebreo nanoratana ny Baiboly tany am-boalohany, dia nosoratana tamin’ny litera efatra, YHWH, ny anaran’Andriamanitra, ary miseho efa ho im-7 000 ao amin’ny tapany amin’ny soratra hebreo amin’ny Baiboly. Heverina fa midika hoe “Mahatonga Izy” ny anaran’Andriamanitra. Milaza tsy mivantana izany fa amim-pahendrena i Jehovah dia mahatonga ny tenany ho na inona na inona, araka izay ilainy, mba hanatanterahana ny fikasany. Mpamorona izy, Mpitsara, Mpamonjy, Mpanohana ny Aina, ary noho izany, dia afaka manatanteraka ny fampanantenany. Ambonin’izany, amin’ny fiteny hebreo, ilay anarana hoe Jehovah dia miseho amin’ny endrika matoanteny iray manambara asa eo an-dalam-pahatanterahana. Eny, mbola mahatonga ny tenany ho ilay mpanatanteraka ny fikasany foana i Jehovah. Andriamanitra velona izy!
Ireo toetran’i Jehovah lehibe indrindra
Ny Baiboly dia milazalaza ny Mpamorona ho “Andriamanitra mamindra fo sy miantra, mahari-po sady be [hatsaram-panahy miharo fitiavana, NW ] sy fahamarinana, mitahiry [hatsaram-panahy miharo fitiavana, NW ] ho an’ny olona arivo mandimby, mamela heloka sy fahadisoana ary fahotana”. (Eksodosy 34:6, 7). Ilay fitenenana hoe “hatsaram-panahy miharo fitiavana” dia mandika teny hebreo iray tena misy heviny. Izy io dia milaza hatsaram-panahy izay mifikitra amim-pitiavana amin-javatra iray, mandra-pahatanteraky ny fikasany ho an’izany zavatra izany. Azo adika koa hoe “fitiavana tsy mivadika”, izy io. Ny hatsaram-panahin’i Jehovah dia mifikitra amim-pitiavana amin’ireo zavaboariny, sady manatanteraka ny fikasany mahatalanjona. Moa ve tsy hankamaminao ny fitiavana toy izany, izay avy amin’Ilay nanome fiainana anao?
Mahari-po i Jehovah sady mailaka hamela ny helotsika. Mahafinaritra ny eo akaikin’ny olona toy izany. Tsy midika anefa akory izany hoe manala tsiny ny fanaovan-dratsy izy. Hoy ny nambarany: “Izaho Jehovah dia tia rariny; halako ny fandrombahana amin’ny faharatsiana”. (Isaia 61:8). Amin’ny maha-Andriamanitry ny rariny azy, dia tsy handefitra mandrakizay amin’ireo mpanota sahisahy ratsy mikiry amin’ny faharatsiany izy. Afaka matoky isika, araka izany, fa amin’ny fotoana noferany, i Jehovah dia hanitsy ny tsy rariny eto an-tany. Tsy hanao tsinontsinona ireo nampahorina izy.
Tsy mora ny mihazona fahaiza-mandanjalanja tonga lafatra eo amin’ny fitiavana sy ny rariny. Raha ray na reny ianao, moa ve hitanao fa sarotra ny manapa-kevitra hoe rahoviana, na amin’ny fomba ahoana, na hoe hatraiza ny fetra tokony hanitsiana ny zanakao rehefa tsy mety ny fitondran-tenany? Mitaky fahendrena lehibe ny fampifandanjana ny rariny sy ny fangoraham-po miharo fitiavana. Maneho be dia be an’io toetra io i Jehovah rehefa mifampiraharaha amin’ny olombelona. (Romana 11:33-36). Eny tokoa, hita hatraiza hatraiza ny fahendren’ny Mpamorona, ohatra, eo amin’ireo zava-mahatalanjona noforonina manodidina antsika. — Salamo 104:24; Ohabolana 3:19.
Tsy ampy anefa ny manana fahendrena. Mba hanatanterahana ny sitrapony, dia tsy maintsy manana hery koa ny Mpamorona, ary mampiharihary ny Baiboly fa tena mahery izy, araka izao teny izao: “Asandrato ny masonareo, ka mijere; iza no nahary ireny? Izy no mamoaka ny antokony araka ny isany sy miantso azy rehetra amin’ny anarany avy noho ny haben’ny fahatanjahany sy ny heriny tsy toha, ka tsy misy diso ireny na dia iray akory aza.” (Isaia 40:26). Noho ny “haben’ny fahatanjahany”, dia mahavita ny zava-drehetra i Jehovah. Moa ve tsy manintona anao ho aminy izany toetra izany?
Andriamanitry ny firenena rehetra
Mety hanontany tena ianao hoe: ‘Moa ve anefa i Jehovah tsy Andriamanitry ny “Testamenta Taloha”, ary Andriamanitry ny Isiraely fahiny?’ Marina fa nampiharihary ny tenany tamin’ny Isiraelita i Jehovah. Noho izy namorona ny mpivady olombelona voalohany anefa, dia i Jehovah no Andriamanitra “Izay ahazoan’ny fianakaviana rehetra (...) etỳ an-tany anarana”. (Efesiana 3:15). Raha heverinao fa mety ny manaja ny razambenao, moa ve tsy hety ny hankatoavana Ilay nanome fiainana ho an’ilay lehilahy voalohany, dia ilay razambe iombonantsika, ary fototra niavian’ireo firazanana rehetra misy etỳ an-tany amin’izao andro izao?
