‘Hozahan-toetra’ — Amin’ny Fomba Ahoana?
1 Noho ny fitomboana tsy an-kijanona ao amin’ny fandaminan’i Jehovah, dia ilaina foana hatrany ny hisian’ny rahalahy mahafeno fepetra mba ho mpanampy amin’ny fanompoana. Ny ankamaroan’ireo rahalahy mbola tsy voatendry, anisan’izany ny zatovo, dia maniry ny hanompo ao amin’ny kongregasiona. Mahatsapa tena ho ilaina sy ho mahavita zavatra izy ireo, rehefa omena asa fanampiny. Miankina amin’ny maha ‘voazaha toetra’ azy ireo ny fanaovany fandrosoana fanampiny. (1 Tim. 3:10). Ahoana no anatanterahana izany?
2 Ny andraikitr’ireo loholona: Anisan’ireo fepetra araka ny Soratra Masina, hita ao amin’ny 1 Timoty 3:8-13 ary takina amin’ny rahalahy iray mba hahatongavany ho mpanampy amin’ny fanompoana, ny hitsapan’ireo loholona ny fahaizan’io rahalahy io miantsoroka andraikitra. Mety hanendry azy hanampy amin’ny famoahana gazety sy boky, ny fikarakarana mikrô, ny fikojakojana ny Efitrano Fanjakana, sy ny toy izany, izy ireo. Handinika ny fihetsiny eo anoloan’ny asa nanendrena azy, ireo loholona. Hojereny ilay rahalahy raha azo ianteherana, marim-potoana, mazoto, maotina, be fandavan-tena, ary mahay mifanaraka tsara amin’ny hafa. (Fil. 2:20). Ohatra tsara ve izy, raha ny amin’ny fitafiany sy ny fisehoany ankapobe? Mahatsapa andraikitra ve izy? Irin’izy ireo ho hita amin’ny ‘fitondran-tenany tsara ny asany amin’ny fahalemem-panahin’ny fahendrena’. (Jak. 3:13). Tena miezaka hitondra fanampiana ao amin’ny kongregasiona ve izy? Manatanteraka ilay didin’i Jesosy mba ‘hanao mpianatra’, amin’ny fandraisana anjara amin-jotom-po amin’ny fanompoana, ve izy? — Matio 28:19; jereo Ny Tilikambo Fiambenana 1 Desambra 1990, pejy 18-28.
3 Na dia tsy ferana aza ny taona farany ambanin’ny olona tendrena ho mpanampy amin’ny fanompoana, dia miresaka momba ireny rahalahy ireny ho “lehilahy izay manompo”, ny Baiboly. Tsy hantenaintsika velively ho eo amin’ny fiandohana na ao anatin’ny taona maha zatovo azy, izy ireo, indrindra satria voalaza ao fa mety hanam-bady aman-janaka izy. (1 Tim. 3:12, 13, NW ). Ny lehilahy toy izany dia tsy tokony ho resin’ny “filan’ny tanora fanahy”, fa tokony ho olona tsy manao kitoatoa, ka hanana laza tsara sy feon’ny fieritreretana madio eo anatrehan’Andriamanitra sy ny olona. — 2 Tim. 2:22.
4 Na dia mahasoa aza ny fahaizana voajanahary, dia ny fihetsika sy ny toe-tsain’ilay olona no tena zava-dehibe. Maniry amim-panetren-tena ny hidera an’Andriamanitra sy hanompo ny rahalahiny ve ny rahalahy iray? Raha izany no izy, dia hitahy ny ezaka ataony mba hanaovana fandrosoana ao amin’ny kongregasiona i Jehovah.