Valin’ireo Fanontanianareo

◼ Tokony hiantso an-telefaonina ny Fikambanana ve isika mba hahazoana valiny ho an’ireo fanontaniana ara-baiboly na mba hahazoana torohevitra manokana?

Olona maro no mampiasa ny telefaonina mba hanaovan-javatra haingana. Matetika anefa dia anton-javatra hafa noho ny hafainganana no tafiditra amin’izany. Eo amin’izao tontolo izao, dia zavatra mahazatra ny mametraka izay mampiadana ny tena manokana eo amin’ny toerana voalohany; manalavitra ny fisahiranana ny olona.

Fahasamihafana toy inona moa no hitantsika amin’ny torohevitr’Andriamanitra! Mampirisika antsika izy mba hitady fahalalana toy ny fikatsaka harena afenina, ka izany dia milaza fa tokony ho vonona ny hisahirana isika. — Ohab. 2:1-4.

Mety ny hanaovana izany ezaka izany raha misy fanontaniana mipoitra eo am-panomanantsika anjara iray amin’ny fivoriana na raha tojo zava-manahirana manokana ny tenantsika. Tsy hiantso an-telefaonina ny Fikambanana fotsiny isika, fa handray soa kosa raha manao fikarohana manokana ao amin’ny Baiboly sy ao amin’ireo bokintsika, indrindra fa ao amin’ny Index des Publications de la Société Watch Tower, izay misy indeksa araka ny andinin-teny sy indeksa araka ny foto-kevitra.

Rehefa avy ‘nitady toy ny fikatsaka harena afenina’ toy izany isika, dia afaka manatona ny iray amin’ireo loholona eo an-toerana raha mbola mila fanampiana. Ireo loholona dia manana fahalalana ara-baiboly sy fanandraman-javatra be dia be eo amin’ny fikarohana fanazavana. Ny fanampiana voalanjalanja avy amin’izy ireo dia hety indrindra raha mila torohevitra momba ny zava-manahirana antsika manokana na ny fanapahan-kevitra manokana iray isika. Akaiky antsika sy ny tarehin-javatra misy antsika tokoa mantsy izy ireo. — Ampitahao amin’ny Asan’ny Apostoly 8:30, 31.

Raha mbola toa ilaina ihany ny hisian’ny fanazavana fanampiny avy amin’ny Fikambanana mivantana, dia tsara kokoa mazàna ny mandefa taratasy. Azon’ireo loholona atao koa ny manolotra ny fanampiany amin’io. Ny taratasy toy izany dia hanome fotoana mba hahafahana hampiorina ilay valin-teny amin’ny fikarohana na fisaintsainana ampy tsara, zavatra izay tsy azo atao mazàna rehefa miresaka amin’ny telefaonina.