Manohiza mampianatra atsy an-kiato
1 Tsy mamela antsika ao anatin’ny fisalasalana ny Baiboly raha ny amin’ny karazana faritany nananan’ireo apostoly sy ireo kristiana voalohany. Nampitandrina azy ireo “tsy hiteny na hampianatra amin’ny anaran’i Jesosy” ny manam-pahefana, fotoana fohy taorian’ny nahafatesan’i Jesosy. (Asa. 4:18) Nahoana? Ny antony iray dia ny fahombiazana mahatalanjona hitan’izy ireo. An’arivony maro no tonga mpino, araka ny nitantaran’ny Asa. 4:4 azy toy izao: “Maro tamin’izay nandre ny teny no nino, ka dia tokony ho dimy arivo no isan’ny lehilahy.”
2 Koa satria mbola manohy mampianatra tsy an-kiato koa isika dia olona ana hetsiny, eny an-tapitrisany maro aza, no tonga mpino amin’izao androntsika izao. Mandritra ny volana oktobra dia manana tombontsoa hanolotra ny gazety Réveillez-vous! sy Ny Tilikambo Fiambenana ho fototry ny famandrihana isika. Tsy misy isalasalana mihitsy fa manana anjara asa lehibe ny Réveillez-vous! amin’ny fanaovana izay hahatsapan’ny olona fa mila zavatra ara-panahy izy. Nitarika ny maro ho amin’ny fahasambarana izany raha mbola nianatra ny hanao ny sitrapon’i Jehovah izy ireo. Ampitahao amin’ny Matio 5:3, MN.
Ataovy izay hahatratrarana ny olona rehetra
3 Na dia mety hanana faritany voasa matetika aza isika dia mety mbola ho afaka hiresaka amin’olona izay tsy manana fahafahana firy handre ny vaovao tsara ihany. Ahoana izany? Any amin’ireo faritany tsy azo anaovana fitoriana isan-trano, nahoana raha manararaotra ny fanoloran-kevitra tamin’ny fivoriamben’ny Distrika, amin’ny fanaovana fanambarana an-telefaonina? Na manao fiezahana manokana mba hiresaka amin’ny lehilahy tompon-trano rehefa manao fanambarana amin’ny takariva na amin’ny faran’ny herinandro. Amin’ny fandraisana an-tsoratra tsara rehefa manao isan-trano no mety hahafahantsika hahatratra mpikambana hafa amin’ny fianakaviana, toy ny renibe na zanaky ny iray tam-po amin’ny tompon-trano na zanak’olo-mpiray tam-po aminy izay mbola mandeha any an-tsekoly, na koa zaobavy iray izay miasa mandritra ny herinandro. Mety hovalian-tsoa tsara tokoa ny fiezahana fanampiny natao mba hiresahana amin’ny mpikambana tsirairay amin’ny fianakaviana.
4 Misy fomba tsara maro ahazoana famandrihana mandritra ity volana ity. Ny iray amin’ireny dia ny fanasana olona ampianarintsika ny Baiboly na olona mampiseho fahalianana hafa mety ho efa manao famandrihana amin’ny iray amin’ireo gazety ireo ny iray amin’ireo olona ampianarintsika. Nahoana raha manolotra hevitra azy handray azy roa? Azo ampirisihina hanana famandrihana amin’ny Ny Tilikambo Fiambenana ny mpikambana tsirairay ao amin’ny fianakaviana maro, amin’izay dia ho afaka hanomana ny fianarana Ny Tilikambo Fiambenana izy. Ny fanoloran-kevitra hafa dia fampitomboana ny lalana fizarana gazety ary avy eo dia ny fanolorana famandrihana amin’ireo izay mampiseho fahalianana mihoatra noho ny mahazatra. Tokony hanolotra fampianarana Baiboly amin’ireo izay mampiseho fahalianana marina isika.
Itaro ny fanompoanao
5 Tsy mbola diso aoriana loatra izao mba hamerenana ny fangatahana hanao ny asan’ny mpitory maharitra mpanampy amin’ny volana novambra. Amin’ny maha-fianakaviana, nanao fandaharana mba handraisana anjara amin’ny asan’ny mpitory maharitra ve ianareo mandritra ny fialan-tsasatra fohy amin’ny volana Desambra? Izao no fotoana tokony hanombohana hieritreritra ny fomba hanaovana izany amim-pahombiazana tanteraka. Raha tsy afaka ny ho tonga mpitory maharitra mpanampy ny fianakaviana manontolo, moa ve afaka miara-miasa ianareo mba hahafahan’ny iray na maromaro aminareo hanao izany? Raha tsia, azo atao ve fara faharatsiny ny mandany fotoana misimisy kokoa amin’ny fanompoana ka hanolotra ny gazety Réveillez-vous! (Mifohaza!) sy Ny Tilikambo Fiambenana?
6 Ankasitrahantsika ny soa ara-panahy sy fitahiana raisintsika ao amin’ireo pejin’ny Mifohaza! sy Ny Tilikambo Fiambenana. Fantatsika fa ireo olona tso-po ao amin’ny faritanintsika dia handray soa lehibe amin’ny famakiana ireo gazety amin’ny fomba tsy tapatapaka. Enga anie isika hanohy hampianatra miaraka amin’ireo fitaovana tsara ataon’i Jehovah eo am-pelatanantsika mandritra ny volana oktobra! Amin’ny fanaovana toy izany dia hijinja fitahiana avy amin’i Jehovah isika ary hiseho ho fitahiana ho an’ny hafa.—Gal. 6:9.