2 Fantaro ny Marina Momba An’Andriamanitra
“Koa mba hahazoan’izy ireo fiainana mandrakizay, dia ilainy ny mianatra hahalala anao, ilay hany tena Andriamanitra.”—Jaona 17:3.
OLANA: Misy milaza fa tsy misy Andriamanitra. Ao koa ny mihevitra fa hery fotsiny izy, ary eny rehetra eny no misy azy. Na dia ny olona mino azy aza, dia tsy mitovy hevitra fa samy manana ny heviny momba an’Andriamanitra sy ny toetrany.
VAHAOLANA: Hahalala an’Andriamanitra ianao, raha mandinika tsara ny zavatra nataony. Hoy ny apostoly Paoly momba Azy: “Ny toetrany tsy hita maso, izany hoe ny heriny mandrakizay sy ny maha Andriamanitra azy, dia hita mazava hatramin’ny namoronana izao tontolo izao, satria hita amin’ny zavatra nataony.” (Romanina 1:20) Hiana-javatra betsaka momba ny fahendren’ny Mpamorona sy ny heriny ianao, raha mandinika tsara ny zavaboary.—Salamo 104:24; Isaia 40:26.
Mila mandalina ny Baiboly koa isika tsirairay, raha te hahalala ny tena toetran’Andriamanitra. Tsy ny hafa no tokony havelanao hanapa-kevitra ny amin’izay inoanao. Araho kosa ny torohevitry ny Baiboly hoe: “Aza manaiky intsony hovolavolain’ity tontolo ity, fa miovà ka havaozy ny sainareo, mba handinihanareo tsara ka hamantaranareo ny sitrapon’Andriamanitra, izay tsara sady ankasitrahana no tonga lafatra.” (Romanina 12:2) Eritrereto, ohatra, ireto zavatra lazain’ny Baiboly momba an’Andriamanitra ireto:
Manana anarana izy. Miverina inarivony io anarany io ao amin’ny Baiboly tany am-boalohany. Milaza, ohatra, ny Salamo 83:18 hoe: “Ary aoka ho fantany fa Hianao irery ihany, Izay atao hoe Jehovah, no Ilay Avo Indrindra ambonin’ny tany rehetra.”—Fandikan-teny Protestanta.
Manana fihetseham-po i Jehovah Andriamanitra, ary misy vokany eo aminy ny ataon’ny olona. Tsy niraharaha ny torohevitra nomeny ny Israelita indraindray, taorian’ny nanafahany azy ireo tsy ho andevo tany Ejipta. “Nampalahelo” sy “nampahory an’Ilay Masin’ny Israely” ny fikomian’izy ireo sy ny zava-dratsy hafa nataony.—Salamo 78:40, 41.
Miahy antsika tsirairay izy. Hoy i Jesosy tamin’ny mpianany: “Tsy vola madinika kely vidy ve no ivarotana fody roa? Tsy hisy ho latsaka amin’ny tany anefa ireny na iray aza, ka tsy ho fantatry ny Rainareo. Ary na ny volon-dohanareo aza dia voaisa avokoa. Koa aza matahotra, fa sarobidy noho ny fody maro ianareo.”—Matio 10:29-31.
Tsy misy firazanana na kolontsaina tiany kokoa noho ny hafa. Nilaza tamin’ny Grika tao Atena ny apostoly Paoly fa ‘avy tamin’ny olona anankiray no nanaovan’Andriamanitra ny olona any amin’ny firenena rehetra mba honina manerana ny tany manontolo.’ Nilaza koa izy fa ‘tsy lavitra antsika tsirairay Andriamanitra.’ (Asan’ny Apostoly 17:26, 27) Hoy koa ny apostoly Petera: “Tsy mizaha tavan’olona Andriamanitra, fa amin’ny firenena rehetra, izay olona matahotra azy ka manao ny marina no ankasitrahany.”—Asan’ny Apostoly 10:34, 35.
VALISOA: “Mafana fo ho an’Andriamanitra” ny olona sasany, “saingy tsy araka ny fahalalana marina tsara.” (Romanina 10:2) Tsy ho voafitaka kosa ianao, sady ho afaka ‘hanatona an’Andriamanitra’, raha mahalala izay tena lazain’ny Baiboly momba Azy.—Jakoba 4:8.
Misy fanazavana fanampiny ao amin’ny boky Inona Marina no Ampianarin’ny Baiboly?,a ao amin’ny toko voalohany hoe “Inona no Marina Momba An’Andriamanitra?”
[Fanamarihana ambany pejy]
a Navoakan’ny Vavolombelon’i Jehovah.
[Sary, pejy 6]
Hahalala an’Andriamanitra ianao, raha mandinika tsara ny zavatra nataony