Mitantara Ireo Mpitory Ilay Fanjakana

Mianatra ny Fahamarinana ny Mpanohitra Taloha Iray

BE IZAY tatitra nataon’ny vaovao momba ny ady an-trano any Liberia izay. An’aliny maro no namoy ny ainy ary mbola maro lavitra noho izany aza no voatery nifindra toerana. Manohy mandray ny fahamarinana ny olona tso-po, na dia eo aza ireny zava-tsarotra ireny, araka ny asehon’izao fitantarana manaraka izao.

Notezain’ny Fiangonana Loteranina i James, hatramin’ny fahafolo taonany. Rehefa tonga mpampanonta gazetim-piangonana izy, dia nampiasa io toerany io mba hanoratana lahatsoratra namely ny Vavolombelon’i Jehovah, na dia mbola tsy nihaona mihitsy tamin’ny iray amin’izy ireny aza izy.

Niala tamin’ilay fanaovana gazetim-piangonana i James, rehefa nandeha ny fotoana, ka tonga tompon’ny hotely fatoriana iray, izay nahita fahombiazana. Indray andro, raha iny izy nipetraka tao amin’ny faritra fandraisan’olona tao amin’ny hoteliny iny, dia tonga nitsidika azy ny anabavy roa nitafy tsara. Raha vao nahita ny fitafiany madio sy milamina izy, dia nampandroso azy ireo. Rehefa nohazavain’izy ireo anefa ny anton-diany, dia hoy i James: “Be zavatra atao aho ka tsy afaka miresaka.” Notoloran’ireo Vavolombelona famandrihana tamin’ny gazety Ny Tilikambo Fiambenana sy Mifohaza! izy, ka nanaiky mba hampandeha azy mirahavavy fotsiny. Tonga tany an-tranony nandritra ny 12 volana ireo gazety, saingy napetrany tao anaty kitapo plastika iray, ary tsy nesoriny akory aza ny fonosana nisy azy.

Nafotaka ny ady an-trano, ka nafatratr’i James tao anaty kitapo iray ny vola sy ireo zava-tsarobidy mba handosirany raha vao misy famantarana fanafihana. Indray maraina, dia nisy grenady nipoaka tao ambadiky ny varavarany, tany andamosin-trano. Nisahotaka i James ka noraisiny ilay kitapony, ary lasa izy nanavotra aina. Namonjy ireo sivily an’arivony maro izay voatery nandositra izy, ary tsy maintsy nandalo toeram-pisavana maromaro. Norobaina sy novonoina tsy amin’antony matetika ny sivily, tany amin’ireny toerana ireny.

Nametrahana fanontaniana vitsivitsy i James teo amin’ilay toeram-pisavana voalohany, ary avy eo dia nasaina nanokatra ny kitapony. Rehefa nanao izany izy ka nijery tao anatin’ilay kitapony, dia tsy nino izay hitan’ny masony izy. Loza fa hay tsy ilay kitapo nisy ireo zava-tsarobidiny no nentiny. Tao anatin’ny fisahotahany, dia noraisiny ilay kitapo nisy ireo gazety Ny Tilikambo Fiambenana sy Mifohaza! rehetra mbola tsy voasokatra. Rehefa nahita ireo gazety anefa ilay miaramila, ka namaky ny anaran’i James teo amin’ny fonony, dia hoy izy: “Hay Vavolombelon’i Jehovah ianao! Tsy mitady anareo izahay, fantatray fa tsy mandainga ianareo.” Rehefa avy naka gazety vitsivitsy tao amin’ilay kitapo ilay miaramila, dia nilaza tamin’i James mba hanohy ny diany.

Toy izany ihany no nitranga tao amin’ireo toeram-pisavana sivy samihafa, satria nihevitra an’i James ho Vavolombelon’i Jehovah ireo sefo, ka dia namela azy handeha tsy naninon-tsy naninona. Faly erỳ i James tamin’izay fa tsy nitondra ireo zava-tsarobidiny, satria raha araka izay hitany, dia azo antoka fa ho efa novonoina izy noho ireo fananany.

Rehefa tonga teo amin’ilay toeram-pisavana natahorana indrindra izy tamin’ny farany, dia tsiravina nahita faty maromaro niampatrampatra teo amin’ny tany. Raiki-tahotra mafy izy ka niantso ny anaran’i Jehovah. Nivavaka izy fa raha nanampy azy ho tafavoaka tamin’io faritra nisy famonoana io Andriamanitra, dia hanompo azy amin’ny andro sisa hiainany izy.

Nampiseho ny kitapony tamin’ireo miaramila i James, ary teo indray dia hoy izy ireo: “Tsy mitady ny olona toy itony izahay.” Nitodika tany amin’i James izy ireo ka nanampy teny hoe: “Misy rahalahinareo iray mipetraka erỳ ambany havoana erỳ. Mandehana mankany aminy.” Tamin’izay fotoana izay dia efa niova tanteraka ny fiheveran’i James ny Vavolombelona. Nifandray avy hatrany tamin’ilay rahalahy izy, ary natao ny fandaharana mba hianarany ny Baiboly tamin’ilay boky hoe Azonao Atao ny Hiaina Mandrakizay ao Amin’ny Paradisa eto An-tany.a

Andro vitsivitsy taorian’izay, dia nisy fanafihana iray nanery azy handositra ilay faritra. Tamin’ity indray mitoraka ity, dia nandositra tany anaty akata i James, ka tsy nahatondra afa-tsy ilay bokiny Hiaina Mandrakizay! Nandritra ireo 11 volana nahatafasaraka azy tamin’ny Vavolombelona, dia indimy izy no nianatra hatramin’ny farany ilay boky. Rehefa afaka niverina tao an-tanàna izy tamin’ny farany, dia nanohy indray ny fianarany ny Baiboly niaraka tamin’ny Vavolombelona, ary nandroso haingana. Fotoana fohy taorian’izay, dia natao batisa izy, ary ankehitriny izy dia manompo amim-pahatokiana miaraka amin’ireo rahalahiny ara-panahy.

[Fanamarihana ambany pejy]