Aoka hozaraintsika amin’ny hafa ny harena ara-panahy ananantsika
1 Toa an’i Mosesy nahatoky, ny Vavolombelon’i Jehovah dia mahafantatra fa tsy misy itoviana amin’ny harena ara-panahy mihitsy ny harena ara-nofon’izao tontolo izao ankehitriny (Heb. 11:26). Ny trano na ny fiarakodia na ny fananana ara-nofo hafa no azo vidim-bola fa tsy ny fiainana na ny fiadanan-tsaina na ny fankasitrahan’i Jehovah Andriamanitra sy ny fitahiany.
2 Ny fahalalana sy ny fahaizana ny Tenin’Andriamanitra sy ny fikasany: izany no tena harena ara-panahy (Kol. 2:3). Dieny izao izany harena tsy manam-paharoa izany dia afaka mitondra fahasambarana marina ary fanantenana mafy orina ho an’ny hoavy. Endrey ny tombontsoa ananantsika nandray izany harena ara-panahy izany!
NY FOMBA HANAMPIANA NY HAFA HANAN-KARENA
3 Afaka manampy olona hafa maro be hanan-karena ara-panahy isika amin’ny fampahafantarana azy Ny Tilikambo Fiambenana, satria afaka manoro azy ireny ny “harena afenina”, ny fahendren’Andriamanitra, izy io (Ohab. 2:4). Amin’ny volana may isika dia hanolotra ny famandrihana amin’ny Ny Tilikambo Fiambenana amin’ny fotoana mety rehetra. Raha tsaroantsika hoe hatraiza no nanampian’ny Ny Tilikambo Fiambenana antsika hanan-karena, dia tsy ho andrintsika izay hanolorana azy io amin’olona faran’izay betsaka azo atao, sy amin’ny fomba rehetra (Ohab. 3:27). Raiso ny adiresin’ireo olona nandray gazety sy bokikely, ary miomàna hanaraka ny fahalianany sy hitondra gazety tsy tapaka ho azy amin’ny fanaovana lalana fizarana gazety.
4 Amin’ny heviny ara-panahy, ahoana no ahafahantsika manahaka ny lehilahy iray matahotra an’Andriamanitra lazalazain’ny Salamo faha-112, lehilahy izay mizara amim-pahendrena ny zavatra sarobidy ananany (Sal. 112:1, 3, 9)? Ilaintsika ny mitady ny “ondry” sy manampy azy ireny hahazo izay ilainy ara-panahy (Matio 5:3, MN). Mba hahatongavana amin’izany dia tokony hanararaotra ny fotoana rehetra hanaovana fanambarana niomanana na tampotampoka isika.
5 Tena mamokatra ny fitoriana takariva any amin’ny faritra sasany satria maro kokoa ny olona tratra an-trano. Moa ve ianao efa mba nanandrana nandeha isam-baravarana adiny iray na mihoatra talohan’ny fianarana ny boky na ny takariva hafa ao anatin’ny herinandro? Nahoana no tsy manao fandaharana hentitra mba hanaovana izany? Azo antoka fa ho tsapanao hoe mendrika ny hanaovana fiezahana izany.
6 Afaka mahita fotoana mety ve ianao mba hanaovana fanambarana ao amin’ny toeram-piasanao? Toy izany no nataon’ny anabavy iray nametraka gazety maromaro teo ambonin’ny biraony mba hahitan’ireo mpiara-miasa aminy izany rehefa mandalo izy ireny. Tsy mbola antoandro akory dia voazarany avokoa ireo gazetiny. Maro tamin’ireo mpiara-miasa aminy no liana tamim-pahatsorana, ka afaka nahazo famandrihana 18 io kristiana io.
7 Ny vola sy ny volamena ary ny harena hafa rehetra dia tsy mety hitovy amin’ny harena ara-panahy, dia ny fahalalana sy ny fahaizana azo noho ny fandaminan’i Jehovah sy ny fianarantsika ny Baiboly. Ny tena fahasambarana, ny lalana mahafinaritra, ny fiadanana, ny “andro maro”, eny ny fiainana mandrakizay aza, izany rehetra izany dia ho azon’izay rehetra mikatsaka ny harena ara-panahy (Ohab. 3:13-18). Amin’ny fizarantsika ny harena ara-panahy ananantsika amin’ny hafa no ampisehoantsika ny fankasitrahantsika noho izay noraisintsika, ary dia mahazo ny fitahiana maharitra avy amin’i Jehovah isika.—Ohab. 19:17