Tena Nisy fa Tsy Angano i Noa sy ny Safodrano
MANIRY mafy fiainana tsara kokoa ve ianao? Tianao hihavana ve ny olon-drehetra, ary ho foana ny ady sy asan-jiolahy ary fampahoriana? Misy tantara iray mety hampahery anao àry. Efa fantatrao ihany angamba ilay izy. Inona izany? Ny tantaran’ilay olo-marina, atao hoe Noa. Nanao sambofiara izy talohan’ilay safodrano fahiny, ka voavonjy izy mianakavy. Ringana kosa ny ratsy fanahy.
Be mpahalala io tantara io. Hita ao amin’ny Baiboly ilay izy, ao amin’ny Genesisy toko faha-6 ka hatramin’ny faha-9. Voaresaka ao amin’ny Kôrana sy ao amin’ny angano maro be eran-tany koa ny Safodrano. Tena nisy àry ve izy io, sa angano natao handrisihana ny olona hanao ny tsara fotsiny? Efa ela be ny teolojianina sy ny mpahay siansa no niady hevitra momba izany. Milaza mazava tsara kosa ny Baiboly fa tena nisy izy io, fa tsy angano. Ireto misy porofo:
Resahin’ny Genesisy, ohatra, ny taona sy volana ary andro nanombohan’ny Safodrano. Voalaza ao koa ny fotoana sy toerana nipetrahan’ilay sambofiara taorian’izay. Tononina ao hoe oviana no ritra ny rano. Hita ao koa ny mombamomba ilay sambofiara, toy ny bikany sy ny refiny ary ny fitaovana nanamboarana azy. Tsy mazava tsara toy izany kosa ny ankamaroan’ny angano.
Misy tetirazana roa ahitana ny anaran’i Noa ao amin’ny Baiboly. Porofo koa izany fa tena nisy izy. (1 Tantara 1:4; Lioka 3:36) I Ezra sy Lioka no nanoratra azy ireo. Zatra namotopototra tsara izy roa lahy, vao nanoratra. Nilaza i Lioka fa anisan’ny razamben’i Jesosy Kristy i Noa.
Niresaka an’i Noa sy ny Safodrano koa i Isaia sy Ezekiela mpaminany, ary ny apostoly Paoly sy Petera.—Isaia 54:9; Ezekiela 14:14, 20; Hebreo 11:7; 1 Petera 3:19, 20; 2 Petera 2:5.
Hoy koa i Jesosy: “Toy ny tamin’ny andron’i Noa, dia ho toy izany koa amin’ny andron’ny Zanak’olona: Nihinana ny olona, nisotro, nampaka-bady sy navoaka hampakarina, mandra-pahatongan’ilay andro nidiran’i Noa tao amin’ny sambo fiara. Ary tonga ny safodrano ka nandringana azy rehetra.” (Lioka 17:26, 27) Raha tsy nisy ny Safodrano, dia tsy hisy koa ilay “andron’ny Zanak’olona” noresahin’i Jesosy.
Nilaza ny apostoly Petera fa tsy maintsy hisy ny “mpaneso”, ary tsy hiraharaha izay lazain’ny Baiboly izy ireo. Hoy i Petera: ‘Minia tsy mahalala izy ireo fa rava ilay tontolo [tamin’ny andron’i Noa] rehefa safotry ny rano.’ Tokony hinia tsy hahalala izany koa ve isika? Mazava ho azy fa tsia! Hoy ihany i Petera: ‘Tahirizina ho amin’ny afo ny lanitra sy ny tany ankehitriny ka atokana ho amin’ny andro fitsarana sy fandringanana an’ireo tsy matahotra an’Andriamanitra.’—2 Petera 3:3-7.
Mbola handringana ny ratsy fanahy indray àry Andriamanitra. Mbola hisy olona ho voavonjy anefa amin’izay. Raha manahaka an’i Noa isika, dia mety ho anisan’izy ireny, ka hiaina ao amin’ny tontolo iray tsara kokoa.