Niova Ny Andro Iainantsika
1 Milaza amintsika ny Baiboly fa “eo am-piovana ny sehatr’itỳ tontolo itỳ”. (1 Kor. 7:31, NW ). Marina toy inona moa izany amin’izao andro izao! Na dia amin’ny androm-piainantsika aza, isika dia nahita fiovana goavana teo amin’ny fisainan’ny olona sy ny fitondran-tenany eo amin’ny ambaratonga rehetra amin’ny fitambaran’olona. Raha tiantsika ny hahomby amin’ny fanatratrarana azy ireny amin’ny alalan’ny hafatra momba ilay Fanjakana, dia tsy maintsy maharaka ilay andro iainantsika miova ny tari-dresatsika. Irintsika ny hanolotra ny vaovao tsara amin’ny fomba izay hahaliana ny olona sy hahatratra ny fony.
2 Taona maro lasa izay, tany amin’ny tany maro, ilay asa fanambarana dia hafa satria, tamin’ny ankamaroany, ny olona dia nanana fiainana nilamina, ary nahatsapa tsy fananana ahiahy. Nitana toerana sarobidy teo amin’ny fiainan’izy ireo ny fivavahana. Nomena fiheverana ambony ny Baiboly. Tamin’izany andro izany, ny fanaovana fanambarana matetika dia mba hanoherana foto-pampianarana diso. Amin’izao andro izao, dia misafotofoto izaitsizy ny fiainan’ny olona. Hamavoina ny fivavahana. Vitsy no manam-pinoana ny Baiboly. Ary ho an’ny maro, ny teorian’ny evolisiona dia nandrava ny finoana an’Andriamanitra.
3 Nanao fanamarihana toy izao ny mpiandraikitra mpitety faritany iray: “Ankehitriny dia toa betsaka aoka izany ny zava-manahirana sy ny zava-tsarotra eo amin’ny fiainan’ny olona, hany ka voatery mampianatra azy ny fomba fiaina isika.” Ny zavatra ahin’ny olona avy hatrany amin’izao fotoana izao, dia mazava ho azy fa mihodinkodina eo amin’ny tenany sy ny fianakaviany ary ny fitebitebeny. Ireo no zavatra izay resahiny indrindra rehefa tafaraka izy ireo. Mila mitadidy izany ao an-tsaina isika eny amin’ny asa fanambarana ataontsika.
4 Ny Fanjakan’Andriamanitra no hany fanantenana azo antoka ny amin’ny hoavy: Ny ankamaroan’ny olona dia tsy manam-patokiana firy ny fitondram-panjakan’olombelona. Mihevitra izy ireo fa tsy misy fanantenana hahita tontolo iray tsaratsara kokoa amin’ny androm-piainany. Tsy nanome azy ireo fototra hananana fanantenana ny fivavahan-diso. Izany no antony ilan’ny olona indrindra handre ilay vaovao tsara momba ny Fanjakan’Andriamanitra. Asehoy ny fomba hitondran’izy io vahaolana amin’ny farany amin’ny zava-manahirana rehetra atrehin’ny olombelona.
5 Ny Baiboly no hany loharanon-tari-dalana azo ianteherana: Ny sarabambem-bahoaka amin’izao andro izao dia notarihin’ireo mpitondra, izay niantehitra tamin’ny fahendren’olombelona sy ny filozofian’izao tontolo izao, tamin’ny lalan-diso. Voatery hahatakatra ny olona amin’ny farany fa “tsy an’ny olombelona ny làlan-kalehany”. (Jer. 10:23). Ny lesona sarobidy indrindra azon’izy ireo nianarana dia ny hoe: tsy maintsy ‘matoky an’i Jehovah amin’ny fony rehetra sy tsy hiankina amin’ny fahalalany’ izy ireo. (Ohab. 3:5). Na dia niova aza ny andro iainantsika, ny Baiboly dia tsy mba niova. Noho izany, eo amin’ny fanompoantsika, dia tokony hanasongadina foana ny Tenin’Andriamanitra isika, ka hampianatra ny hafa hankasitraka ny tari-dalany araka an’Andriamanitra, sy azo tamin’ny tsindrimandry. (2 Tim. 3:16, 17). Mba hanatanterahana izany zava-kendrena izany, dia tsy maintsy mihazona eo anoloan’ny olona ny maha-zava-dehibe ny Baiboly isika amin’ny fakana teny ao aminy ao amin’ny fomba fampisehontsika, sy amin’ny fampiasana azy io mba hamaliana ny fanontanian’izy ireo ary amin’ny fampirisihana ny ilana hianatra azy io sy hampihatra ny fahendrena azo ampiharina raketiny.
6 Na dia amin’izao andro iainantsika miova izao aza, ny zava-kendrentsika eo amin’ny fanompoana dia mitovy ihany. Tsy maintsy mitory ilay vaovao tsara momba ilay Fanjakana isika sy mamboly fatokiana ny Tenin’Andriamanitra ary manampy ny hafa hahita ny ilany hiaraha-mianatra ny Baiboly amintsika. Izay lazaintsika dia tsy maintsy misy ifandraisany amin’ny zavatra ilain’ny olona anaovantsika fanambarana, amin’izao fotoana izao. Amin’ny fanaovana izany, dia mety ho tonga mpizara ny vaovao tsara amin’ny hafa isika ka amin’izay dia hahazo olona betsaka indrindra. — 1 Kor. 9:19, 23, NW.