Mitantara Ireo Mpitory Ilay Fanjakana

“Tany An-tsena Isan-andro”

NANARARAOTRA ny fotoana rehetra ny apostoly Paoly mba hampielezana ny hafatra momba ilay Fanjakana. Mba hikarohana ireo olona mendrika, dia nanjohy hevitra “tamin’ny Jiosy (...) tao amin’ny synagoga sy tamin’izay tafavory tany an-tsena isan-andro” izy. — Asan’ny Apostoly 17:17.

Lasa marika famantarana ny mpivavaka marina amin’i Jehovah izany zotom-po izany, nanomboka tamin’ny taonjato voalohany am.f.i. (Matio 28:19, 20). Toy izany koa amin’izao andro izao fa mampiasa fomba isan-karazany ny Vavolombelon’i Jehovah rehefa manampy amin-jotom-po ireo olona tso-po, mba ho araka ny marina ny fahalalan’izy ireo ny fahamarinana. (1 Timoty 2:3, 4). Ohatra iray manazava izany izao zava-nitranga tany Aostralia izao:

Dimy andro isan-kerinandro, i Sid sy i Harold dia mifandimby mitana trano heva kely iray fampirantiana zavatra vita an-tsoratra ara-baiboly, eo akaikin’ny gara iray, any Sydney. Efa tokony ho dimy taona izao no nizaran’izy ireo ny vaovao tsaran’ny Fanjakan’Andriamanitra, tamin’izany fomba izany. Manazava toy izao i Sid, izay 95 taona: “Rehefa nandray 87 taona aho, dia tsy afaka nitondra fiara intsony. Nandiso fanantenana ahy izany, satria nankafy ny asa fitoriana ampahibemaso aho. Indray andro, raha teo akaikin’ny toerana iray ifanotofan’ny mpizaha tany, antsoina hoe Echo Point, ao Katoomba, aho, dia nahita mpanakanto iray nivarotra sary hoso-doko mampiseho ny eny ambanivohitra. Nodinihiko tsara ireo sary hoso-doko ka hoy aho anakampo: ‘Manana sary tsara kokoa noho io aho ao anaty kitapoko fitondra mitory — ary mora lavitra ny vidiny!’ Tapa-kevitra ny hanangana trano heva kely fampirantiana àry aho, ka hanorina azy io eo amin’ny toerana iray be olona, ary hanolotra amin’ny mpandalo ireo zavatra vita an-tsoratra ara-baiboly misy sary tsara tarehy, avoakan’ny Vavolombelon’i Jehovah.

“Efa-taona lasa izay, dia nafindrako teto Sydney ilay trano heva, ary tonga nanampy ahy i Harold. Mifandimby mitana ilay trano heva izahay ary miara-miasa amin’ny kongregasionanay eto an-toerana.” Hoy i Harold, izay 83 taona ankehitriny: “Vitsy kely ny olona tratra an-trano, ny alatsinainy ka hatramin’ny zoma. Ny fizarana ny hafatra momba ilay Fanjakana amin’itỳ fomba itỳ àry, dia mahatonga anay ho eny amin’ny toerana ahitana ny olona. Mazava ho azy fa mahita vokatra tsara kokoa izahay. Miavaka tokoa ny isan’ny zavatra vita an-tsoratra voapetrakay, raha eto amin’itỳ tany misy anay itỳ.”

“Na dia niova toerana inefatra na indimy samy hafa aza izahay tao anatin’ny taona maro”, hoy i Sid, “dia tsy ela dia fantatry ny olona. Misy olona tonga eo aminay mba hitady zavatra vita an-tsoratra. Ny hafa moa dia manana fanontaniana iriny hovaliana. Ary ny sasany dia maniry hiresaka minitra vitsy monja. Sambany izao vao ny olona tsidihiko indray no tonga atỳ amiko”, hoy izy somary nihomehy kely.

“Olona maro no tena liana amin’ny Baiboly”, hoy ny teny nanampin’i Harold. “Tao anatin’ny iray volana, dia olona efatra no nanomboka niara-nianatra Baiboly tamin’ny Vavolombelona, vokatry ny zavatra vita an-tsoratra azon’izy ireo taminay, sy noho ireo fanontaniana voavalinay avy tao amin’ny Baiboly. Mampahery anay tokoa ny zava-nitranga toy izany.”

Toa an’i Sid sy i Harold — ary toy ny apostoly Paoly — ny Vavolombelon’i Jehovah, na aiza na aiza misy azy, dia mampiasa ny fomba rehetra azo atao mba hampielezana ilay hafatra tena lehibe entiny. Araka izany, dia torina tsy an-kijanona any ‘amin’ny tany onenana manontolo ny vaovao tsara’. — Matio 24:14, NW.