Ny Fiaraha-miasan’ny Mpianakavy mba Samy Handray Anjara Feno — Amin’ny Fivorian’ny Kôngregasiôna
1 Tsy maintsy manaraka ilay didy mba hiara-mivory ao amin’ny fivorian’ny kôngregasiôna, ny fianakaviana kristianina. (Heb. 10:24, 25). Noho ny fiaraha-miasa tsara, dia afaka ny hahomby ny rehetra eo amin’ny fanomanana sy ny fanatrehana ary ny fandraisana anjara amin’ny fivoriana. Samy hafa ny tarehin-javatra misy ny fianakaviana, nefa misy zavatra izay azon’ny lehilahy kristianina manambady, ny vehivavy mpino manambady, na ny ray na reny mitaiza irery ny zanany, atao mba hampitomboana ny firaisan-tsain’ny fianakaviana eo amin’ny raharaha ara-panahy, na firy na firy ny isan’ny ankizy ao an-trano sy ny taonany. — Ohab. 1:8.
2 Makà fotoana mba hanomanana: Miara-miasa ny mpianakavy mba hahazoana antoka fa vonona tsara ho amin’ny fivorian’ny kôngregasiôna ny tsirairay. Maro no miara-mandinika ny lahatsoratry ny Fianarana Ny Tilikambo Fiambenana isan-kerinandro. Fianakaviana maro no manomana ny Fianarana ny Bokin’ny Kôngregasiôna na mamaky ny Baiboly isan-kerinandro. Ny zava-kendrena dia ny hampidirana ao an-tsaina ireo hevi-dehibe, alohan’ny hanatrehana fivoriana. Amin’izany fomba izany, dia handray soa bebe kokoa avy amin’izay reny ny rehetra ary ho voaomana handray anjara rehefa misy ny fahafahana. — 1 Tim. 4:15.
3 Manàna fikasana handray anjara: Tokony hanana tanjona ny hanambara ny fanantenana eo anatrehan’ny hafa amin’ny fanomezana valin-teny atỳ amin’ny fivoriana, ny tsirairay ao amin’ny fianakaviana. (Heb. 10:23). Mila fanampiana na fampirisihana ve ny mpianakavy iray mba hanaovana izany? Fanampiana inona no ilain’ny tsirairay mba hanomanana ny anjarany amin’ny Sekolin’ny Fanompoana Teôkratika? Ankasitrahan’ny vehivavy rehefa manombo-javatra ny vadiny, ary angamba izy hanolotra fanoharana mety iray na faritra tena misy iray. Tsy tokony hihevitra ny ray aman-dreny fa tsy maintsy manomana ny anjaran’ireo zanany madinika izy ireo. Mety hanakana ny finiavan’ireo ankizy hanao zavatra ny fanaovana izany. Afaka manampy ireo zanany madinika sy mihaino azy ireo anefa ireo ray aman-dreny, rehefa manao famerenana amin’ny feo avo izy ireo. — Efes. 6:4.
4 Manaova fandaminan-javatra mba hanatrehana fivoriana: Azo ampianarina hatramin’ny fahakeliny mba hiakanjo sy ho vonona handeha any amin’ny fivoriana amin’ny fotoana voatondro, ny ankizy. Tokony hiara-miasa hanao ny raharaha ao an-trano ny mpianakavy mba tsy hisian’ny fahatarana. — Jereo ireo fanoloran-kevitra ao amin’ny boky Fahasambaram-pianakaviana, pejy 112, sy Manontany ny Tanora, pejy 316, 317.
5 Ny ray aman-dreny sy ny zanaka dia samy afaka misaintsaina ny tenin’i Josoa fahiny, izay nilaza hoe: “Raha izaho sy ny ankohonako kosa, dia hanompo an’i Jehovah izahay.” Aoka àry ianareo ho tapa-kevitra ny hiara-miasa mba samy handray anjara feno amin’ny fivorian’ny kôngregasiôna. — Josoa 24:15.