Aoka hahafantatra ny rehetra fa akaiky ny filaminana maneran-tany
1 Tsy ho ela ilay “Andrian’ny fiadanana” dia hanorina tena fiadanana sy filaminana marina manerana ny tany. Tokony hanosika antsika hizara izany amin’ny hafa ny finoantsika io fampanantenan’ny Baiboly io. (Isaia 9:5, 6 [6, 7, MN]; Mika 4:3, 4). Mandritra ny volana Janoary sy Febroary isika dia hanolotra fitambarana boky roa, voaforon’ny roa amin’ny boky “Tsy mahay mandainga”, “Fiadanana sy filaminana” ary “Fahamarinana”, amin’ny sarany 600 FMG. Ireo kongregasiona izay tsy manana ireo boky ireo intsony ao amin’ny tahiriny dia afaka manolotra ny boky Vaovao tsara sy ny boky Ho tonga anie ny Fanjakanao! amin’ny sarany 600 FMG ihany ny fitambarana boky roa. Alohan’ny hanombohanareo hampiasa ireto boky roa farany ireto anefa, dia ataovy azo antoka fa efa tapitra avokoa ny tahirin’ny kongregasiona amin’ireo boky telo voalaza voalohany.
2 Eo amin’ny pejy faha-8 amin’ity Ny Fanompoantsika ilay Fanjakana ity, izahay dia mampiseho fampidiran-dresaka vitsivitsy izay mety ho tianareo ny hampiasa azy eo amin’ny fanompoana mandritra ny volana Janoary. Misy fomba fampitohizana telo izay mety hanampy antsika hisarika ny sain’ireo tompon-trano ho amin’ny boky Fiadanana sy Filaminana, anolorana hevitra ato amin’ireto fehintsoratra manaraka ireto.
3 Fomba fampitohizana voalohany: Aorian’ny fampidiran-dresakao, dia sokafy eo amin’ny pejy faha-5 ilay boky ary vakio amin’ilay tompon-trano ireo fehintsoratra roa voalohany. Avy eo, dia manontania hoe: “Araka ny hevitrao, loharano inona no azontsika ampoizina fa hahazoana fampiononana amin’ireo zava-manahirana antsika?” Avelao izy hamaly, ary manohiza toy izao: “Ity boky ity dia mampahafantatra mazava tsara ny loharanon’ny tena fampiononana marina ho an’ny zava-manahirana antsika rehetra ary manazava ny fomba hahatongavan’ny fiadanana hanerana ny tany amin’izao androntsika izao. Hahaliana anao ve ny hamaky azy, ary ho tianao ve ny hahafantatra bebe kokoa momba ny tontolo vaovao iray nampanantenaina?” Avelao izy hamaly ary dia atolory ny fitambarana boky roa.
4 Fomba fampitohizana faha-2: Rehefa avy namaky ny Isaia 9:5, 6 [6, 7, MN] ianao dia sokafy eo amin’ny pejy faha-7 ilay boky ary miresaha momba ny fehintsoratra faha-10 izay mampifanohitra ireo fampanantenan’Andriamanitra azo antoka amin’izay ampanantenain’ireo filoha olombelona. Avy eo dia manohiza toy izao: “Misy mihevitra fa hitondra fiadanana ireo fitondram-panjakan’olombelona. Kanefa tsy maintsy avy amin’Andriamanitra, fa tsy avy amin’ny olombelona, ny tena fiadanana sy filaminana, sa tsy izany no fihevitrao?” Avelao izy hamaly, ary dia hazavao fa ny boky Fiadanana sy Filaminana dia mamaly fanontaniana maro be momba ny Fanjakan’Andriamanitra sy ny fiadanana eto an-tany. Atolory amin’izay ny fitambarana boky roa.
5 Fomba fampitohizana faha-3: Rehefa avy nanonona ny iray amin’ireo fampidiran-dresaka hita eo amin’ny fehintsoratra faha-4 eo amin’ny pejy faha-8 amin’ity Ny Fanompoantsika ilay fanjakana ity ianao, dia sokafy ho amin’ny pejy faha-17 ny boky Fiadanana sy Filaminana ary vakio amin’ilay tompon-trano ny fehintsoratra faha-29. Anontanio izy hoe: “Afaka mitondra tena filaminana avy amin’ny loza ateraky ny heloka bevava ve ny olombelona?” Avelao izy hamaly ary dia atolory ny fitambarana boky roa, amin’ny fanazavana aminy fa izy ireo dia mamaly io fanontaniana io sy ny maro hafa koa mifandray amin’ny Fanjakan’Andriamanitra sy ny fiadanana sy filaminana hoentiny eto an-tany.
6 Mety ho efa nifidy fampidiran-dresaka iray tianao avy eo amin’ny pejy faha-8 amin’ity Ny Fanompoantsika ilay Fanjakana ity ianao. Rehefa avy nandinika indray ireo fomba fampitohizana ato amin’ity lahatsoratra ity ianao dia mety hahita iray amin’izy ireo izay ho tianao manokana ny hampiasa azy. Makà fotoana mba hanaovana fanazaran-tena hampiasa ny fampidiran-dresaka sy ny fomba fampitohizana nofidinao alohan’ny handehananao ho eny amin’ny asa fanompoana. Ny fanomanana ataonao sy ny fieken’ny tenanao manokana fa ho tonga marina ny tena fiadanana sy filaminana amin’ny alalan’ilay “Andrian’ny fiadanana” sy ny Fanjakany, dia hanamafy ny fahaizanao mandresy lahatra sy ny hafanam-ponao rehefa manolotra ireo fitambarana boky roa ianao.