Tianao ve ny Fianaranao Baiboly Raha Misy Vokany sy Mahafinaritra Kokoa?

Josoa mamaky ny Lalàna; ny mandan’i Jeriko mirodana ary ny tranon’i Rahaba sisa no tsy rava; Josoa manandra-tanana mivavaka

VOATENDRY hitarika ny firenen’Israely ho any amin’ny Tany Nampanantenaina i Josoa. Tsy maintsy hiatrika olana goavana izy amin’izany. Nanome toky azy anefa i Jehovah hoe ho vitany izany. Hoy izy taminy: ‘Mahereza sy matanjaha, ary tandremo tsara ny lalàko. Vakio sy saintsaino andro aman’alina izany. Amin’izay ianao dia hitandrina tsara izay rehetra voasoratra ao, ka hahomby izay hataonao ary hanao zavatra amim-pahendrena ianao.’—Jos. 1:7, 8.

Miatrika olana goavana maro koa isika amin’izao “fotoan-tsarotra tsy mora setraina” izao. (2 Tim. 3:1) Raha te hahomby hoatran’i Josoa isika, dia mila manaraka ny torohevitra nomen’i Jehovah azy. Mila mamaky Baiboly tsy tapaka isika, ary mampihatra tsara ny toro lalana voalaza ao rehefa manana olana.

Mety ho tsy dia mahay mianatra anefa ny sasany amintsika, na tsy tia mianatra. Na izany aza, dia tena ilaina ny mianatra Baiboly. Jereo àry ilay hoe “Andramo Ireto.” Misy soso-kevitra azonao arahina ao mba hahatonga ny fianaranao hisy vokany sy hahafinaritra kokoa.

Hoy ny mpanao salamo: “Ampandehano eo amin’ny lalan’ny didinao aho, fa mahafinaritra ahy izany.” (Sal. 119:35) Tena mety hahafinaritra be anao koa ny mianatra ny Tenin’Andriamanitra. Hahita hevitra be dia be mahafinaritra toy ny vatosoa ianao raha mandalina azy io.

Marina fa tsy hitarika firenena hoatran’i Josoa ianao. Mba manana olana koa anefa ianao. Tahafo àry i Josoa ka ianaro ny Tenin’Andriamanitra. Araho izay voalaza ao satria natao hahasoa anao. Hahomby koa izay hataonao amin’izay, ary hanao zavatra amim-pahendrena ianao.

ANDRAMO IRETO

Mivavaha alohan’ny hianarana. Hevitr’ilay Andriamanitra Mahery Indrindra no ao amin’ny Baiboly, ary natao hahasoa anao. Rehefa hamaky azy io àry ianao, dia mivavaha aminy mba hanampiany anao hahazo sy hahatadidy ary hampihatra an’izay hovakinao.—Ezra 7:10.
Eritrereto ireto fanontaniana ireto rehefa mamaky Baiboly ianao na mamaky boky sy gazety: ‘Inona no ianarako eto momba an’i Jehovah? Inona no ifandraisan’ity zavatra vakiko ity amin’ny foto-kevitry ny Baiboly? Ahoana no azoko ampiasana an’ireto hevitra ireto mba hanampiana olona?’
Saintsaino izay ianaranao. Ajanòny kely ny vakiteninao, dia eritrereto izao: ‘Inona no tsapako rehefa avy namaky an’ity aho, ary nahoana? Inona no ifandraisan’izy ity amin’ny zavatra efa niainako sy ny zavatra mahazo ahy izao ary ny zavatra mety hitranga amiko? Ahoana no azoko ampiharana an’ireto torohevitra sy toro lalan’ny Baiboly ireto?’ (Joba 23:5; Sal. 49:3) Hainao ve ny manazava hoe nahoana i Jehovah no mandrara ny vahoakany tsy hanao zavatra sasany? Saintsaino koa hoe inona no mety ho nitranga, raha tsy nanao an’ilay zavatra nataony ilay olona ao amin’ilay andinin-teny na lahatsoratra vakinao.—Deot. 32:28, 29.
Alao sary an-tsaina izay vakinao. Inona, ohatra, no mety ho nitranga rehefa nivarotra an’i Josefa tamin’ny Ismaelita ny rahalahiny? (Gen. 37:18-28) Inona no hitanao sy henonao? Inona no mety ho fofona teo amin’ny manodidina teo? Ataovy hoatran’ny hoe ianao mihitsy ilay olona resahina ao, dia eritrereto hoe inona no tao an-tsainy sy tao am-pony. Hazava kokoa aminao amin’izay ny zavatra ianaranao ka handray soa bebe kokoa ianao.
Ampiasao ireo fitaovana fianarana omen’ny fandaminana, amin’izay hahafinaritra anao ny manao fikarohana. Ianaro tsara ny fomba fampiasa an’ireo fitaovana misy amin’ny fiteninao, na vita pirinty izany na amin’ny endriny elektronika. Aza misalasala miangavy olona hanampy anao hahay hampiasa azy ireny. Hanampy anao hahita fanazavana foto-kevitra sy andinin-teny maro, ohatra, ny Fanondroana Bokin’ny Vavolombelon’i Jehovah na ny Fitaovana Fikarohana ho An’ny Vavolombelon’i Jehovah. Ampiasao koa ny Fanazavana Fanampiny ao amin’ny Soratra Masina—Fandikan-tenin’ny Tontolo Vaovao, raha misy amin’ny fiteny hainao. Misy tsipiriany tena ilaina momba ny toerana samihafa, daty, lanja sy refy, na zavatra hafa ao.
Fintino ny hevi-dehibe. Hanampy anao hahatadidy an’izay nianaranao izany. Vao mainka tsara aza raha resahinao amin’olona ilay izy. Mety ho azonao resahina eny amin’ny fanompoana, ohatra, ny zavatra sasany. Hotadidinao tsara ny hevi-dehibe raha manao an’izany ianao, sady handray soa koa ny olon-kafa.