Valin’ny Fanontanianareo

◼ Iza no tokony hanao ny vavaka ao amin’ny fivorian’ny kongregasiona?

Tapany tena lehibe amin’ny fanompoam-pivavahantsika ny vavaka ao amin’ny kongregasiona. Tombontsoa sarobidy sady andraikitra mavesa-danja ny misolo tena ny hafa eo anatrehan’i Jehovah. Koa satria zava-dehibe toy izany ny vavaka, dia mila maneho fahaiza-mitsara zavatra ireo loholona, rehefa manapa-kevitra hoe rahalahy iza avy no mahafeno fepetra mba hanao ny vavaka ao amin’ny fivoriana. Ireo rahalahy vita batisa misolo tena ny kongregasiona dia tokony ho minisitra kristianina matotra, izay fantatra ho ohatra tsara sady hajain’ny kongregasiona. Ny vavaka feno fanajana ataony dia tokony hampiharihary fa manana fifandraisana tsara amin’i Jehovah Andriamanitra izy. Misy foto-pitsipika lehibe ao amin’ilay lahatsoratra hoe “Vavaka Ampahibemaso avy Amin’ny Fo Feno Fanetren-tena”, ao amin’Ny Tilikambo Fiambenana 15 Aogositra 1986, mba hanampiana indrindra an’ireo izay mivavaka ampahibemaso ho an’ny kongregasiona.

Ireo loholona dia tsy hifidy rahalahy iray mba hanao ny vavaka, raha fantatra ho manana fitondran-tena mampisalasala na tsy matotra izy io. Tsy tokony hofidina koa ny rahalahy iray izay toa tsy faly lava na mitady hampiasa ny vavaka ampahibemaso mba hamborahana tsy fifanarahana amin’olon-kafa. (1 Tim. 2:8). Na dia mety ho efa vita batisa aza ny zatovo iray, dia tsy maintsy mamaritra ireo loholona raha manana ny fahamatorana ara-panahy mba hivavaka ho an’ny kongregasiona izy. — Asa. 16:1, 2.

Indraindray, amin’ny fivoriana ho amin’ny fanompoana eny amin’ny saha, dia mety ho voatery hanao ny vavaka ny anabavy vita batisa iray, raha tsy misy rahalahy mahafeno fepetra eo, mba hisolo tena an’ilay antokon’olona. Hila hanao saron-doha mety izy amin’izay. Raha toa ka tsy hisy rahalahy mahafeno fepetra amin’ny fivoriana sasany ho amin’ny fanompoana eny amin’ny saha, dia tokony hanendry anabavy iray mahafeno fepetra mba hitarika, ireo loholona.

Ny mpitari-draharaha amin’ny Fivoriana Ampahibemaso mazàna no manolotra ny vavaka fanokafana. Kanefa, amin’ireo fivoriana hafa, rehefa betsaka kokoa ireo rahalahy mahafeno fepetra, dia rahalahy hafa noho ilay manomboka ny fivoriana na ilay manao ny anjara farany no azo angatahina hanao ny vavaka fanokafana na famaranana. Na ahoana na ahoana, ilay rahalahy angatahina hivavaka ao amin’ny fivorian’ny kongregasiona dia tokony hilazana mialoha, mba hahafahany hieritreritra momba izay holazainy. Amin’izay, dia ho vavaka misy heviny sy amin-kafanam-po ary mifanentana amin’ilay fivoriana no hataony.

Tsy voatery ho lava ny vavaka toy izany. Rehefa manao vavaka ampahibemaso ny rahalahy iray, mazàna dia ho mora azo kokoa izay lazainy, raha mitsangana izy, ka mafy tsara ny feony ary miteny mazava tsara izy. Izany dia hamela an’ireo tafavory rehetra handre ilay vavaka sy hanao hoe “Amena” amim-pahatsoram-po, amin’ny faran’ilay vavaka. — 1 Tant. 16:36; 1 Kor. 14:16.