Aoka isika hidera an’i Jehovah amin’ny hira
1 Sokafy kely ao amin’ny pejy farany mifanolotra amin’ny fonony hoe ny fihirananao (fihirana vaovao) aza fady. Inona no hitanao eo? Amboarampeo iray voaforon’ny levita mpihira ao amin’ny tempoly masin’i Jehovah, ka misokatra tsara ny vavan’izy ireo, mihira amin-kafanam-po. Endrika iray lehibe nampiavaka ny fanompoam-pivavahana marina tao amin’ny tempolin’i Jehovah ny fihirana. Nandritra ny andron’i Davida mpanjaka, dia maherin’ny 10 isan-jato tamin’ireo izay nanompo tao amin’ny tempoly no voatendry hidera an’i Jehovah tamin’ny mozika. Ary tamin’ireo, dia 288 no mpihira voaofana, “nanan-talenta avokoa”. Afaka mahazo antoka ianao fa noheverin’izy ireo ho zava-dehibe ny hira nataony. — 1 Tant. 23:3, 5; 25:7, MN.
2 Raha ny tamin’ny andron’ny kristianisma indray, dia fantatsika fa nanao hira iray i Jesosy sy ny apostoliny tamin’ny fifaranan’ny Sakafo harivan’ny Tompo. (Marka 14:26). Ary namerimberina niteny tamintsika ny apostoly Paoly mba hihira fiderana ho an’ilay Andriamanitsika. Izao no nosoratany ao amin’ny Kolosiana 3:16: “Aoka ny tenin’i Kristy hitoetra betsaka ao aminareo amin’ny fahendrena rehetra, dia mifampianara ka mifananara amin’ny salamo sy ny fihirana ary ny tonon-kiram-panahy, mihira amin’ny fahasoavana ao am-ponareo ho an’Andriamanitra [Jehovah, MN].” — Jereo koa Efesiana 5:19, 20.
3 Anankiray amin’ireo fomba iderantsika an’i Jehovah ny fihirana ny hiran’ilay Fanjakana. Moa ve tsy tokony hihira amin’ny fontsika manontolo isika noho izany? Rehefa manao izany isika dia manolotra fiderana ho an’i Jehovah. Mihaino ny hirantsika izay mivantana any aminy izy, toy ny ataony amin’ny vavaka ataontsika. Rehefa tena mihira mafy isika, dia afaka mitondra fifaliana ho an’ny hafa koa, ary mitondra soa ho an’ny tenantsika.
4 Eritrereto ireo tonony mahafinaritra amin’ny hirantsika. Manampy tokoa izany raha ny amin’ny ‘fifampianarana sy ny fifananarana’ ataontsika. Endrey izany torohevitra tsara raketin’ireo hirantsika! Amin’ny fandraisana ho zava-dehibe izany torohevitra izany no ahafahantsika mahazo fanampiana hamboly ny vokatry ny fanahy, mba hiroborobo amin’izany isika ka hitandrina tsy ho azon’ireo fitaomana avy amin’ny nofo sy avy amin’izao tontolo izao. ‘Ny fihirana amin’ny fo’ dia mampirisika antsika hanompo an’i Jehovah amin-kasahiana sy amim-pifaliana.
5 Mba hahatonga ny hira hatomboka amin’ny fomba tsara any amin’ ireo fivoriana, dia tsy ny nomeraon’ilay hira ihany no azon’ny mpitari-draharaha tononina fa ny foto-keviny na lohateniny koa. Mety hanamarika ny andinin-teny iorenan’ilay hira izy indraindray ary hanazava fohy ny amin’ny fomba ifanarahan’izany amin’ilay fanazavana atolotra.
6 Ireo “Mélodies du Royaume” ary koa ireo “cassettes” amin’ny piano dia fitaovana tsara hanampiana ireo mpianakavintsika hahay tsara kokoa ireo hira. Ny fampiasana azy ireny ho toy ny feon-kira fandravahana alefa moramora no fomba mahafinaritra indrindra ho antsika mba hahatonga ny tena hifankazatra kokoa amin’ireo hirantsika.
7 Ny Soratra masina dia mamerimberina mampahatsiahy antsika ny amin’ny adidy hidera ny Raintsika be fitia any an-danitra amin’ny alalan’ny hira. Aoka isika hanao izany amin’ny fanahintsika manontolo. Amin’izany fomba izany no ahafahantsika manao fanambarana mampientana amin’ireo vahiny tonga eo anivontsika. Eny, aoka isika hihira sy hanao antsa ho an’i Jehovah, toy ny nataon’i Davida fahiny. — Sal. 108:1-3.