Nanao ny Sitrapon’i Jehovah Izy Ireo
Famelan-keloka Izay Nanokatra ny Lalana ho Amin’ny Famonjena
NANANA tsiambaratelo faran’izay manafintohina ireo folo lahy zanak’i Jakoba, izay nijoro teo anoloan’ny praiminisitr’i Ejipta. Taona maro laza izay, dia namidin’izy ireo ho andevo i Josefa, rahalahiny iray ray taminy, ka nanao tetika izy ireo mba hilazana tamin’ny rainy fa novonoin’ny bibidia izy. — Genesisy 37:18-35.
Tokony ho 20 taona tatỳ aoriana, dia voatery nankany Ejipta mba hividy vary ireo lehilahy folo ireo, satria nisy mosary mafy tamin’izay. Tsy nisosa fotsiny anefa ny fandehan’ny raharaha. Niampanga azy ireo ho mpitsikilo ilay praiminisitra, izay sady mpiadidy ny sakafo. Nataony an-tranomaizina ny iray tamin’izy ireo ary nasainy nandeha nody kosa ny sisa mba haka an’i Benjamina, zandrin’izy ireo faralahy. Rehefa nanao araka izany izy ireo, dia nanatanteraka tetika iray hisamborana an’i Benjamina ilay praiminisitra. — Genesisy 42:1–44:12.
Nolavin’i Joda, iray tamin’ireo zanakalahin’i Jakoba, izany. ‘Raha toa izahay ka hiverina hody tsy hiaraka amin’i Benjamina, dia ho faty ny rainay’, hoy izy. Avy eo dia nisy zava-nitranga izay tsy nisy nanampo, na i Joda na ny iray tamin’ireo niara-dia taminy. Rehefa avy nasain’ilay praiminisitra nivoaka ny efitrano ny olon-drehetra, afa-tsy ireo zanak’i Jakoba, dia nitomany mafy izy. Hoy izy avy eo rehefa tony: “Izaho no Josefa”. — Genesisy 44:18–45:3.
Famindram-po sy fanafahana
“Mbola velona ihany va ikaky?”, hoy ny nanontanian’i Josefa an’ireo rahalahiny. Tsy nisy valiny. Sina tsy nahateny tokoa ireo rahalahin’i Josefa. Tokony ho safononoky ny hafaliana sa kosa tokony hihorohoro izy ireo? Roapolo taona lasa tokoa mantsy izay, dia namidin’izy ireo ho andevo ity lehilahy ity. Nanana fahefana hanao azy ireo any an-tranomaizina i Josefa, na koa hampody maina azy ireo, na hampamono azy ireo ho faty mihitsy aza! Ara-dalàna tsotra izao raha “tsy nahavaly azy ny rahalahiny; fa tora-kovitra teo anatrehany”. — Genesisy 45:3.
Mailaka avy hatrany ny hanao izay tsy hahasaikatsaikatra an’ireo lehilahy ireo i Josefa. “Avia, manatòna ahy hianareo”, hoy izy. Nanao izany izy ireo, ary hoy i Josefa avy eo: “Izaho no Josefa rahalahinareo, ilay namidinareo ho atỳ Egypta. Ary ankehitriny, aza malahelo na tezitra amin’ny tenanareo noho ny nivarotanareo ahy ho atỳ; fa hamonjy aina no nampandehanan’Andriamanitra ahy hialoha anareo atỳ.” — Genesisy 45:4, 5.
Marim-pototra anefa ny nanehoan’i Josefa famindram-po. Efa nahamarika ny porofon’ny fibebahan’izy ireo izy. Ohatra, rehefa nampangain’i Josefa ho mpitsikilo ireo rahalahiny, dia nandre azy ireo nifampiresaka toy izao izy: “Efa meloka tokoa isika noho ny amin’ny rahalahintsika (...); koa izany no nahatongavan’izao fahoriana izao amintsika”. (Genesisy 42:21). Afa-tsy izany koa, dia nanolotra ny tenany hisolo toerana an’i Benjamina ho andevo i Joda mba hiverenan’ilay tovolahy any amin’ny rainy. — Genesisy 44:33, 34.
