Ny Kôngregasiôna Kristianina — Loharanon’ny Fanampiana Manatanjaka

KIVY i Popi, vehivavy iray teo amin’ny fiandohan’ny faha-20 taonany, noho ny toe-javatra nampalahelo nisy ny fianakaviany. Tsy nisy mantsy ny fifampiresahana malalaka teo aminy sy ireo ray aman-dreniny.a Rehefa avy namboraka ny tao am-pony tamin’ny loholona kristianina iray sy ny vadiny izy, dia nanoratra tamin’izy ireo toy izao: “Misaotra anareo betsaka noho ny nakanareo fotoana hiresahana tamiko. Zava-dehibe tsy misy toy izany amiko ny fiahianareo. Isaorako i Jehovah nanome ahy olona azoko itokisana sy iresahana.”

Tafalatsaka tao anatin’ny toe-javatra sarotra i Toula, vehivavy iray maty vady vao haingana, nanan-janaka zatovo roa. Tojo fahasahiranana ara-pihetseham-po sy ara-bola nampikorontan-tsaina izy. Nahazo tsy tapaka ny fitsidihana nanatanjaka nataon’ny mpivady kristianina iray avy tao amin’ny kôngregasiôna izy sy ny zanany. Rehefa afaka niatrika tsara ilay toe-javatra nisy azy izy, dia nandefa carte ho an’io mpivady io, nilaza hoe: “Tsaroako amim-bavaka foana ianareo. Tadidiko fa nanampy sy nanohana ahy imbetsaka ianareo.”

Mahatsapa ho ‘vesaran’ny’ fanerena mihamitombon’ity tontolo ity ve ianao indraindray? (Matio 11:28). Nanimba ny fiainanao tamin-javatra mampalahelo ve ny “fotoana sy ny sampona”? (Mpitoriteny 9:11). Raha izany no izy, dia tsy irery ianao. Toy ny efa hitan’ny olona ory an’arivony maro anefa, dia afaka mahazo fanampiana sarobidy koa ianao, ao amin’ny kôngregasiôna kristianin’ny Vavolombelon’i Jehovah. Hitan’ny apostoly Paoly fa “fanampiana nanatanjaka” azy, tamin’ny fomba manokana, ny mpiray finoana sasantsasany, tamin’ny taonjato voalohany. (Kolosiana 4:10, 11, NW ). Afaka mahita izany koa ianao.

Fanohanana sy fanampiana

Ao amin’ny Soratra Grika Kristianina, ny teny hoe “kôngregasiôna” dia nadika avy amin’ilay teny grika hoe ek·kle·siʹa, izay midika hoe antokon’olona novorina. Tafiditra amin’io teny io ny hevitra momba ny firaisan-kina sy ny fifanohanana.

Ny kôngregasiôna kristianina dia manohana ny fahamarinana ao amin’ny Tenin’Andriamanitra, ary manambara ny vaovao tsaran’ilay Fanjakany. (1 Timoty 3:15; 1 Petera 2:9). Manome fanohanana sy fanampiana ara-panahy ho an’ireo olona mifanerasera aminy koa anefa ny kôngregasiôna. Ao no ahitanao namana maro be fitiavana sy be fiahiana ary vonona hikarakara. Vonona izy ireo hanampy sy hampionona ny hafa amin’ny fotoam-pihenjanana. — 2 Korintiana 7:5-7.

Nahita fiarovana sy filaminan-tsaina foana ireo mpivavaka tamin’i Jehovah, tao amin’ny kôngregasiônany. Nilaza ny mpanao salamo fa nahatsapa fifaliana sy filaminan-tsaina ny tenany teo anivon’ny vahoakan’Andriamanitra tafavory. (Salamo 27:4, 5; 55:14; 122:1). Toy izany koa ankehitriny, ny kôngregasiôna kristianina dia fitambarana mpiray finoana mifampandroso sy mifampahery. — Ohabolana 13:20; Romana 1:11, 12.

Ampianarina ireo mpikambana ao amin’ny kôngregasiôna mba “hanao soa amin’ny olona rehetra, indrindra fa amin’ny mpianakavin’ny finoana”. (Galatiana 6:10). Manosika azy ireo hifaneho fitiavan-drahalahy sy firaiketam-po miharo fitiavana, ny fampianarana miorina amin’ny Baiboly azony. (Romana 12:10; 1 Petera 3:8). Voatosika ho tsara fanahy sy ho tia fihavanana ary haneho fangoraham-po feno fitiavana, ireo mpirahalahy sy mpianadahy ara-panahy ao amin’ny kôngregasiôna. (Efesiana 4:3). Tsy mpivavaka fe mpivavaka fotsiny izy ireo, fa maneho fiahiana feno fitiavana ny hafa kosa. — Jakoba 1:27.