Tsy tery saina ilay Mpamorona ny olombelona. Marina fa nisy fotoana nananany fifandraisana manokana tamin’ny firenen’ny Isiraely. Na dia tamin’izany aza anefa, dia noraisiny an-tanan-droa ireo rehetra niantso ny anarany. Hoy ny mpanjaka hendry iray teo amin’ny Isiraely tao amin’ny vavaka tamin’i Jehovah: ‘Henoy ny vahiny izay tsy isan’ny Isiraely olonao, fa tonga avy any amin’ny tany lavitra noho ny amin’ny anaranao izy, dia mihainoa any an-danitra ianao, ka manaova araka izay rehetra iantsoan’ny vahiny anao, mba ho fantatry ny firenena rehetra ambonin’ny tany ny anaranao.’ (1 Mpanjaka 8:41-43). Hatramin’izao andro izao, ny olona avy amin’ny firenena rehetra dia afaka ny ho tonga amin’ny fahalalana an’i Jehovah, ka hanana fifandraisana misy heviny amin’Andriamanitra. Amin’ny ahoana anefa izany no mahakasika anao?
Soa azo avy amin’ny fahalalana an’i Jehovah
Andeha hiverenantsika ilay fanoharana tao amin’ilay lahatsoratra teo aloha. Raha mahazo fonosan’entana tsara tarehy ianao, dia ho ara-dalàna ny hanirianao hahafantatra hoe hatao inona ilay fanomezana. Ahoana no tokony hampiasana sy hikarakarana azy io? Toy izany koa, isika dia maniry hahalala hoe inona no tao an-tsain’Andriamanitra fony izy nanomana ny tany ho antsika. Milaza ny Baiboly fa “tsy ho tany tsy misy endrika tsy akory no namoronany azy”, fa “nataony honenana”, izany hoe honenan’ny olombelona. — Isaia 45:18.
Tsy nikarakara ilay fanomezan’ny Mpamorona anefa ny ankamaroan’ny olombelona. Eo am-panimbana ny tany izy ireo, ary tena tsy mampifaly an’i Jehovah izany. Mifanaraka amin’ny dikan’ny anarany anefa, i Jehovah dia tapa-kevitra ny hanatanteraka ny fikasany tany am-boalohany ho an’ny olona sy ny tany. (Salamo 115:16; Apokalypsy 11:18). Hamerina ny tany amin’ny laoniny izy, ary hanome azy io ho lovan’ireo izay vonona hiaina toy ny zanany mankatò. — Matio 5:5.
Ny boky farany ao amin’ny Baiboly dia milazalaza toy izao ny tarehin-javatra hisy, rehefa hitranga izany: “Indro, ny tabernakelin’Andriamanitra dia eo amin’ny olona, ary Izy hitoetra eo aminy, ary ireo ho olony (...). Ary hofafany ny ranomaso rehetra amin’ny masony; ary tsy hisy fahafatesana intsony, sady tsy hisy alahelo, na fitarainana, na fanaintainana; fa efa lasa ny zavatra taloha.” (Apokalypsy 21:3, 4). Tsy hisy olona handrotsaka ranomasom-pahoriana intsony amin’izay, na halahelo noho ny famoizana olon-tiana. Tsy hisy olona hiantso vonjy noho ny famoizam-po, na hiaritra ny fanaintainana noho ny aretina mahafaty. Na dia ‘ny fahafatesana aza dia ho resy’. (1 Korintiana 15:26; Isaia 25:8; 33:24). Milazalaza ny karazam-piainana nirin’i Jehovah hifaliantsika tany am-boalohany izany, fony izy namorona ireo razambentsika voalohany.
Eny tokoa, afaka mahita sahady izany toe-piainana paradisa izany ianao ankehitriny, eo anivon’ireo mpivavaka amin’i Jehovah. Hoy izy amin’izy ireo: “Izaho, Jehovah Andriamanitrao, no mampianatra anao hahita soa sady mitarika anao amin’ny làlana tokony halehanao.” (Isaia 48:17). I Jehovah dia Ray tsara fanahy izay mampianatra antsika zanany ny fomba fiaina tsara indrindra. Tsy mamepetra tafahoatra ny toro lalana omeny ny olombelona, fa miaro amim-pitiavana kosa. Hitondra ho amin’ny tena fahafahana sy fahasambarana ny fanarahana azy io, araka ny voasoratra hoe: “Ary [i Jehovah, NW ] izany Fanahy izany; ary izay itoeran’ny Fanahin’[i Jehovah, NW ] no itoeran’ny fahafahana.” (2 Korintiana 3:17). Amin’ny fanarahana ny toro lalana voasoritra ao amin’ny Baiboly, ireo izay manaiky ny fanapahany dia mahita fiadanan-tsaina dieny izao, dia fiadanan-tsaina izay hanenika ny tontolon’ny olombelona manontolo, indray andro any. — Filipiana 4:7.
Ray mpanao soa toy inona moa i Jehovah! Moa ve ianao vonona ny hianatra bebe kokoa momba Ilay ao ambadik’ireo zava-mahatalanjona rehetra noforonina? Ho an’ireo vonona amin’izany, dia tsy hay tombanana ny soa azony na dia ankehitriny aza. Ary amin’ny hoavy dia ho mandrakizay ireo fitahiana.
[Sary, pejy 5]
Hita eo amin’ny rindrin’ny fiangonana tranainy maro ny anaran’Andriamanitra voasoratra amin’ny litera hebreo efatra