Aoka isika hampita ny hafatr’ilay fanjakana amim-pahazotoana
1 Jehovah dia Andriamanitra manatanteraka asa tsara maro ary izany dia amim-pahazotoana. Izay rehetra ataony dia hahasoa ireo izay manompo azy. Nanome ohatra tsara i Jesosy raha ny amin’ny fanahafana ny fahazotoan’ny Rainy. Tamin’ny fisehoan-javatra iray dia nanosika azy hanadio ny tempoly tamin’ireo izay nanao azy ho trano fivarotana ny hafanam-pony ho an’ny tranon’i Jehovah (Jaona 2:14, 17). Isika koa dia tokony haneho fahazotoana eo amin’ny fanompoantsika an’i Jehovah Andriamanitra raha irintsika ny ho fantatra fa vahoaka “mazoto indrindra amin’ny asa tsara”.—Titosy 2:14.
2 Mitondra soa ho an’ny namany ny asa tsaran’ny kristiana. Ny zavatra mahasoa indrindra azon tsika atao ho an’ny olona iray dia ny manampy azy hahafantatra sy hanompo an’i Jehovah (Jaona 17:3). Afaka mitondra izany fanampiana izany isika amin’ny fisehoana ho be zotom-po amin’ny asa fitoriana ilay Fanjakana sy fanaovana mpianatra.
3 Inona no atao hoe fahazotoana? Izany dia faharisihana mafana. Avy amin’ny faniriana amim-pahatsorana ny hanao izay mahitsy sy marina ny fahazotoana kristiana. “Mangotraka” no hevitry ny teny grika adika hoe “fahazotoana”. Isika izay minisitr’Andriamanitra dia tokony haneho io toetra tsara io rehefa mampita ny hafatr’ilay Fanjakana. Be zotom-po ve isika eo amin’ny fanompoana? Manao izay rehetra azontsika atao ve isika mba hanampiana ny hafa hahafantatra ny fikasan’i Jehovah?
AOKA HANOLOTRA IREO BOKIKELY AMIM-PAHAZOTOANA ISIKA
4 Mandritra ny volana aogositra dia hanana tombontsoa indray isika hanolotra bokikely 32 pejy, afa-tsy ny Ny sekoly sy ny Vavolombelon’i Jehovah. Mety ho ny bokikely Mifalia amin’ny fiainana eto an-tany mandrakizay, izany, na Indro, havaoziko ny zavatra rehetra, na Ny fitondram-panjakana izay hitondra ny Paradisa. Aoka isika hiomana hanolotra ny bokikely izay hita ho mifanentana indrindra amin’ny faritany sy ny olona mihaona amintsika eny am-baravarana.
5 Raha maniry hampita ny hafatr’ilay Fanjakana amim-pahazotoana isika dia tokony hanoman-tena tsara. Fantantsika tsara ve ny foto-dresaka atolotra amin’izao fotoana izao? Ahoana no azontsika anaovana ny fampitohizana ho amin’ny bokikely izay atolotsika? Hevitra voafaritra tsara inona avy ao amin’ilay bokikely no azontsika resahina? Raha maka fotoana hifankazarana amin’ireo bokikely 3 ireo ary raha tia fatratra ny zavatra raketiny isika dia ho voaomana mba hanolotra izany amim-pahazotoana amin’ireo olona ao amin’ny faritanintsika.
FANOLORAN-KEVITRA MBA HANOLORANA IREO BOKIKELY
6 Rehefa avy nitonona isika dia afaka milaza hoe: “Mbola tsy nanontany tena mihitsy ve ianao, tompoko, raha mihevitra ny faharatsiana hitan’izao tontolo izao ankehitriny Andriamanitra? [Avelao izy hamaly.] Manazava ny Baiboly fa tsy ho ela ny ratsy fanahy dia ho levona. [Vakio ny Salamo 92:7.] Raha izany no izy, any amin’iza no azontsika itodihana mba handraisana fitarihana sy fiarovana azo antoka? [Vakina ny Salamo 145:20.] Ny hany fomba hahavoavonjy àry izany dia ny fananana fifandraisana manokana amin’ny Mpamorona antsika, Jehovah Andriamanitra. Tokony handinika ny soa nampanantenainy ny olona mankato rehetra isika.” Azonao atao àry ny mampiseho ny sary faha-49 ao amin’ny bokikely Mifalia sy mamaky ny fanazavana azy, sady mampisongadina ireo fitahiana asehon’ny sary. Na koa, azonao sokafana eo amin’ny pejy faha-29 ilay bokikely hoe Fitondram-panjakana ary velabelarina ireo fitahiana resahiny. Mety hifidy ny hampiasa ny fehintsoratra faha-49 sy 50 amin’ny bokikely “Indro” angamba ny hafa mba hanazavana izay hataon’ny Fanjakan’Andriamanitra ho an’ny olombelona.
7 Ilaina maika dia maika ny hafatra entintsika amin’izao fe-potoana fanapahan-javatra iainantsika izao. Tokony ho be zotom-po isika hitory ny hafatr’ilay Fanjakana, sy hampirisika ny namantsika hamantatra an’Andriamanitra sy ny Teniny. Amin’ny fampitana amim-pahazotoana io fahalalana mitarika ho amin’ny fiainana io no hanehoantsika ny fitiavam-pivavahana sy ny fitiavantsika an’i Jehovah. Aoka isika hanontany tena toy izao: “Be zotom-po ve aho amin’ny asa tsara? Azo lazaina ve fa mandray anjara amim-paharisihana sy amin’ny fanahiko rehetra amin’ny asa fitoriana aho?” Ny valin’ireo fanontaniana ireo dia manambara zavatra betsaka ny amin’ny firehitry ny fahazotoantsika. Arakaraka ny hampitantsika ny hafatr’ilay Fanjakana no hitomboan’ny zotom-pontsika. Ireo izay mandinika antsika dia hahita fa tena vahoaka be zotom-po amin’ny asa tsara isika.