Noho izany, dia ao amin’ny kôngregasiôna no ahitan’ireo ampahorina rivo-piainana mafana toy ny ao amin’ny fianakaviana iray. (Marka 10:29, 30). Manatanjaka azy ireo ny fahatsapana ho anisan’ny antokon’olona iray tafaray akaiky sy be fitiavana. (Salamo 133:1-3). Amin’ny alalan’ny kôngregasiôna no anomezan’ “ny mpanompo mahatoky sy malina” ‘sakafo ara-panahy mahavelona amin’ny fotoana mety’. — Matio 24:45, NW.

Fanampiana avy amin’ireo mpiandraikitra be fitiavana

Ireo mpikambana ao amin’ny kôngregasiôna kristianina dia afaka manantena ny hahita mpiandry be fitiavana sy mahazo ny fihevitry ny hafa ary ampy fahaizana ao. Ireo no manome fanohanana sy fampaherezana ara-panahy. Toy ny ‘fierena amin’ny rivotra sy fialofana amin’ny ranonoram-baratra’ ny mpiandry manana izany toetra tsara izany. (Isaia 32:1, 2). Sady mikarakara ny vahoakan’Andriamanitra toy ny ondry no mampahery ny marary sy ny ketraka, ary miezaka hanarina ireo naniasia, ireo loholona voatendrin’ny fanahy, na mpiandraikitra. — Salamo 100:3; 1 Petera 5:2, 3.

Mazava ho azy fa tsy antokona mpanasitrana matihanina akory, ny fitambaran-doholon’ny kôngregasiôna, ka hahay hanasitrana ny tsy fahasalamana ara-batana sy ara-tsaina atrehin’ireo mpiray finoana aminy. Mbola “mila dokotera” ireo marary, eto amin’ity fandehan-javatra ity. (Lioka 5:31, NW ). Na izany aza, dia afaka manampy ireo sahirana eo amin’ny lafiny ara-panahy, ireny mpiandry ireny. (Jakoba 5:14, 15). Amin’ny fotoana rehetra azo anaovana izany, dia manao fandaharana koa ireo loholona mba hanomezana fanampiana hafa. — Jakoba 2:15, 16.

Iza moa no ao ambadik’izany fandaharana feno fitiavana izany? I Jehovah Andriamanitra mihitsy! Milazalaza an’i Jehovah ho nanambara toy izao, i Ezekiela mpaminany: ‘Izaho no hiahy ny ondriko sy handinidinika azy. Izaho no hamonjy azy avy any amin’izay rehetra efa nielezany. Izaho no hiandry ny ondriko, ary izaho no hampandry azy.’ Miahy koa ireo ondriny osa sy tsy ampy hery, Andriamanitra. — Ezekiela 34:11, 12, 15, 16.

Tena fanampiana amin’ny fotoana mety

Tena misy fanampiana azo raisina tokoa ve ao amin’ny kôngregasiôna kristianina? Eny, ary ireto ohatra manaraka ireto dia mampiseho mazava ireo tarehin-javatra isan-karazany nanomezan’ny kôngregasiôna fanampiana.

◆ Famoizana havan-tiana iray. Nodimandry ny vadin’i Anna taorian’ny aretina naharitra iray. “Nanomboka teo aho dia nahazo fitiavana mafana avy tamin’ny fianakavian’ny mpirahalahy kristianina”, hoy izy. “Nankahery ahy hatrany mba tsy ho ketraka tanteraka, ireo teny fanohanana sy fampaherezana feno hatsaram-panahy nataon’ireo mpiray finoana, tafiditra tamin’izany ireo famihinana avy tamin’ny fo. Ary isaorako an’i Jehovah izany. Ny fitiavan’izy ireo dia nahatonga ahy hahatsiaro ho voatohana tokoa, ka nitraka tamin’ny farany, ary voakarakara tamim-piraiketam-po.” Mety ho efa tao anatin’ny toe-javatra nahavoadona mafy toy izany koa ianao, dia ny famoizana havan-tiana iray tao amin’ny fahafatesana. Amin’ny fotoana toy ireny, dia afaka manome fampiononana sy fanohanana ara-pihetseham-po tena ilaina, ny mpikambana ao amin’ny kôngregasiôna.

◆ Aretina. Nitsidika tsy tapaka ireo kôngregasiôna tany Azia Afovoany, i Arthur, mpiandraikitra mpitety faritany avy any Polonina, mba hanatanjaka azy ireo teo amin’ny lafiny ara-panahy. Nandritra ny iray tamin’ireny fitsidihana ireny, dia narary mafy izy, ary nanahirana be vao sitrana. “Tiako ny hitantara aminareo ny fomba nikarakaran’ireo rahalahy sy anabavy tao [amin’ny tanàna iray any Kazakhstan] ahy”, hoy i Arthur, mahatsiaro izany amim-pankasitrahana lalina. “Nitondra vola sy sakafo ary fanafody ireo rahalahy sy anabavy, izay tsy fantatro akory ny ankamaroany, ary na dia ireo olona liana koa aza. (...) Nataon’izy ireny tamim-pifaliana lehibe izany.

