Fanampiana Ireo Rehetra Nampiseho Fahalianana
1 Ny finoantsika sy ny fitiavantsika ny hafa dia hanosika antsika, mandritra ny volana Martsa, hanampy sy hanasa ireo rehetra nampiseho fahalianana tamin’ny hafatra momba ilay Fanjakana mba hanatrika ny Fahatsiarovana. Mila ny hotarihina ho amin’ny fandaharana nataon’i Jehovah ho amin’ny famonjena, izay miorina amin’ny sorom-panavotan’i Kristy, izy ireny. — Heb. 9:28.
2 Hevitra tsara ny hanaovana lisitr’ireo izay irinao hasaina ho amin’ny Fahatsiarovana. Ampidiro ao amin’izany izay rehetra manatrika fivoriana indraindray, ary koa ireo izay nianatra teo aloha na nampiseho fahalianana tamin’ny fomba hafa. Aza hadinoina ireo vady tsy mpino na ireo mpianakavy hafa. Rehefa vita ilay lisitrao, dia manaova ezaka manokana mba hitsidihana ny tsirairay amin’izy ireo. Mety ho tianao ny hangataka ireo loholona mba hanampy anao hanao ny sasany amin’ireo fitsidihana ireo.
3 Inona no azonao lazaina amin’izany fitsidihana izany?
Aorian’ny fiarahabana mafana, dia afaka milaza zavatra toy izao ianao:
◼ “Tamin’ny lasa ianao dia nampiseho fahalianana tamin’ireo zavatra ara-panahy, ary noheveriko fa hankasitrahanao ity fanasana hanatrika fisehoan-javatra manokana ity. [Atolory ilay tompon-trano ilay fanasana vita pirinty momba ny Fahatsiarovana.] Ny Fahatsiarovana ny fahafatesan’i Kristy no hany fisehoan-javatra nasain’i Jesosy Kristy Tompo hankalazain’ny mpanara-dia azy. Andrasantsika amim-panantenana ny fandinihana indray izay notanterahin’i Kristy tamin’ny alalan’ny fahafatesany sy ny fomba hahazoantsika fiainana mandrakizay amin’ny alalan’izy io. Tamin’ny herintaona, dia olona maherin’ny 11 tapitrisa no nanatrika io fivoriana manokana io. Ho faly aho raha miara-manatrika amiko ianao amin’ity taona ity.” Aza hadinoina ny manoratra ny fotoana sy ny toerana hankalazan’ny kongregasionanao ny Fahatsiarovana. Ankoatra izany, dia manolora ny haka azy, raha ilaina izany.
4 Rehefa manatrika ny Fahatsiarovana ireo vaovao, dia tokony hahatsiaro tena ho tonga soa. Ampio izy ireny hifankahalala amin’ireo mpitory eo an-toerana. Ampahalalao azy izay olona liana rehetra mety honina any akaikin’ny tranony. Hampahery azy ny fahafantarana fa misy olona liana ny fahamarinana eo amin’ny manodidina azy. Asao izy hiara-mipetraka amin’ny fianakavianao mandritra ny fankalazana ny Fahatsiarovana, raha mety izany.
5 Mazava ho azy, fa ny fanatrehana ny Fahatsiarovana fotsiny dia tsy hanome antoka ny amin’ny famonjena azy ireny. Kanefa ho an’ny maro amin’ireo asainao, dia mety ho ny dingana voalohany ho amin’ny fanehoana finoana ny ra nalatsak’i Jesosy izany. Rehefa mody avy any amin’ilay fivoriana ianareo, dia anontanio ilay olona tonga raha ho tiany ny hanatrika ny Fivoriana Ampahibemaso sy ny Fianarana Ny Tilikambo Fiambenana hatao ny alahady manaraka. Aoka ianao haneho fitiavana sy faniriana hanampy. Ampahafantaro azy fa vonona ny hanampy eo amin’izay rehetra ahafahanao manao izany ianao. Arakaraka ny anombohany aloha mifanerasera amintsika amin’ny fomba tsy tapaka no hanafaingana ny fitomboany ara-panahy. Ho fifaliana sy fahafaham-po toy inona moa no ho tsapantsika rehefa hiaraka ho tafita velona amin’ny “fahoriana lehibe” amin’ny hafa maro mety ho nampiantsika isika! — Apok. 7:9, 14.