Manana Fahafoizan-tena ve Ianao?
1 Ny fankasitrahana ny notanterahin’i Jesosy Kristy ho an’ny olombelona tamim-pahafoizan-tena, dia tokony hanosika antsika rehetra hampiasa amim-pahafoizan-tena ny fahaizantsika sy ny herintsika ary ny tanjatsika. Miangavy toy izao ny Soratra Masina: ‘Atolory ny tenanareo ho fanatitra velona, masina, sitrak’Andriamanitra, dia [fanompoana masina, NW ].’ (Rom. 12:1). Ny fandinihan-tena tsy tapaka dia hanampy anao hahita raha mampiseho izany toe-tsaina izany, amin’ny fomba feno araka izay amelan’ny tarehin-javatra misy ny tenanao manokana, ianao.
2 Mba hikatsahana fahalalana ara-baiboly: Nanokana fotoana hamakiana sy hianarana manokana ny Baiboly tsy tapaka ve ianao? Mifikitra amin’izany fandaharana izany ve ianao? Fahazaranao ve ny manomana tsara ireo fivorian’ny Kongregasiona? Raha raim-pianakaviana ianao, moa ve ianao miara-mianatra ny Baiboly tsy tapaka amin’ny ankohonanao? Ny fanaovana ireo zavatra ireo dia mety hitaky fanaovana sorona ny fotoana laninao eo anoloan’ny televiziona na ny ordinatera na amin’ny fanaovan-javatra hafa. Kanefa, tena kely izany sorona izany, rehefa fantatrao fa hitarika anao ho amin’ny fiainana mandrakizay ny fotoana laninao hianarana ny Tenin’Andriamanitra! — Jaona 17:3.
3 Mba hampiofanana ny zanakao: Ny fotoana tsara indrindra mba hanombohana hianatra ny lalan’ny fahafoizan-tena dia eo amin’ny fahazazana. Ampianaro ny zanakao fa raha eo ny fotoana hilalaovana, dia tsy maintsy eo koa ny fotoana ho an’ny fanaovan-javatra teokratika. (Efes. 6:4). Asaivo manao raharaha ao an-trano izy ireo. Manaova fandaharana hiaraha-manao fanompoana tsy tapaka amin’izy ireo. Hamafiso amin’ny ohatra tsara omen’ny tenanao ny fampianaranao.
4 Mba hanaovana ny asan’ny kongregasiona: Mihatsara ny kongregasiona, rehefa manao sorona an-tsitrapo ny tsirairay, mba hanao zavatra ho tombontsoan’ny rehetra. (Heb. 13:16). Azonao atao ve ny mandany fotoana bebe kokoa eo amin’ny asa fitoriana ilay Fanjakana sy eo amin’ny fanaovana mpianatra? Afaka manolo-tena mba hanampy ireo marary, na ireo zokiolona, ve ianao, angamba amin’ny fitondrana azy ireo any amin’ny fivoriana?
5 Talohan’ny nanolorany ny ain’olombelona nananany ho sorona fara tampony, dia nanoro hevitra ny mpianany i Jesosy mba hifantoka amin’ny tombontsoan’ilay Fanjakana, ka hanao ny zavatra hafa rehetra eo amin’ny fiainany ho eo amin’ny toerana faharoa. (Matio 6:33). Ny fikatsahana izany toe-tsaina feno fahafoizan-tena izany dia hanome antsika ilay fahasambarana lehibe kokoa, raha mbola manompo an’i Jehovah amim-pifaliana koa isika.