Naharihary Ilay Mpitondra An’izao Tontolo Izao

HOY i Jesosy indray mandeha: ‘Horoahina ilay mpitondra an’izao tontolo izao.’ Nilaza koa izy tatỳ aoriana fa ‘tsy manana fahefana aminy ilay mpitondra an’izao tontolo izao’ ary “efa voatsara ilay mpitondra an’izao tontolo izao.” (Jaona 12:31; 14:30; 16:11) Iza no tian’i Jesosy horesahina?

Mazava fa tsy i Jehovah Andriamanitra Rainy no tiany horesahina, rehefa dinihina ny teniny momba “ilay mpitondra an’izao tontolo izao.” Iza àry izy io? Ahoana no ‘handroahana’ sy ‘hitsarana’ azy?

Mampiharihary ny tenany “ilay mpitondra an’izao tontolo izao”

Mirehareha be amin’ny fahefany ny jiolahy kalazalahy. Hoatran’izany koa no nataon’ny Devoly tamin’izy naka fanahy an’i Jesosy, Zanak’Andriamanitra. Nasehony azy ny “fanjakana rehetra”, ary hoy izy: “Homeko anao izao fahefana rehetra izao sy ny voninahiny, fa efa natolotra ahy izany ka izay tiako homena azy no omeko azy. Koa raha miankohoka indray mandeha eto anatrehako ianao, dia ho anao manontolo izany.”—Lioka 4:5-7.

Raha marina ilay hoe ny ratsy ao anatin’ny olombelona fotsiny ny Devoly, iza no naka fanahy an’i Jesosy? Eritreri-dratsy tao anatiny fotsiny ve no naka fanahy azy? Sa nikorontan-tsaina izy taorian’ny batisany? Raha izany, nahoana no lazaina fa “tsy misy ota ao aminy”? (1 Jaona 3:5) Tsy nolavin’i Jesosy mihitsy fa manana fahefana amin’ny olombelona ny Devoly. Vao mainka aza izy nanamafy an’izany rehefa niantso ny Devoly hoe “mpitondra an’izao tontolo izao” sy “mpamono olona” ary “mpandainga.”—Jaona 14:30; 8:44.

Tokotokony ho 60 taona taorian’ilay fakam-panahy nahazo an’i Kristy, dia nampahatsiahivin’ny apostoly Jaona an’ireo Kristianina fa manan-kery lehibe ny Devoly. Hoy izy: ‘Eo ambany fahefan’ilay ratsy izao tontolo izao manontolo.’ Nilaza koa i Jaona fa “mamitaka ny tany rehetra misy mponina” izy io. (1 Jaona 5:19; Apokalypsy 12:9) Mazava àry fa misy anjely iray antsoin’ny Baiboly hoe “mpitondra an’izao tontolo izao.” Hatraiza anefa ny fahefana ananany amin’ny olombelona?

Nizara fahefana ilay mpitondra an’izao tontolo izao

Nanoratra momba ny ady ataon’ny Kristianina ny apostoly Paoly. Nolazainy tsara hoe iza ilay fahavalon’izy ireo lehibe indrindra. Hoy izy: “Isika mantsy tsy mitolona amin’ny nofo aman-dra, fa amin’ireo fanjakana sy fahefana sy mpanjakan’izao tontolo anaty haizina izao, ary amin’ireo fanahy ratsy any amin’ny faritry ny lanitra.” (Efesianina 6:12) Tsy ady “amin’ny nofo aman-dra” àry izy io, fa amin’ny “fanahy ratsy.”

Tsy ny ratsy ao anatin’ny olona mihitsy ilay hoe “fanahy ratsy”, fa anjely ratsy matanjaka. Mampihatra ny fahefany amin’ny alalan’ny anjely hafa nikomy àry ny Devoly. “Nandao ny fonenana sahaza azy” izy ireo.—Joda 6.

Asehon’ny bokin’i Daniela fa efa hatramin’ny taloha ireo ‘mpanjakan’izao tontolo izao’ ireo no nampihatra ny fahefany. Tafaverina tany Jerosalema avy tany an-tsesitany tany Babylona ny Jiosy, tamin’ny 537 Talohan’i Kristy (T.K.). Tena nanahy momba azy ireo i Daniela mpaminany, ka nivavaka ho azy ireo nandritra ny telo herinandro. Naniraka anjely Andriamanitra tamin’izy vao nivavaka, mba hanome toky azy. Tara be anefa ilay anjely vao tonga tany aminy, ka nanazava ny anton’izany hoe: ‘Nanohitra ahy iraika amby roapolo andro ny andrianan’ny fanjakan’i Persa.’—Daniela 10:2, 13. 

Iza ilay ‘andrianan’i Persa’? Tsy i Kyrosy mpanjaka persianina mihitsy aloha, satria tia an’i Daniela sy ny vahoakany izy io. Sady mpanjaka iray monja ve dia hahatohitra anjely iray ao anatin’ny telo herinandro, nefa anjely iray aza nahafaty miaramila matanjaka 185 000 tao anatin’ny indray alina monja? (Isaia 37:36) Tsy maintsy ho iraky ny Devoly àry io ‘andrianan’i Persa’ io, izany hoe demonia iray nomeny fahefana tao amin’ny faritry ny Fanjakan’i Persa. Nilaza ilay anjelin’Andriamanitra avy eo, fa mbola hiady amin’ny “andrianan’i Persa” sy demonia hafa antsoina hoe “andrianan’i Gresy” izy.—Daniela 10:20.

