Manome fampianarana teokratika ny Sekolin’ny Fanompoana ilay Fanjakana

Miantsoroka andraikitra mavesatra ireo loholona. Nanomboka tamin’ny 1959, dia nisy fandaharana natao mba hisian’ny “sekoly fampiofanana manokana ho an’ny asa fiandraiketana” mba hanampiana azy ireo hanatontosa io fanendrena mavesatra io. (jpF p. 292-293; yp77F p. 14). Ireo mpikarakara momba ny asa dia nasaina mba hanatrika izany voalohany tamin’ny 1984. Ny Sekolin’ny Fanompoana ilay Fanjakana farany dia natao nandritra ny taom-piasana 1988, ary nisy an’aliny maro nandray soa avy amin’izy io.

Hatramin’izay, dia nisy kongregasiona an-jatony maro niforona ary rahalahy an’arivony maro notendrena ho loholona sy mpikarakara momba ny asa. Ary nisy fanitsiana koa natao teo amin’ny lafiny ara-pandaminana. Noho izany, dia nanao fandaharana ny Kolejy Foibe mba hanatrehan’ny loholona sy mpikarakara momba ny asa rehetra ao amin’ireo kongregasiona ny Sekolin’ny Fanompoana ilay Fanjakana mandritra ity taom-piasana ity. Namboarina mba hifanitsy tsara amin’izay ilaina eo amin’ny fanompoana amin’izao fotoana izao ilay lesona vaovao. Hisy solontena avy ao amin’ny Betela sy mpiandraikitra mpitety faritany sasantsasany hitarika ny fampianarana amin’io sekoly io. Handray soa marina avy amin’izany ny kongregasiona rehetra rehefa mampihatra izay hianarany amin’io sekoly io ireo loholona sy mpikarakara momba ny asa.