“Alao sary an-tsaina ange ny fihetseham-poko, fony aho naharay valopy iray nisy vola sy izao taratasy izao e: ‘Ry rahalahy malala, mandefa fiarahabana mafana ho anao aho. Nomen’i Neny vola hividianana gilasy aho, nefa tapaka ny hevitro fa homeko anao ilay izy, mba hividianana fanafody. Mitomboa fahasalamana haingana e! Mila antsika mandritra ny fotoana maharitra i Jehovah. Mirary soa ho anao, ary ilazao tantara mahafinaritra sy ahitana fianarana indray izahay. Vova.’ ” Eny, araka ny aseho amin’io ohatra io, dia afaka manome fanampiana manatanjaka amin’ny fotoan’ny aretina, ny tanora sy ny antitra ao amin’ny kôngregasiôna. — Filipiana 2:25-29.

◆ Fahaketrahana. Naniry tamim-pahatsorana ny hanompo tamin’ny naha mpisava lalana, na mpitory ilay Fanjakana manontolo andro, i Teri. Voatery nitsahatra tsy nanao ny asan’ny mpisava lalana anefa izy, noho ny fahasahiranana. “Nahatsiaro ho meloka tsy nisy ohatra izany aho, noho ny nanandramako nanao io asa io, kanefa tsy naharitra herintaona tamin’izany akory”, hoy izy. Nino tamim-pahadisoana i Teri fa hoe amin’ny habetsahan’ny fanompoana atao ho an’i Jehovah ihany, no ahazoana sitraka aminy. (Ampifanohero amin’ny Marka 12:41-44.) Ketraka tanteraka izy ka nitokantokana. Tamin’izay anefa dia tonga ny fanampiana namelombelona avy tamin’ny kôngregasiôna.

Izao no tsaroan’i Teri: “Tsy nisalasala ny rahavavy mpisava lalana iray efa zokiolona tonga nanampy ahy, ary nihaino ahy namboraka ny tao am-poko. Rehefa nandao ny tokantranony aho, dia tsapako toy ny hoe nisy enta-mavesatra nesorina tamiko. Nanomboka teo, dia nanome fanampiana sarobidy io rahavavy mpisava lalana io sy ny vadiny, izay loholona ao amin’ny kôngregasiôna. Naharay antso an-telefaonina isan’andro avy tamin’izy ireo aho, nanontany vaovao. (...) Navelan’izy ireo handray anjara tamin’ny fianaram-pianakaviany aho indraindray, ka izany dia nandentika tao amiko ny maha zava-dehibe ny hiarahan’ny fianakaviana akaiky hatrany.”

Fahita ny hoe maro, na dia eo amin’ireo Kristianina vita fanoloran-tena aza, no manjary ketraka sy kivy ary manirery. Velom-pankasitrahana erỳ isika satria azo raisina ao amin’ny kôngregasiônan’Andriamanitra ny fanampiana feno fitiavana sy tsy misy fitiavan-tena! — 1 Tesaloniana 5:14.

◆ Loza sy voina. Aoka hatao hoe ianao no teo amin’ny toeran’ny fianakaviana iray efa-mianaka, izay namoy ny fananany rehetra fony kila forehitra ny tranony. Tsy ela izy ireo dia nahazo izay nantsoiny hoe “fampaherezana, izay hanohina ny fonay mandrakizay, ary nampiaiky volana anay ny amin’ny fitiavana marina misy eo anivon’ny vahoakan’i Jehovah”. Nanazava toy izao izy ireo: “Saika teo no ho eo ihany dia tototry ny antso an-telefaonina avy amin’ny fo, avy tamin’ireo rahalahy sy anabavinay ara-panahy izahay, ho fanehoana fanohanana sy fangorahana. Naneno tsy an-kijanona ny telefaonina. Nanohina ny fonay aoka izany ny fiahiana sy ny fitiavana marina nasehon’ny rehetra, hany ka nandrotsaka ranomasom-pankasitrahana izahay.”

Tsy ela ny loholon’ny kôngregasiôna dia nandamina antoko-mpiasa nisy rahalahy maromaro, izay nahatafatsangana trano iray vaovao ho an’io fianakaviana io, tao anatin’ny andro vitsivitsy. Nihiaka toy izao ny vehivavy mpiara-monina iray: “Andeha ange jereo e! Ny karazan’olona rehetra no miasa ao — lehilahy sy vehivavy, mainty hoditra sy Espaniola!” Porofo mazavan’ny fitiavan-drahalahy izany. — Jaona 13:35.

