Manova Olona ny Baiboly
INONA no nahatonga ny vehivavy iray hiverina tamin’ny fivavahana nitaizana azy? Avelao izy no hitantara.
“Tena misy dikany izao ny fiainako.”—LISA ANDRÉ
TERAKA: 1986
FIRENENA: LUXEMBOURG
FIAINANY TALOHA: ZAZA NADITRA
NY FIAINAKO TALOHA: Lehibe tao Bertrange aho. Tanàna kely madio sy milamina ary manankarena, akaikin’i Luxembourg, izy io. Izaho no zandriny indrindra aminay dimy mianadahy. Vavolombelon’i Jehovah i Dada sy Neny, ary niezaka mafy izy ireo mba hampianatra anay hanana toetra tsara.
Lasa nisalasala be momba ny zavatra ampianarin’ny Vavolombelon’i Jehovah aho rehefa nihalehibe. Tsy noraharahaiko izany tamin’ny voalohany. Nihanalemy finoana anefa aho. Nanao izay azony natao i Dada sy Neny mba hanampiana ahy saingy tsy noraharahaiko izany. Nifanerasera tamin’ny tanora tsy dia manaja fahefana aho, ary tsy fantatr’i Dada sy Neny izany. Hoatran’ny tsy mba nisy nifehifehy ireo tanora ireo, ka te hitovy amin-dry zareo aho. Nanao fety foana izahay, naloto fitondran-tena, nidoroka zava-mahadomelina, ary niboboka toaka. Faly erỳ aho tamin’ny voalohany niaraka tamin’izy ireo, satria toa nahay nankafy fiainana izy ireo.
Tsy tena sambatra anefa aho, raha ny marina. Tsapako fa tsy nisy dikany ny fiainako. Tsy nivaky loha mihitsy ireo namako. Izaho kosa anefa sahiran-tsaina tamin’ny zavatra sasany, toy ny tsy rariny manjaka eran-tany. Vao mainka kivy aho rehefa nandeha ny fotoana.
NY NANOVAN’NY BAIBOLY NY FIAINAKO: Tena kivy be aho indray andro, tamin’izaho 17 taona. Tsikaritr’i Neny izany ka nilaza tamiko izy mba hianatra Baiboly indray. Nasainy nandinika ny fampianarana tao aho, ary hanapa-kevitra avy eo raha hanaraka an’izany na tsia. Izany resaka tsy an-kifonofono nifanaovanay izany no tena nampiova ahy. Nanaiky hiara-hianatra Baiboly tamin’i Caroline zokiko sy Akif vadiny aho. Efa lehibe i Akif vao lasa Vavolombelon’i Jehovah. Nieritreritra àry aho hoe afaka mifampiresaka tsara aminy, sady tena nilaiko izany.
Fantatro fa tsy nety ny fomba fiainako. Nieritreritra anefa aho taloha hoe afaka manao izay tiako. Rehefa nianatra Baiboly aho, dia fantatro fa misy vokany amin’i Jehovah izay ataoko. (Salamo 78:40, 41; Ohabolana 27:11) Takatro koa fa misy vokany amin’ny hafa izany.
Rehefa nianatra bebe kokoa aho, dia nahita fa misy hevitra mampiaiky sy mitombina tsara manaporofo hoe Tenin’Andriamanitra tokoa ny Baiboly. Nianarako, ohatra, fa faminaniana maro no efa tanteraka, ary mahavariana fa tsy nisy nipika na dia ny tsipiriany kely tamin’izy ireny aza. Lasa tsy nisalasala intsony àry aho.
Miasa an-tsitrapo any amin’ny biraon’ny sampan’ny Vavolombelon’i Jehovah any Alemaina ny zokiko lahy. Nitsidika azy tany izaho sy Dada ary Neny, herintaona teo ho eo taorian’ny nianarako Baiboly. Nihetsi-po be aho rehefa nahita fa tena sambatra izy. Izany fahasambarana izany mihitsy no notadiaviko! Nampiaiky ahy koa ny nahita an’ireo Vavolombelona hafa niasa an-tsitrapo tao. Tena tsy toa an’ireo namako nanao ny tsy marina sy tia nanao ratsy izy ireo. Nivavaka tamin’i Jehovah tamin’ny foko manontolo aho tsy ela taorian’izay, ka nampanantena fa hanompo azy mandra-pahafatiko. Natao batisa aho tamin’izaho 19 taona.
NY SOA NORAISIKO: Tena misy dikany izao ny fiainako. Faly aho mampianatra ny olona momba an’i Jehovah sy ny fampanantenany. Sambatra koa ny fianakaviako satria tsy miady saina be momba ahy intsony.
Fantatro fa tsy nety ny nataoko taloha, kanefa miezaka aho mba tsy hieritreritra be an’izany. Tadidiko kosa fa mamela heloka i Jehovah ary tia sy mikarakara ahy. Miaiky tanteraka aho fa marina ny voalazan’ny Ohabolana 10:22 hoe: “Ny fitahian’i Jehovah no mampanan-karena ary tsy ampiany fahoriana izany.”
[Teny notsongaina, pejy 12]
“Nanao fety foana izahay, naloto fitondran-tena, nidoroka zava-mahadomelina, ary niboboka toaka”
[Teny notsongaina, pejy 13]
“Fantatro fa tsy nety ny nataoko taloha, kanefa miezaka aho mba tsy hieritreritra be an’izany”