“Hifankatia ve ny Olona Rehetra Indray Andro Any?”
1 Hisy hafatra mahafinaritra sy mandrisika ary manafana ny fo hambara maneran-tany amin’ny fiteny 169. Inona izany hafatra izany? Ary amin’ny fomba ahoana no hanaparitahana azy?
2 Ilay hafatra dia mahakasika ny fitiava-namana. Izany dia ho hita ao amin’ny Vaovao Momba Ilay Fanjakana No. 35, mitondra ny lohateny hoe “Hifankatia ve ny Olona Rehetra Indray Andro Any?” Io Vaovao Momba Ilay Fanjakana io dia mandinika fohifohy ny toe-draharaha maneran-tany, amin’ny fampisehoana fa ny tsy fahampiam-pitiavana eo amin’ny olona no antony fototra mahatonga ny fahorian-tsaina sy ny fanaintainana maro aoka izany. Manazava izy hoe nahoana, amin’ny androntsika indrindra indrindra, no nihamangatsiaka ny fitiava-namana, sy ny hoe midika ho inona ho an’ny hoavy izany.
3 Fanampin’izany, ny Vaovao Momba Ilay Fanjakana No. 35 dia mampiseho fa ny tena fitiava-namana dia misy eo anivon’ireo olona an-tapitrisany maro miaina eo amin’izao tontolo izao ankehitriny. Izy io dia mampahafantatra ireo izay mandray anjara amin’io famelomana indray ny Kristianisma tany am-boalohany io — fanompoam-pivavahana tamin’ny taonjato voalohany, fantatra noho ny fitiava-namana araka ny nampianarin’i Jesosy Kristy. — Lioka 10:25-37.
4 Ny Vaovao Momba Ilay Fanjakana No. 35 dia mifarana amin’ny fanazavana ny fomba hahatongavan’izao tontolo izaon’ny olombelona manontolo ho amin’ny fampiharana ny fitiava-namana eo ambany fitantanan’ny Fanjakan’Andriamanitra tarihin’i Kristy. Izay mamaky io hafatra io dia ampirisihina haka ilay bokikely hoe Inona no Takin’Andriamanitra Amintsika? ka hianatra ny fomba hahatongavana ho tapany amin’io fandaharana feno fitiavana maneran-tany io, izay lazalazaina amin’ny an-tsipiriany ao amin’ny Tenin’Andriamanitra.
5 Iza no hanaparitaka an’io hafatra io? Ny Vavolombelon’i Jehovah maneran-tany dia hizara io hafatra momba ny fitiava-namana io amin’ny olom-pantatr’izy ireo sy ny mpiara-monina ary ny havany, mandritra ny volana Oktobra sy Novambra. Izay rehetra mahafeno fepetra dia ampirisihina handray anjara amin’ny fizarana amin’ny olona ny Vaovao Momba Ilay Fanjakana No. 35.
6 Ny zava-kendrena farany amin’itỳ ezaka manokana itỳ, dia ny hanaitra ny fahalianan’ny olona ho amin’ny fanaovana fianarana ny Baiboly amin’ny bokikely Takina, na amin’ny boky Fahalalana. Fanampin’izany, ny ezaka ataon’ny tsirairay amin’ny mpanompon’i Jehovah amin’ny fo manontolo, dia hanao fanambarana lehibe ho an’ilay Andriamanitry ny fitiavana, dia i Jehovah, sy ho an’ny Zanany, Jesosy Kristy.