Ny Tany — Nahoana Izy io no Eto?
Misy fanontaniana tokony hodinihinao: Moa ve ny planetantsika tsara tarehy noforonin’ny Mpamorona marani-tsaina iray izay manana fikasana ho an’ny tany sy ny olona eo ambonin’izy io? Ny famaliana io fanontaniana io amin’ny fomba mahafa-po dia afaka manampy anao hahita izay tahirizin’ny hoavy ho an’ny planetantsika.
MPAHAY siansa maro izay nandalina ny amin’izao rehetra izao sy ny tanintsika no nahita porofo maro izay milaza fa misy Mpamorona iray, ary manohana izao rehetra izao Andriamanitra. Hevero izay nolazain’ny iray monja tamin’izy ireo:
Nanoratra toy izao tao amin’ilay bokiny hoe The Mind of God ny Profesora Paul Davies: “Ny fisian’izao rehetra izao milamina sy mirindra, misy rafitra tsy miovaova sy voalamina ary be kojakojany, dia mitaky lalàna sy fepetra tena hafa karazana.”
Rehefa avy niresaka ny amin’ireo “fifanandrifian-javatra” izay nomarihin’ireo mpahay fizika momba ny astrônômia sy ireo mpahay siansa hafa ny Profesora Davies, dia nanampy teny toy izao: “Raha raisina mitambatra izy ireny, dia manaitra ny saina ny fanaporofoany fa ny fiainana, araka ny ahafantarantsika azy, dia miankina be dia be amin’ny toetran’ireo lalàna fizika, sy miankina amin’ny toa kisendrasendra tsara teo amin’ireo fatran-javatra nofidin’ny natiora ho an’ireo tenan-javatra madinika samihafa, ho an’ny tanjaky ny hery sy ny toy izany. (...) Ampy ny milaza fa raha afaka naka ny toeran’Andriamanitra isika, ka nifidy befahatany izay habetsahan’ireo fatran-javatra ireo, tamin’ny alalan’ny fanodinana bokotra maromaro, dia ho hitantsika fa saika ireo bokotra rehetra dia hahatonga itỳ tontolo itỳ ho tsy azo onenana. Amin’ny toe-javatra sasany, dia toa ilaina hatao maty paika tsara ny fanodinana ireo bokotra samy hafa, raha tiana hiroborobo toy izao ny fiainana eto amin’izao rehetra izao. (...) Azo antoka fa misy heviny lalina ny hoe mety hahatonga izao rehetra izao ho tsy hay jerena na dia ny fiovana kely monja eo amin’ireo zavatra misy ankehitriny aza.”
Ny dikan’izany ho an’ny maro dia hoe ny tanintsika, sy ny sisa amin’izao rehetra izao, dia nataon’ny Mpamorona iray manana fikasana. Raha izany no izy, dia ilaintsika hofantarina ny antony namoronany ny tanintsika tamin’ny voalohany. Ilaintsika hofantarina koa, raha azo atao, hoe inona ny fikasany ho an’ny tany. Misy zavatra hafahafa mifanohitra, mifandray amin’izany. Na dia miely patrana aza ny tsy finoana an’Andriamanitra, dia mahagaga fa olona maro no mbola mino ny fisian’ny Mpamorona iray mahira-tsaina. Ny ankamaroan’ireo fiangonan’ny Fivavahana Lazaina fa Kristianina dia mba milaza ny amin’ny Andriamanitra tsitoha iray sy Mpamorona izao rehetra izao. Mahalana be anefa ireny fivavahana ireny vao matoky sy miaiky mafy rehefa milaza ny amin’ny hoavin’ny tany ao anatin’ny fikasan’Andriamanitra.
Inona no lazain’ny Baiboly?
