Ny Hasarobidin’ny Baiboly eo Amin’ny Tontolo Ankehitriny
1 Maro amin’izao andro izao no mihevitra ny Baiboly ho lany andro sy tsy araka ny zava-misy. Na dia izy io aza no boky miely indrindra maneran-tany sady voadika amin’ny fiteny maro indrindra amin’ny tantara rehetra, dia vitsy ihany no mamaky azy ary mbola vitsy kokoa no manaraka ny torohevitra raketiny.
2 Mifanohitra amin’izany, isika dia mihevitra ny Baiboly ho sarobidy amin’ny maha-Tenin’Andriamanitra azy. Ireo zava-misy dia mampiseho fa marina ara-tantara izy io. Ankoatr’izany, ny fifandrindrany miavaka, ireo faminaniany sy ny fahendrena azo avy aminy ary ny heriny manosika hanao zavatra izay mitondra soa eo amin’ny fiainan’ny olona dia samy manaporofo fa ny Baiboly dia “nomen’ny tsindrimandrin’Andriamanitra”. (2 Tim. 3:16). Ny fanandraman-javatra hitan’ny tenantsika manokana sy ny fankasitrahantsika an’io fanomezana mahatalanjona io dia tokony hanosika antsika hampirisika ny hafa mba hamakafaka ny tena hasarobidiny.
3 Mety ho toy izao ny fanombohan-dresaka:
◼ “Raha heverina ireo zava-manahirana lehibe atrehin’ny olombelona, dia olona maro no mahita fa sarotra ny mino an’Andriamanitra, na misalasala izy ireo ny amin’ny fahaizan’Andriamanitra mandamina ireo zava-manahirana atrehintsika. Ahoana ny hevitrao ny amin’izany? [Avelao hamaly ilay olona.] Mariho ny lohatenin’itỳ taratasy mivalona itỳ manao hoe Nahoana Ianao no Afaka Mitoky Amin’ny Baiboly.” Sariho ny sainy ho amin’ilay sary eo amin’ny fonony, avy eo dia vakio ny fehintsoratra voalohany sy faharoa eo amin’ny pejy faha-2. Raha mampiseho fahalianana ilay tompon-trano, dia mety hamaky sy hamelabelatra ireo andinin-teny voatonona eo amin’ny fehintsoratra faharoa ianao. Manaova fandaharana mba hiverina, handinihana bebe kokoa an’ilay taratasy mivalona — angamba amin’ny fampiasana ny iray amin’ireo lohatenikely amin’ny endriky ny fanontaniana mba hampitomboana ny fahalianany.
4 Mety ho mitovitovy amin’izao ny fanombohan-dresaka hafa iray:
◼ “Moa ve ianao tsy manaiky fa ny olombelona dia mila fitarihana amin’ny fiatrehany ireo zava-manahirana eo amin’ny fiainana? [Avelao hamaly ilay olona.] Fahiny, dia nitodika tamin’ny Baiboly ny olona matetika mba hahazoana fitarihana, nefa niova ny toe-javatra. Heverinao ve fa ny Baiboly dia misy vidiny azo ampiharina amin’izao andro izao? [Avelao hamaly ilay olona.] Mariho izay voalaza ao amin’ny 2 Timoty 3:16. [Vakio.] Tsy vitan’ny hoe manampy antsika fotsiny hanao fanapahan-kevitra amim-pahendrena ny Tenin’Andriamanitra voasoratra fa manome antsika fanantenana azo itokiana ny amin’ny hoavy koa izy io.” Vakio ny Jaona 17:3. Hazavao ny hevitra voafaritra tsara iray na roa izay efa nofantenanao avy tao amin’ny boky Ny Fahatanoranao — Ny Fomba Handraisan-tsoa Be Indrindra avy Amin’izany mba hampisehoana ny vidin’ny Baiboly sy ny boky Fahatanoranao azo ampiharina.
5 Mety ho hitanao fa mahasoa ny fampiasana ny sasany amin’ny fampidiran-dresaka asongadina eo amin’ny pejy faha-10 ao amin’ny boky Fanjohian-kevitra eo ambanin’ny lohatenikely hoe “Baiboly/Andriamanitra”. Misy fanazavana fanampiny aseho eo amin’ny pejy faha-77-87 izay mety hilaina amin’ny famaliana ireo fanontaniana na fanoheran’ireo tompon-trano.
6 Itỳ fanandraman-javatra manaraka itỳ dia mampiseho amintsika ny hasarobidin’ny boky Fahatanoranao: Ny zazavavy iray 14 taona avy any Nigéria, atsy Afrika Andrefana, dia velom-pankasitrahana nandray toromarika ara-pitondran-tena fototra avy tamin’ny boky Ny Fahatanoranao — Ny Fomba Handraisan-tsoa Be indrindra avy Amin’izany. Izao no nosoratany: “Sangan’asa mahasoa sy marina sy mahatalanjona ary mahafinaritra indrindra io boky io. Azo antoka fa ho fanampiana lehibe ho an’izay vonona ny hanaiky hotarihina amim-pisakaizana mamakivaky ireo zava-dratsy hafahafa rehetra mahazo vahana eo amin’ny fiainana izy io. Nasehoko an’ireo mpiara-mianatra sy mpiara-monina amiko io boky io. Izay rehetra mamaky azy io dia midera ireo sary ataonareo mampitombo fahalalana sy ireo foto-kevitra velabelarina ao amin’ilay boky. Heverinay fa ireo zava-nitranga aseho ao amin’ilay boky dia tsy vitan’ny hoe manome fanazavana na mampita fahendrena sy fotopoto-pitsipika ara-pitondran-tena madio ilaina fotsiny fa afaka manome fitarihan-dalana manorina koa ho an’ny tanora sy ny olon-dehibe izay maniry fatratra hahita ny tena fiadanan-tsaina sy fahasalamana, ka haneho fifehezan-tena sy fifikirana mafy amin’izay marina. (...) Ambonin’izany rehetra izany, dia feno aoka izany io boky io sady tondraky ny torohevitra fototra momba ny fitondran-tena eo amin’ny maha-lahy sy maha-vavy izay mety tsy ho azo avy amin’ny ankabeazan’ny ray aman-dreny na ny mpampianatra. (...) Iriko indrindra ny hampidirana an’io boky io any an-tsekoly amin’ny lesona ianarana isan’andro mba hisian’ny fomba fiaina milamina sy voamariky ny fitiavana sy mamokatra ary misy heviny kokoa.”
7 Aoka isika ho mailaka hanararaotra ireo fahafahana hampirisika ny olona hamaky ny Baiboly. Ampio ireo olona liana mba hanorina fanajana sy fitiavana ny Tenin’Andriamanitra voasoratra. Izy ireo dia hahazo soa maro be dieny ankehitriny sy amin’ny hoavy amin’ny fampiharana ireo fotopoto-pitsipika raketiny eo amin’ny fiainany manokana sy amin’ny fahatongavana amin’ny fahalalana ny fahamarinana. — Sal. 119:105.