Manontany ny Mpamaky

Ho Potika ve ny Tany Amin’ny 2012?

▪ “Olona maro no mifindra any amin’ny tanàna iray any Frantsa. ... Mino izy ireo fa amin’ny 21 Desambra 2012 ny fara andro, satria amin’io no mifarana ilay kalandrien’ny foko maya fahiny izay misy fe-potoana maharitra 5 125 taona.”—Vaovaon’ny BBC.

Milaza ireo mpitondra fivavahana, sy ireo mihevi-tena ho mpahay siansa, ary ireo mpanambara ny hoavy, fa ho potika ny tany rehefa tonga ny fara andro. Diso anefa izany. Tsy ho potika ny tany amin’ny 2012, ary tsy amin’io taona io ihany fa mandrakizay mihitsy.

Hoy ny Baiboly: “Lasa ny taranaka iray, ary mandimby ny taranaka iray, fa ny tany kosa maharitra mandrakizay.” (Mpitoriteny 1:4) Hoy koa ny Isaia 45:18: “Izao no nolazain’i Jehovah, ... ilay Mpamolavola ny tany sy Mpanao azy, Ilay nanao azy ho mafy orina, ary tsy hoe tsy misy antony ny namoronany azy fa nataony honenana: ‘Izaho no Jehovah, ary tsy misy hafa.’ ”

Aoka atao hoe nisy ray be fitiavana nandany fotoana be nanamboarana kalesy ho an’ny zanany. Vao avy nomeny an-janany ve ilay izy dia hosimbainy avy eo? Ratsy fanahy izy raha manao an’izany. Mba hampifaliana ny olombelona noforoniny koa no tena antony nanaovan’Andriamanitra ny tany. Hoy izy tamin’i Adama sy Eva, mpivady voalohany: “Manàna taranaka, ary mihabetsaha ka mamenoa ny tany. Anjakao ny tany.” Milaza koa ny Baiboly hoe: “Nijery an’izay rehetra nataony Andriamanitra, ka hitany fa tena tsara izany.” (Genesisy 1:27, 28, 31) Tsy niova ny fikasan’Andriamanitra ho an’ny tany. Tsy havelany ho potika izy io. Hoy izy momba ny fampanantenany rehetra: “Tsy hiverim-potsiny atỳ amiko ny teniko, fa hanatanteraka izay sitrako ary hahomby amin’izay andefasako azy.”—Isaia 55:11.

Mikasa ‘handringana izay manimba ny tany’ anefa i Jehovah. (Apokalypsy 11:18) Hoy izy ao amin’ny Teniny: “Ny olo-mahitsy no honina amin’ny tany, ary ny tsy manan-tsiny ihany no ho sisa tavela eo. Fa ny ratsy fanahy kosa ho ringana tsy ho amin’ny tany, ary ny mpivadika hesorina tsy ho amin’ny tany.”—Ohabolana 2:21, 22.

Rahoviana izany no hitranga? Hoy i Jesosy: “Tsy misy mahalala ny amin’izany andro na ora izany, na ny anjely any an-danitra, na ny Zanaka, afa-tsy ny Ray ihany.” (Marka 13:32) Tsy maminavina ny fotoana handringanan’Andriamanitra ny ratsy fanahy ny Vavolombelon’i Jehovah. Marina fa fantatr’izy ireo ny “famantarana” ny farany, ary mino izy ireo fa miaina amin’ny “andro farany” resahin’ny Baiboly isika izao. Tsy fantatr’izy ireo anefa ny fotoana tena hahatongavan’ny “farany.” (Marka 13:4-8, 33; 2 Timoty 3:1) Amin’izy ireo kosa, dia ny Ray any an-danitra sy ny Zanany ihany no tokony hahafantatra an’izany.

Mandra-pahatongan’izany anefa, dia mandany fotoana sy hery ny Vavolombelon’i Jehovah mba hitoriana ny vaovao tsaran’ny Fanjakan’Andriamanitra. Izy io mantsy no hitondra sy hanova ny tany ho paradisa hanjakan’ny fiadanana, ary izany paradisa izany no ‘holovain’ny olo-marina, ka honenany mandrakizay.’—Salamo 37:29.

[Sary nahazoan-dalana, pejy 10]

Image Science and Analysis Laboratory, NASA-Johnson Space Center