Nanome fitafiana sy sakafo ary vola ho an’ilay fianakaviana koa ireo namany kristianina. Nanazava toy izao ilay raim-pianakaviana: “Nandritra ny fotoan’ny Krismasy nanaovan’ny rehetra fanomezana ilay izy, nefa afaka milaza amim-pahatsorana izahay, fa tsy nisy olon-kafa na iza na iza nankafy ilay karazana fahalalahan-tanana marina sy lehibe nankafizinay.” Hoy koa izy ireo: “Mihamanjavozavo tsikelikely ny fahatsiarovana ilay afo, ka ireo fahatsiarovana mamy navelan’ireo asa feno hatsaram-panahy sy ireo namana tsara, no misolo izany. Miantefa any amin’i Jehovah, ilay Raintsika be fitiavana any an-danitra, ny fisaoranay satria manana fianakavian’ny mpirahalahy tafaray sy mahatalanjona toy izany izy etỳ an-tany, ary velom-pankasitrahana erỳ izahay fa anisan’izy io!”

Mazava ho azy, fa tsy azo atao foana no sady tsy azo antenaina foana ny fanaovan-javatra toy izany, isaky ny misy loza sahala amin’izany. Io ohatra io anefa dia tena mampiseho mazava ny fanohanana mety homen’ny kôngregasiôna.

Fahendrena avy any ambony

Maro no nahita loharano iray hafa izay manome fanampiana sy tanjaka ao amin’ny kôngregasiôna kristianina. Inona izany loharano izany? Ireo zavatra vita an-tsoratra nomanin’ny “mpanompo mahatoky sy malina”. Ny gazety Ny Tilikambo Fiambenana sy Mifohaza! no misongadina indrindra amin’ireo. Mba hanomezana torohevitra mampiseho fahatakarana hevi-dalina sy toromarika azo ampiharina, dia miantehitra voalohany indrindra amin’ny fahendren’Andriamanitra hita ao amin’ny Baiboly, ireo zavatra vita an-tsoratra ireo. (Salamo 119:105). Ho fanampin’ny fanazavana araka ny Soratra Masina, dia eo ireo fikarohana azo ianteherana sy itokiana, mahakasika foto-kevitra toy ny fahaketrahana ara-tsaina, ny fahasitranana amin’ny fitondrana ratsy, ny olana ara-tsosialy sy ara-toekarena isan-karazany, ireo zava-tsarotra atrehin’ny tanora, ary ireo fahasahiranana mampiavaka ny tany an-dalam-pandrosoana. Ambonin’ny zava-drehetra, ireo zavatra vita an-tsoratra ireo dia manohana ny fomba fiaina araka an’Andriamanitra, ho ny fomba fiaina tsara indrindra. — Isaia 30:20, 21.

Isan-taona, dia maharay taratasy fankasitrahana an’arivony maro ny Fikambanana Watch Tower. Mahakasika ny lahatsoratra iray momba ny famonoan-tena, tao amin’ny Mifohaza!, ohatra, dia nanoratra toy izao ny tovolahy iray any Rosia: “Mora ketraka aho, (...) ka imbetsaka no efa nieritreritra ny hamono tena. Io lahatsoratra io no nanatanjaka ny finoako fa hanampy ahy hiatrika ireo zava-manahirana mahazo ahy, Andriamanitra. Tiany ho velona aho. Isaorako izy noho ny fanohanana nomeny tamin’ny alalan’io lahatsoratra io.”

Raha toa hitanao ho mahery vaika loatra ka sarotra toherina ny onjam-pahasahiranana tsy miato eto amin’ity tontolo ity, dia afaka matoky ianao fa misy toeram-pialofana ao amin’ny kôngregasiôna kristianina. Eny tokoa, raha mampihena tsikelikely ny tanjakao ny tany ngazan’ity fandehan-javatra tsy manam-pitiavana ity, dia afaka mahita tany lonaka an’efitra mampahavitrika ianao, ao amin’ny fandaminan’i Jehovah. Rehefa nahazo izany fanohanana izany ianao, dia mety hitovy fihetseham-po amin’ny vehivavy kristianina iray izay niatrika tamim-pahombiazana ny aretina mafy nahazo ny vadiny, ka nanoratra toy izao: “Noho ny fanehoam-pitiavana sy ny fikarakarana anay, dia tsapako ho toy ny hoe nitondra anay teo amin’ny felatanany i Jehovah, teo am-pamakivakianay io fotoan-tsarotra io. Velom-pisaorana erỳ aho fa anisan’ny fandaminana kanton’i Jehovah!”

[Fanamarihana ambany pejy]

[Sary, pejy 26]

Afaka manome fanampiana manatanjaka ho an’ireo marary sy nidonam-pahoriana, ary ny hafa isika