‘Vehivavy Izay Mikely Aina ao Amin’ny Tompo’
1 Nampiasa ireo teny ireo i Paoly mba hiresahana momba an’i Tryfena sy i Tryfosa, anabavy roa niasa mafy tao amin’ny kôngregasiônan’i Roma. Hoy izy momba an’i Persy, anabavy iray hafa: “Nikely aina fatratra tao amin’ny Tompo” izy. Nanao teny fankasitrahana an’i Foiby, izay nantsoiny hoe “mpiahy ny maro”, koa izy. (Rom. 16:2, 12). Ao amin’ny Soratra Masina, dia nosinganina manokana i Dorkasy, noho ‘ny asa soa sy ny fiantrana be dia be nataony’. (Asa. 9:36). Fitahiana toy inona moa ny fananana vehivavy araka ny fanahy tao amin’ny kôngregasiôna!
2 Moa ve isika mankasitraka ireo anabavy izay mikely aina ao amin’ny kôngregasiônantsika? Manao ny ampahany lehibe indrindra amin’ny asa fitoriana izy ireo, mitarika ny ankamaroan’ireo fampianarana Baiboly, ary manampy ny maro amin’ireo vaovao. Mandany fotoana be dia be koa izy ireo, anampiana ny zanany handroso ara-panahy. Manao ny anjarany koa ireo vehivavy kristianina mba hampitomboana ny fitiavana, ny fifaliana, ny fiadanana, ary ny zotom-po ao amin’ny kôngregasiôna. Manome ny fanohanany amin’ny lafiny maro izy ireo, mba hahafahan’ny vadiny sy ny mpianakaviny hafa hanao bebe kokoa eo amin’ny fanompoana an’i Jehovah.
3 Ireo anabavy ao amin’ny fanompoana manontolo andro: Anisan’ireo mikely aina mafy ao amin’ny Tompo ireo anabavy misionera. Maro amin’izy ireo no nanampy mba hitomboan’ny asa tany ivelan’ny taniny. Ao amin’ireo kôngregasiôna tsidihin’ny vadiny, ny vadin’ireo mpiandraikitra mpitety faritany dia be atao eny amin’ny saha fanompoana, ka mampahery anabavy maro. Tsy hatao ambanin-javatra koa ireo anabavy ao amin’ny Betela, izay manao fanompoana masina amin-jotom-po, ho fanohanana ny fandaminan’i Jehovah. Eo koa ireo anabavy mpisava lalana maharitra, izay manampy olona an’arivony maro hahafantatra ny fahamarinana, noho ny fiezahany amim-pahatokiana hidera an’Andriamanitra.
4 Mahita fahafaham-po lehibe eo amin’ny fomba fiainany feno fahafoizan-tena ireo vehivavy mahatoky ireo. (1 Tim. 6:6, 8). Mendrika ny teny fiderana sy izay fampaherezana ary fanohanana rehetra azontsika omena azy, izy ireo.
5 Ny vehivavy kristianina dia harena sarobidy ho an’ny fandaminan’i Jehovah, noho izy ireo manatontosa fanompoana amim-pahatokiana, izay fitahiana ho an’ny rehetra. Enga anie isika hanohy hankasitraka ny vehivavy toy izany, sy hivavaka mba hitahian’i Jehovah azy ireny, eo ‘am-pikelezany aina hatrany ao amin’ny Tompo’.