Ny Sekolin’ny Fanompoana Teokratika Amin’ny 1998
Ny hoe nahita fianarana dia midika hoe “nampianarina na novolavolaina tamin’ny fahalalana na fahaizana manokana iray”. Amin’ny alalan’ny Sekolin’ny Fanompoana Teokratika, dia ampiofanina tsy tapaka amin’ny fahalalana an’Andriamanitra isika. Afa-tsy izany koa, ny fandraisantsika anjara amin’io sekoly io dia mahatonga antsika ho afaka hampitombo ny fahaizantsika miresaka sy mampianatra. Ny fandaharan’ny sekoly ho an’ny 1998 dia hanome antsika fahafahana maro hanao fandrosoana ara-panahy bebe kokoa.
Rehefa mandinika ny fandaharan’ny sekoly ho an’ny taona ho avy ianao, dia hahamarika fa nanampy ao amin’ilay fandaharam-pianarana amin’ny 1998, ny boky Fahasambaram-pianakaviana, ka hataon’ny Anjara No. 3 izany. Ary ho fampahatsiahivana, dia tsy tokony hisy hihoatra ny fotoana ao amin’ny fandaharan’ny sekoly.
Endrika vaovao iray: Ho an’ny tombontsoantsika manokana, dia napetraka amin’ny fonon-teny mahitsy aorian’ny nomeraon’ny hira avy hatrany ny “Fandaharam-pamakiana Baiboly Fanampiny” ho an’ny herinandro tsirairay. Na dia tsy hisy amin’ireo anjara amin’ny fandaharan’ny sekoly isan-kerinandro aza hiorina amin’izy io, dia ataovy zava-kendrenao ny hanaraka azy io. Hahatonga anao hanana fahazarana hamaky ny Baiboly isan’andro izany, raha mbola tsy manao izany ianao.
Mba hahazoana fanazavana fanampiny mahakasika ny anjara sy ny torohevitra ary ny famerenana an-tsoratra, dia vakio amim-pitandremana, aza fady, ny toromarika hita ao amin’ny “Fandaharana Amin’ny Sekolin’ny Fanompoana Teokratika Amin’ny 1998”, sy ny pejy faha-3 amin’ny Fanompoantsika Ilay Fanjakana Oktobra 1996.
Raha mbola tsy nisoratra anarana tamin’ny Sekolin’ny Fanompoana Teokratika ianao, dia manasa anao izahay mba hanao izany izao. Io sekoly tsy manam-paharoa io dia mbola manohy mihazona ny anjara asa lehibe tanany eo amin’ny fampiofanana ireo mpanompon’i Jehovah manetry tena sy be fandavan-tena, mba ho tonga minisitr’i Jehovah mahay kokoa. — 1 Tim. 4:13-16.