Mitondra Soa ny Toetra Tsara
NANOMBOKA nianatra Baiboly tamin’ny Vavolombelon’i Jehovah ny vehivavy iray sy ny zanany telo mbola kely, any amin’ny nosy kely mitokana any amin’ny faritra atsimon’i Japon. Rehefa nahita izany ireo mpiara-monina taminy, izay fatra-panaraka ny fomban-drazana, dia nody tsy nahita an’io ramatoa io isaky ny nifanena taminy. Hoy ilay ramatoa: ‘Mbola nampalahelo ahy kokoa noho izany anefa, ny nahita ny vady aman-janako niavonavonan’izy ireo.’ Na izany aza, dia hoy izy tamin’ny zanany: “Tsy maintsy arahabaintsika foana ny mpiara-monina amintsika, mba ho faly i Jehovah.”—Matio 5:47, 48.
Nampianatra ny zanany izy tao an-trano, fa tokony hahalala fomba izy ireo, na dia ailikiliky ny olona aza. Namerimberina ilay fiarahabana izy ireo teny ambony fiara, isaky ny ho any amin’ilay ranomafana falehany. Rehefa tonga tany izy ireo, dia falifaly foana niteny hoe: “Konnichiwa!”, izany hoe “Manahoana!” Tsy sosotra izy mianakavy, fa niarahaba ny olona nifanena taminy foana, na dia tsy nisy niraika mihitsy aza. Nisy nahamarika anefa ny fahalalam-pomban’ireo ankizy.
Tamin’ny farany, dia nisy olona iray namaly hoe: “Konnichiwa”, ary nanao koa ny hafa. Saika ny olon-drehetra tao an-tanàna no namaly ny fiarahaban’izy ireo, nony afaka roa taona. Lasa nifampiarahaba koa ny mpiara-monina, sady nihasariaka kokoa. Naniry hanome valisoa ho an’ireo ankizy ny ben’ny tanàna lefitra, satria anisan’ny nahatonga izany fiovana izany izy ireo. Nilaza taminy anefa ny renin’izy ireo, fa izay tokony ho nataon’ny Kristianina ihany no nataon-janany. Nandray anjara tamin’ny fifaninanana nandaha-teny tao amin’ilay nosy, ny zanany lahy iray, tatỳ aoriana. Notantarainy tamin’izany ny fomba nampianaran-dreniny azy ireo hiarahaba olona amim-pahalalam-pomba, na manao ahoana na manao ahoana fihetsiny. Nahazo ny loka voalohany izy, sady navoaka tamin’ny gazety tao an-tanàna ilay lahateniny. Faly be izao ilay fianakaviana, satria nitondra vokatra tsara ny fanarahana ny toro lalana kristianina. Fanampin’izany, dia mora kokoa ny mitory ny vaovao tsara amin’ny olona sariaka.