Aoka ianao hanohina ny fo amin’ny alalan’ny fampianarana baiboly mahomby
1 Nahita fifaliana tamin’ny fanaovana ny sitrapon’i Rainy i Jesosy ary nahazo fahafinaretana tamin’ny fanampiana ny hafa hanompo an’i Jehovah koa. (Sal. 40:8; Matio 9:37, 38; 11: 28-30) Tsy nianina fotsiny tamin’ny fampitana ny hafatra nentiny i Jesosy. Tokony hanohina ny fon’ny olona ampianarintsika isika raha maniry hahomby amin’ny fampirisihana ny hafa hiaraka amintsika amin’ny asa fitoriana. Mahafaoka zavatra be lavitra noho ny mitarika dinidinika misy fanontaniana sy valiny miorina amin’ny zavatra vita an-tsoratra iray izany. Mba hanohinana ny fo dia mila ny miomana amin’ny fieritreretana ireo mpianatsika isika.
2 Nihevitra manokana ny hafa i Jesosy. Noheveriny ny fomba fijerin’izy ireo. Nampiasa fanoharana izy mba hanatsorana ny hevitra sarotra. (Matio toko faha-5-7) Nanome torohevitra nifanentana izy rehefa avy nanavaka ny zava-nanahirana natrehin’ny mpihaino azy. (Marka 9:33-37) Rehefa tsy afaka nahatakatra avy hatrany ny foto-javatra tamin’ny fampianarany ny mpihaino azy dia nohazavainy an’ohatra tamim-paharetana izay tiany holazaina. (Matio 16:5-12) Izany fiheverana lalina ny hafa izany dia tokony hanosika antsika hanontany tena hoe: ‘Raha izaho mihitsy no ilay mpianatra, inona no nilaiko ho fantatra mba hahatakarana sy hanaovan-javatra mifanaraka amin’izay voalaza?’—Jereo Annuaire 1971, pejy faha-246-247.
Asongadino ny Baiboly
3 Rehefa nanontaniana ny mpivady iray hoe inona no nahatonga azy hanao zavatra avy hatrany raha vao nahazo fanambarana, dia namaly toy izao izy: “Ny Baiboly.” Eny, manohina ny fo tokoa ny Tenin’Andriamanitra. (Heb. 4:12). Makà teny matetika avy ao ary ampiasao be dia be ireo andinin-teny ao amin’ireo fehintsoratra. Ampio ilay mpianatra hahita hoe nahoana ny fitsipi-pitondrantena toy izany no mampiseho fahendrena na fahadalana. Fakafakao miaraka aminy ny hoe amin’ny ahoana no hahasoa azy ny fankatoavana ireo lalàn’Andriamanitra.—Jereo Ny Tilikambo Fiambenana 1 martsa 1985, pejy faha-15 sy 16.
4 Mpitory maro no nahatsapa fa tena ahitam-pahombiazana, eo amin’ny fampisongadinana ny Baiboly, ny fampiasana ny boky Comment raisonner. Ohatra, rehefa mandinika ny pejy faha-124, eo amin’ny fehintsoratra faha-13 amin’ny boky Hiaina mandrakizay ny tompon-trano iray dia mety hanontany hoe nahoana ny mpitondra fivavahany no milaza fa matoa maty ny zazakely dia satria ilain’Andriamanitra ho any aminy any an-danitra izy ireny. Ny fandinihana hevitra ao amin’ny pejy faha-254 amin’ny boky Comment raisonner, eo ambanin’ny lohateny kely hoe: “Nahoana no maty na dia ny zazakely aza?” dia manoritra ny fiahian’i Jehovah ny amin’ny fiarovana ny rafitry ny fianakaviana. Izany fanazavana izany dia mety hampiaiky ilay olona ny amin’ny fitiavan’i Jehovah ny olombelona.
Manontania
5 Nanampy an’i Jesosy hampisaintsaina sy hampanjohy hevitra ny olona ny fampiasana fanontaniana misy vokany. (Matio 17:24-27) Mety hanampy antsika hamantatra raha azony izay nampianarina azy sy izay fomba fijery tsy miorina amin’ny Baiboly mbola tanany, ny valin-tenin’ilay mpianatra. Angamba ilay mpianatra eo am-piadiana mba hialana amin’ny fahazarana mifoka sigara. Niara-nianatra ny toko faha-27 amin’ny boky Hiaina mandrakizay sy ny Réveillez-vous! tamin’ny 8 jolay 1989, ao amin’ny pejy faha-13-16 ianareo. Hitany ny ilàna itsaharana. Kanefa, moa ve izy miaiky marina tokoa fa tokony hanafa-tena amin’izany izy? Mety ho afaka hanontany toy izao ianao: “Ahoana ny hevitrao? Eritrereto hoe hijanona tsy hifoka izao dia izao ianao nefa hanao anao ho fihomehezana ny namanao sasany. Inona no hataonao?
6 Misy teny kely fampitandremana anefa. Indraindray ny fanontaniana sasany dia mety hitarika valin-teny izay hahagaga na handiso fanantenana anao. Inona no hatao? Raha lohahevitra sarotra no dinihina dia mety ho tsaratsara kokoa ny hilazana fotsiny hoe: “Aleo avela eo aloha iny fa azontsika iverenana any aoriana.” Na “foto-kevitra mendrika hoeritreretina io, sa tsy izany?” (Jaona 16:12) Koa satria mahafantatra izay tena hevitr’ilay mpianatra momba io raharaha io ianao, dia afaka manomana fanazavana izay mety hanampy azy handroso kokoa. Tokony hiezaka hanohina ny fon’ny olona isika mba hanaovany zavatra ary hivavaka mba hanampian’i Jehovah azy hitombo ara-panahy.—1 Kor. 3:5-9
7 Tsarovy mandrakariva ny hanokana fotoana ampy mba hamakafakana miaraka amin’ilay mpianatra ny hevitra dinihinareo, rehefa mitarika fampianarana Baiboly ianao. Ampifanaraho amin’izay ilainy ny fomba fampianatrao. Miezaha hanorina fitiavana sy fanajana lalina an’i Jehovah, ny Baiboly ary ny fandaminan’i Jehovah, ao am-pony. Enga anie isika hanao ny anjarantsika mba hanampiana ny hafa ho tonga mpianatr’i Kristy amin’ny fiezahana hitarika fampianarana Baiboly mahomby.—Asa 2:41-46.