Manaova Fanompoana Masina andro Aman’alina
1 Nitarina hatratỳ amintsika ny tombontsoa miavaka iray. Izany dia ny tombontsoa ho Vavolombelon’i Jehovah. Anisan’ny fandaminana maneran-tany misy evanjelisitra ampiasain’i Jehovah mba hanatanteraka ilay asa lehibe indrindra hitoriana ilay Fanjakana isika! (Marka 13:10). Rehefa heverina ny maha-dodona ny androntsika, moa ve isika mandray anjara amin’io asa io hatramin’izay farany tratrantsika?
2 Tsy fantatsika hoe firy amin’ny farany no handray tsara ny fitoriantsika. Manome toky antsika i Jehovah fa ho “olona betsaka” izy ireo, ka izy rehetra dia ho fantatra amin’ny ‘fanaovany fanompoana masina ho azy andro aman’alina’. (Apok. 7:9, 15, NW ). Tsy mpihaino liana fotsiny, na hoe mpanatrika fivoriana fotsiny, ireo Vavolombelona maherin’ny dimy tapitrisa izay efa be atao amin’ny fanompoana an’Andriamanitra. Mpiasa izay mitory ny vaovao tsara maneran-tany izy ireo!
3 Isan’andro dia misy fahafahana maro hidera an’i Jehovah, na amin’ny fanompoana eny amin’ny saha izany na amin’ny fomba tsy ara-potoana. Eritrereto ny fanambarana lehibe izay ho azo omena raha manao ny dingana voalohany ny tsirairay avy amintsika mba hizara ny fahamarinana amin’ny olona iray monja isan’andro. Ny fankasitrahantsika an’i Jehovah dia tokony hanosika antsika hiresaka momba azy amin-kafanam-po. — Sal. 92:1, 2.
4 Ampio ny hafa hanao fanompoana masina: Manohy mitahy antsika i Jehovah amin’ny fanomezana antsika fitomboana. (Hagay 2:7). Nandritra ny taom-panompoana lasa, teto Madagasikara, dia fampianarana Baiboly tany an-tokantrano 18 055 tamin’ny antsalany no notarihina isam-bolana. Ny tanjontsika amin’ny fiaraha-mianatra amin’ireny olona ireny dia ny hanampy azy ho tonga mpianatr’i Jesosy. (Matio 28:19, 20). Maro amin’izy ireny no efa nanao fandrosoana tsara dia tsara tamin’ny fanatrehana tsy tapaka ireo fivoriana. Nanomboka niresaka tamin’ireo olom-pantany ‘momba ny asa lehibe an’Andriamanitra’ izay nianarany, izy ireny. (Asa. 2:11). Azo asaina ve izy ireny ankehitriny mba handray anjara amin’ny fanompoana ampahibemaso?
5 Mandritra ny Aprily, dia tokony hanao ezaka manokana isika mba hanasa ireo vaovao izay mahafeno fepetra hiaraka amintsika eo amin’ny fanompoana eny amin’ny saha. Naneho faniriana hanao izany ve ilay olona ampianarinao? Raha eny, mahafeno ireo fepetra takin’ny Soratra Masina ve izy? (Jereo ny boky Voalamina, pejy 97-99.) Rehefa maniry handray anjara amin’ny fanompoana eny amin’ny saha ilay mpianatra, dia resaho amin’ny mpiandraikitra mpitantan-draharaha ny mety ho fahafahany, ka io dia handamina ny handinihan’ny loholona roa ilay raharaha. Raha mahafeno fepetra mba hekena ho mpitory tsy vita batisa ilay mpianatra, dia asao izy hiaraka aminao eny amin’ny saha. Ny mpiandraikitra ny fanompoana sy ny mpitarika ny fianarana ny boky dia tokony ho mailo manokana mba hanampy an’ireo izay mety hahafeno fepetra mba hanombohany hitory amin’ny Aprily.
6 Azon’ireo ray aman-dreny atao ny mandinika raha mahafeno fepetra mba ho tonga mpitory tsy vita batisa ny zanany na tsia. (Sal. 148:12, 13). Raha maniry hilaza ny ao am-pony eo amin’ny fanompoana ilay Fanjakana izy ka tsara fitondran-tena, dia azonao atao ny manatona ny iray amin’ireo loholona ao amin’ny komitin’ny fanompoana, mba hiresaka momba ilay tarehin-javatra. Rehefa avy nivory niaraka taminao sy ilay zanaka ireo loholona roa, dia hamantatra raha mahafeno fepetra mba hisaina ho mpitory ilay zanakao na tsia. Misy antony manokana hifaliana rehefa miaraka amintsika eo amin’ny fiderana an’Andriamanitra ny zanatsika!
7 I Jehovah irery ihany no mendrika ny fanompoana masina ataontsika. (Lioka 4:8). Enga anie ny tsirairay avy amintsika hampiasa amin’ny fomba feno ny tombontsoantsika mahatalanjona hidera azy “indrindra”. — Sal. 109:30; 113:3.