Inona no azontsika ianarana avy amin’izany? Tena misy ny ‘mpanjakan’izao tontolo izao’, dia ny demonia izay samy manana ny anjara fahefany, ka i Satana Devoly no lehiben’izy ireo. Inona anefa no tanjon’izy ireo hatramin’izay ka hatramin’izao?

Mampiseho ny maha izy azy ilay Mpitondra an’izao tontolo izao

Tantarain’i Jaona ao amin’ny Apokalypsy fa resin’i Mikaela arkanjely ny Devoly sy ny demoniany, ary natsipy tetỳ an-tany. Inona no vokatr’izany? Hoy ny Baiboly: ‘Loza ho an’ny tany, fa nidina any aminareo ny Devoly sady tezitra mafy, satria fantany fa fohy ny fotoana ananany.’—Apokalypsy 12:9, 12.

Ahoana no ampisehoan’ny Devoly fa tezitra mafy izy? Tsy misaina afa-tsy ny ‘hanjaka na handrava’ ny jiolahy romotra. Toy izany koa ny Devoly sy ny demonia. Fantany fa efa kely sisa dia ho ringana izy ireo, ka manao izay ho afany mba hahatonga ny tany sy ny olona rehetra ho ringana miaraka aminy. Ny Devoly no mifehy ny resaka varotra, izay anisan’ny tapany lehibe indrindra eo amin’ny fiainan’ny olona. Ampiasainy izy io mba hahatonga ny olona tsy hahafehy tena mihitsy fa hividy zavatra foana. Mihena àry ny harena voajanahary satria lany anamboarana zavatra amidy. Lasa simba koa ny tontolo iainana, ka tandindomin-doza ny ain’ny olombelona.—Apokalypsy 11:18; 18:11-17.

Efa hatrany am-piandohan’ny tantaran’ny olombelona no hita fa tia fahefana ny Devoly, ka mampiasa ny politika sy ny fivavahana koa izy amin’izany. Antsoina hoe bibidia ny hery ara-politika ao amin’ny Apokalypsy, ary ny Devoly no nanome “fahefana lehibe” azy io. Hazavainy ao fa miara-miasa tsy misy henatra ny politika sy ny fivavahana ka toy ny mijangajanga. (Apokalypsy 13:2; 17:1, 2) Eritrereto koa ny fampahoriana, fanandevozana, ady, ary adim-poko nisy nandritra ny taonjato maro izay namoizana ain’olona maro be. Iza no sahy hilaza fa vokatry ny ataon’olombelona fotsiny ireny zavatra mahatsiravina sy mampihorohoro ireny? Sa ve misy anjely ratsy mahatonga an’ireny?

Ahariharin’ny Baiboly fa ny Devoly ilay anjely mifehy an’ireo fitondran’olombelona. Manahaka an’io anjely io sy ilay toe-tsainy hoe ‘anjakao na ravao’ ny ankamaroan’ny olona, na tsapany izany na tsia. Rahoviana anefa ny olombelona vao tsy hofehezin’ny Devoly intsony?

Efa miala aina ny Devoly

Hita tamin’ny fanompoan’i Kristy teto an-tany fa ho ringana tsy ho ela ny Devoly sy ny demoniany. Hoy i Jesosy rehefa notantarain’ny mpianany fa nahavita nandroaka demonia izy ireo: “Hitako fa efa nazera toy ny tselatra avy any an-danitra i Satana.” (Lioka 10:18) Asehon’ireo teniny ireo fa efa faly sahady izy tamin’izany satria handresy an’ilay mpitondra an’izao tontolo izao, rehefa hiverina ho Mikaela arkanjely any an-danitra. (Apokalypsy 12:7-9) Hita avy tamin’ny fandinihana tsara ny faminanian’ny Baiboly fa tamin’ny 1914 na taoriana kelin’izay io fandresena io no nitranga.a

Fantatry ny Devoly, nanomboka tamin’io daty io, fa efa kely sisa dia ho ringana izy. Marina fa ‘eo ambany fahefany izao tontolo izao manontolo.’ Olona an-tapitrisany anefa ankehitriny no tsy manaiky hofeheziny. Nampahafantarin’ny Baiboly azy ireo mantsy ny tena maha izy azy sy ny teti-dratsiny. (2 Korintianina 2:11) Mahavelom-panantenana azy ireo ity tenin’i Paoly ity: “Tsy ho ela ilay Andriamanitry ny fiadanana dia hanorotoro an’i Satana eo ambany tongotrareo.”b—Romanina 16:20.

Kely sisa dia ho faty ny Devoly! Hovan’ny olo-marina ho paradisa ny tany rehefa hitondra i Kristy. Tsy hisy intsony ny heloka bevava sy ny fankahalana ary ny fitiavan-karena. Hoy ny Baiboly: ‘Tsy hotsarovana intsony ny zavatra taloha.’ (Isaia 65:17) Ho faly tokoa izay rehetra afaka amin’ilay mpitondra an’izao tontolo izao sy ny fahefany!

[Fanamarihana ambany pejy]

[Teny notsongaina, pejy 9]

Hovan’ny olo-marina ho paradisa ny tany rehefa hitondra i Kristy