Mifampahereza Amin’ny Fanomezana Valin-teny any Amin’ireo Fivoriana
1 Ampirisihina isika mba ‘hifandrisika ho amin’ny fitiavana sy ny asa tsara’, ao amin’ny Hebreo 10:24. Voafaoka amin’izany ny fifampaherezana amin’ny alalan’ny fanomezana valin-teny misy heviny any amin’ireo fivorian’ny kôngregasiôna. Nahoana isika no tokony hanome valin-teny? Ahoana no ahafahantsika manao izany? Iza no mandray soa amin’izany?
2 Eritrereto ny soa raisinao imbetsaka avy amin’ny fihainoana ny hafa manome valin-teny tsotra sy mazava izay manatsara ny fahazoanao hevi-javatra sy manatanjaka ny ara-panahinao. Manana tombontsoa hanao toy izany ho azy ireo koa ianao. Rehefa mandray anjara ianao, dia mampiseho ny fanirianao ‘hanao fanomezana ara-panahy’ ho fampaherezana izay rehetra manatrika. — Rom. 1:11, 12, NW.
3 Ny fomba anomezana valin-teny tsara: Aza manome valin-teny lava, izay mahafaoka ny hevitra rehetra ao amin’ilay fehintsoratra. Matetika ny valin-teny lava be no tsy manasongadina ilay valiny voafaritra tsara sady mety hanakivy ny hafa amin’ny fandraisana anjara. Tokony ho fohy, sy hamaly mivantana ilay fanontaniana vita pirinty ny valin-teny voalohany amin’ilay fehintsoratra. Avy eo, ireo manome valin-teny fanampiny dia ho afaka hanao fampiharana mahasoa na hampiseho ny fomba iharan’ireo andinin-teny. Jereo ny Boky ho An’ny Sekoly, pejy faha-90-92.
4 Manomàna valin-teny fohy mialoha raha miteraka fanahiana ho anao ny fieritreretana ny amin’ny fanomezana valin-teny, ary angataho ilay mpitarika mba hanondro anao amin’izany fehintsoratra izany. Rehefa avy manao izany any amin’ny fivoriana vitsivitsy ianao, dia hanjary ho mora kokoa aminao ny fandraisana anjara. Tsarovy fa nampiseho tsy fahampiam-pitokisana ny fahaizany miteny ampahibemaso i Mosesy sy i Jeremia. (Eks. 4:10; Jer. 1:6). Nanampy azy ireo mba hiteny anefa i Jehovah, ary hanampy anao koa izy.
5 Iza avy no handray soa avy amin’ny valin-teninao? Ny tenanao mihitsy no mandray soa satria mandentika ny fahamarinana mafimafy kokoa ao an-tsainao sy ao am-ponao ny valin-teninao, ka hahamora kokoa ny fitadidianao ilay fanazavana, atỳ aoriana. Mandray soa koa avy amin’ny fandrenesana ny valin-teninao mampahery ny hafa. Mahazo fampaherezana isika rehefa manao ezaka mba haneho ny finoany any amin’ireo fivorian’ny kôngregasiôna ny rehetra, na za-draharaha, na tanora, na saro-kenatra, na vaovao.
6 Mahazo antoka isika fa hahita ny ‘hatsaran’ny teny atao amin’ny andro mahamety azy’ rehefa ampiasaina mba hifampaherezana any amin’ireo fivoriana, izy io! — Ohab. 15:23.