Ara-dalàna ny mitodika any amin’ny loharanom-panazavana iray izay eken’ny maro ho avy amin’ny Mpamorona. Ny Baiboly izany loharano izany. Hita ao amin’ny Mpitoriteny 1:4 ny iray amin’ireo filazana tsotra indrindra sy mazava indrindra ao amin’izy io, momba ny hoavin’ny tanintsika. Izao no vakintsika: “Lasa ny taranaka iray, ary mandimby kosa ny taranaka iray; fa ny tany mbola maharitra mandrakizay.” Tsy miolakolaka ny Baiboly rehefa manazava ny antony namoronan’i Jehovah Andriamanitra ny tany. Asehony koa fa napetrany eo amin’ny toerana mety indrindra eo amin’izao rehetra izao izy io, sy mifandray amin’ny masoandrontsika, mba hanohana ny fiainana eo aminy. Nanome tsindrimandry an’i Isaia, mpaminany fahiny, mba hanoratra toy izao, ilay Andriamanitra Tsitoha: “Izao no lazain’i Jehovah, Izay nahary ny lanitra (Izy no Andriamanitra) sady namorona ny tany sy nahavita azy (Izy no nandamina azy; tsy ho tany tsy misy endrika tsy akory no namoronany azy, fa nataony honenana): Izaho no Jehovah, ary tsy misy hafa.” — Isaia 45:18.
Ahoana anefa ny amin’ny fampitomboan’ny olombelona ny fitaovana hamotika ny fiainana rehetra eto an-tany? Noho ny fahendreny tsy manam-paharoa, dia nilaza Andriamanitra fa hisalovana izy, alohan’ny hahafahan’ny olombelona hanimba ny fiainana rehetra eto amin’ny planetantsika. Mariho itỳ fampanantenana mampahery ao amin’ny boky farany ao amin’ny Baiboly itỳ, dia ny Apokalypsy: “Tezitra ny firenena maro, ary tonga ny fahatezeranao sy ny fotoana hitsarana ny maty, sy hanomezana valim-pitia ny mpaminany mpanomponao sy ny olona masina ary izay matahotra ny anaranao, na kely na lehibe, ary mba hanimbanao izay manimba ny tany.” — Apokalypsy 11:18.
Ahariharin’i Jehovah amintsika ny fikasany tany am-boalohany tamin’ny namoronana ny tany, dia ilay vatosoa eo amin’ny habakabaka tsy taka-maso, araka ny nilazalazan’ny mpanamory sambon-danitra iray nihodidina ny tany, azy. Nokasain’Andriamanitra ho tonga paradisa iray haneran-tany izy io, hampiadana tsara mba honenan’ny olombelona, dia lehilahy sy vehivavy, hiara-miaina avokoa ao anatin’ny filaminana sy ny firindrana. Nanao fandaharana izy mba hisian’ny olona hameno tsikelikely ny tany, ka namela ny mpivady olombelona voalohany hanan-taranaka. Nataon’i Jehovah paradisa ny faritra kely iray tamin’ny tany, mba ho fahafinaretana sy fifaliana ho an’ilay mpivady olombelona voalohany. Rehefa hihamitombo arakaraka ny fandehan’ireo taona sy taonjato ny fianakavian’olombelona, dia hitarina tsikelikely ilay saha Edena, mandra-pahatanteraky ny Genesisy 1:28 manao hoe: “Ary Andriamanitra nitso-drano azy hoe: Maroa fara sy mihabetsaha ary mamenoa ny tany, ka mampanompoa azy”.
Koa satria hitantsika ankehitriny ny toe-javatra mampalahelo misy ny tany sy ny mponina eo aminy, midika ve izany fa tsy nahomby ny fikasan’Andriamanitra tany am-boalohany ho an’ny tany? Sa nanova ny fikasany izy ka nanapa-kevitra hoe satria nivily lalana ny olombelona, dia havelany ho simba tanteraka ny planeta, ka toy ny hoe hamerina hatramin’ny voalohany indray izy? Tsia, afaka matoky isika fa tsy misy marina ireo toe-javatra roa ireo. Milaza amintsika ny Baiboly fa na inona na inona kasain’i Jehovah, dia tsy maintsy ho tanteraka izany amin’ny farany, ary na inona na inona fanapahan-keviny, dia tsy misy mahasakana izany na iza na iza, eny fa na dia ny fizotran-javatra tsy nampoizina aza. Manome toky antsika izy hoe: “Dia ho tahaka izany ny teniko izay aloaky ny vavako: Tsy hiverina amiko foana izy, raha tsy efa mahatanteraka izay sitrako ary ambinina amin’izay ampandehanako azy.” — Isaia 55:11.
