Valin’ny Fanontanianareo

◼ Rahoviana ny olona iray no azo omena ny boky Voalamina mba Hanatanteraka ny Fanompoantsika? Ary rahoviana ny anti-panahy no tokony hanao fandaharana mba hiara-midinika ireo fanontaniana amin’ny olona maniry hatao batisa?

Misy fanazavana momba izany eo amin’ny pejy 172-174, ao amin’ny boky Ny Fanompoantsika, eo ambanin’ilay hoe “Fanamarihana ho An’ireo Loholona ao Amin’ny Kongregasiona.” Hazavaina ao fa rehefa mankatò ny fitsipika marin’i Jehovah ny olona iray, sy mivory tsy tapaka ary mandray anjara tsara amin’ny fanompoana, dia azony atao ny milaza amin’ny anti-panahy ny faniriany hatao batisa. Azo omena ilay boky Ny Fanompoantsika izy amin’izay.

Rehefa mahazo io boky io ny mpitory tsy vita batisa, dia tokony handinika ireo fanontaniana ho an’ireo maniry hatao batisa. Hitany manomboka eo amin’ny pejy 174 izany. Tokony hiezaka hahatakatra ny fomba hampiharana ireo andinin-teny voasoratra sy voatonona izy. Hisy anti-panahy hiara-midinika aminy, rehefa voaomany daholo ireo fanontaniana. Ny mpiandraikitra mpitantan-draharaha no handamina izany.

Tsy tokony hatao maimaika ny fiomanana ho amin’ny batisa. Tokony holazain’ilay olona amin’ny anti-panahy aloha be àry ny fotoana iriny hanaovana batisa azy. Azo atao ilay fiaraha-midinika, na dia mbola tsy fantatra aza ny datin’ny fivoriambe. Tokony haharaka tsara ny fandrosoana ara-panahin’ny olona ampianariny Baiboly ny mpitory. Ho fantany amin’izay raha efa vonona hanolo-tena ilay olona, ka hampahafantariny azy izay tokony hatao mba hiomanany ho amin’ny batisa.

Mety ho hitan’ireo anti-panahy niara-nidinika tamin’ilay olona, fa mbola tokony hanao fandrosoana bebe kokoa izy, vao miroso amin’io dingana lehibe io. Angamba mbola mila mampitombo fahalalana na manatsara ny fomba anambarany ny finoany izy. (1 Pet 3:15) Na mbola tokony ho za-draharaha kokoa eo amin’ny fitoriana, na mbola tsy mahafeno fepetra mihitsy. (Jereo ny Asan’ny Apostoly 8:36.) Tsara raha lazain’ny anti-panahy amin’ilay olona ny fandrosoana mbola tokony hataony. Raha mila fanampiana manokana izy mba hahafenoany fepetra ho amin’ny batisa, dia tokony hanao fandaharana ho amin’izany ny anti-panahy.