Voamarina àry ny nanehoan’i Josefa famindram-po. Takany tokoa fa nety hiafara tamin’ny famonjena ny fianakaviany manontolo ny fanehoana izany. Nilaza tamin’ireo rahalahiny àry izy mba hiverina any amin’i Jakoba rainy, ka hilaza aminy hoe: “Izao no tenin’i Josefa zanakao: Efa nataon’Andriamanitra ho tompon’i Egypta rehetra aho; ka midìna hankatỳ amiko, fa aza mijanona; dia honina eo amin’ny tany Gosena hianao, ka ho eo akaikiko hianao sy ny zanakao sy ny zafinao ary ny ondry aman-osinao sy ny ombinao mbamin’izay rehetra anananao. Dia hamelona anao eo aho”. — Genesisy 45:9-11.
Ilay Josefa Lehibe
Azo antsoina hoe Josefa Lehibe i Jesosy Kristy, satria misy fitoviana manaitra eo amin’ireo lehilahy roa ireo. Tahaka an’i Josefa, dia nentin’ireo rahalahiny tamin’ny fomba ratsy i Jesosy. Taranak’i Abrahama toa azy tokoa mantsy no nanao izany taminy. (Ampitahao amin’ny Asan’ny Apostoly 2:14, 29, 37.) Samy nandia fitsimbadihan-javatra tsy fahita firy anefa ireo lehilahy roa ireo. Tatỳ aoriana, dia lasa praiminisitra, nanarakaraka avy hatrany an’i Farao, i Josefa, izay andevo teo aloha. Tahaka izany koa fa natsangan’i Jehovah tamin’ny maty i Jesosy, ary nasandrany ho amin’ny toerana ambony, “ho eo an-tànana ankavanan’Andriamanitra”. — Asan’ny Apostoly 2:33, fanamarihana ambany pejy; Filipiana 2:9-11.
Afaka nanome sakafo ho an’ireo rehetra tonga tany Ejipta mba hividy vary i Josefa noho izy praiminisitra. Amin’izao andro izao, dia manana mpanompo mahatoky sy malina eto an-tany koa ilay Josefa Lehibe, ary amin’ny alalan’izy io no anomezany sakafo ara-panahy “amin’ny fotoana mety”. (Matio 24:45-47, NW; Lioka 12:42-44). Ireo izay manatona an’i Jesosy tokoa dia “tsy ho noana na hangetaheta intsony (...). Fa ny Zanak’ondry Izay eo afovoan’ny seza fiandrianana no ho Mpiandry azy ka hitondra azy ho amin’ny loharanon’ny ranon’aina”. — Apokalypsy 7:16, 17.
Lesona ho antsika
Namela oha-pamindram-po niavaka i Josefa. Ho nitaky ny hanafaizany an’ireo nivarotra azy ho andevo, ny fampiharana tamin’ny fomba hentitra ny rariny. Tetsy an-danin’izany kosa, dia nety ho nanosika azy hanakimpy fotsiny ny masony tamin’ny fahotan’izy ireo ny fihetseham-po. Tsy nisy nataon’i Josefa ireo zavatra roa ireo, fa notsapainy kosa ny fibebahan’ireo rahalahiny. Rehefa hitany avy eo fa tena marina ny alahelon’izy ireo, dia navelany ny helony.
Afaka manahaka an’i Josefa isika. Tokony hamela heloka isika rehefa misy manota amintsika ka mampiseho tena fiovam-po marina. Mazava ho azy fa tsy tokony havelantsika hanakana antsika tsy hahita ny fanaovan-dratsy lehibe, ny fihetseham-po. Etsy an-danin’izany kosa, dia tsy tokony havelantsika hanakana antsika tsy hahita ireo fanaovan-javatra mitory fibebahana marina, ny lolompo. Koa aoka àry isika ‘hanohy hifandefitra sy hifamela heloka amin-kalalahana’. (Kolosiana 3:13, NW ). Hanahaka an’i Jehovah Andriamanitsika izay “vonona hamela heloka” isika, raha manao toy izany. — Salamo 86:5, NW; Mika 7:18, 19.