Voasembantsembana ny fikasan’Andriamanitra, fa tsy niova
Rehefa niala andraikitra i Adama sy i Eva ary noroahina avy tao amin’ny saha Edena, dia niharihary fa ho tanteraka ny fikasan’Andriamanitra hanao ny tany ho paradisa, na dia tsy eo aza izy ireo. Na izany aza, dia nasehon’i Jehovah avy hatrany fa hisy amin’ny taranak’izy ireo hanatanteraka ny baikony tany am-boalohany. Marina fa hitaky fotoana izany, taonjato maro mihitsy aza, nefa tsy misy filazana mihitsy hoe fotoana manao ahoana no ho tafiditra tamin’ny fanatanterahana ilay baiko tany am-boalohany, na dia ho samy nanohy niaina tao anatin’ny fahalavorariana aza i Adama sy i Eva. Ny zavatra azo antoka dia hoe amin’ny faran’ny Fanjakana Arivo Taonan’i Kristy Jesosy — rehefa afaka arivo taona mahery kely — ny toe-piainana paradisa tao Edena dia hanerana ny tany manontolo, ary ny planeta Tany dia ho feno mponina milamina sy sambatra, izay taranak’ilay mpivady olombelona voalohany. Eny tokoa, hohamarinina mandrakizay ny fahaizan’i Jehovah amin’ny maha Mpikasa tsy mety diso azy!
Amin’izay fotoana izay dia ho tanteraka ireo faminaniana mampientana nomen’Andriamanitra ara-tsindrimandry efa ela be izay. Ho tanteraka amim-boninahitra ny andinin-teny toy ilay ao amin’ny Isaia 11:6-9 hoe: “Ny amboadia hiara-mitoetra amin’ny zanak’ondry; ny leoparda hiara-mandry amin’ny zanak’osy; ary ny zanak’omby sy ny liona tanora sy ny ombikely mifahy hiray toerana, ary ny zazakely no hiroaka azy. Ary ny ombivavy sy ny bera hiara-komana; ny zanany hiara-mandry; ary ny liona hihina-mololo tahaka ny omby; ny zaza minono hilalao amin’ny lavaky ny vipera, ary ny zaza mitsaha-nono haninjitra ny tànany ao amin’ny lavaky ny menarana. Ary tsy handratra na hanimba eran’ny tendrombohitro masina izy; fa ny tany ho henika ny fahalalana an’i Jehovah, tahaka ny anaronan’ny rano ny fanambanin’ny ranomasina.”
Ny tsy fahasalamana sy ny aretina mahafaty dia ho anisan’ny zavatra efa lasa, ary ho toy izany koa ny fahafatesana mihitsy. Misy zavatra mazava kokoa noho ireto teny tsotra hita ao amin’ny boky farany ao amin’ny Baiboly ireto ve? “Ny tabernakelin’Andriamanitra dia eo amin’ny olona, ary Izy hitoetra eo aminy, ary ireo ho olony, ary Andriamanitra no hitoetra eo aminy, dia ho Andriamaniny. Ary hofafany ny ranomaso rehetra amin’ny masony; ary tsy hisy fahafatesana intsony, sady tsy hisy alahelo, na fitarainana, na fanaintainana; fa efa lasa ny zavatra taloha.” — Apokalypsy 21:3, 4.
Marina tokoa fa afaka mahazo fampaherezana isika, satria natao haharitra itỳ Tany itỳ, ilay planetantsika tsara tarehy. Enga anie ianao hahazo ny tombontsoa ho tafita velona amin’ny faran’itỳ fandaharan-javatra ratsy itỳ mbamin’ireo fombany manimba ny tany. Efa antomotra dia antomotra ankehitriny ilay tontolo vaovao madio hamboarin’Andriamanitra. Ary havan-tiana maro no hiarina avy ao amin’ny fahafatesana, noho ny fahagagana amin’ny fananganana amin’ny maty. (Jaona 5:28, 29). Eny, natao haharitra eto ny tanintsika, ary afaka ny haharitra hiaraka aminy isika ka hankafy azy io.