“Hain’Andriamanitra ny Zavatra Rehetra”
1 Ny fitoriana ny hafatra momba ilay Fanjakana maneran-tany no asa lehibe indrindra ataon’ny kongregasiona kristianina. (Matio 24:14) Asa goavana izany. Ho an’ny maro, dia toa mitaky mihoatra lavitra noho izay mety ho vitantsika izany. Ho an’ny hafa, dia saika tsy azo eritreretina ho vita io asa io, satria esoina sy toherina ary enjehina isika. (Matio 24:9; 2 Tim. 3:12) Mino mafy ireo be fisalasalana fa zavatra tsy ho vita io asa io. Hoy anefa i Jesosy: “Hain’Andriamanitra ny zavatra rehetra.”—Matio 19:26.
2 Ohatra tsara hotahafina: Nanohitra an’i Jesosy izao tontolo izao fony izy nanomboka ny fanompoany. Mba hisakanana azy tsy hahomby, dia nanala baraka azy araka izay azony natao ireo mpanohitra, ary farany dia namono azy rehefa avy nampijalijaly azy. Tamin’ny farany anefa, dia nilaza toy izao tamin-toky i Jesosy: “Izaho efa naharesy izao tontolo izao.” (Jaona 16:33) Tena zava-bita sarotra inoana tokoa izany!
3 Nahery fo sy nazoto toy izany teo amin’ny fanompoana kristianina ny mpianatr’i Jesosy. Maro no nokaravasina, nokapohina, nogadraina, ary novonoina mihitsy aza. Kanefa, ‘faly izy ireo, satria natao mendrika hitondra fahafaham-baraka ho voninahitr’izany anarana izany’. (Asa. 5:41) Na dia teo aza izany zava-tsarotra rehetra izany, dia vitan’izy ireo ilay asa izay toa tsy azo notanterahina, dia ny asa fitoriana ny vaovao tsara “hatramin’ny faran’ny tany”.—Asa. 1:8; Kol. 1:23.
4 Ahoana no ahitantsika fahombiazana? Mazoto mitory ilay Fanjakana koa isika, na dia miatrika toe-javatra sarotra aza. Mahita fahombiazana isika, na dia eo aza ny fandrarana, ny fanenjehana, ny fampidirana am-ponja ary ny herisetra natao hampitsaharana antsika. Ahoana no anatanterahana izany? “Tsy amin-kery na amim-pahatanjahana, fa amin’ny Fanahiko, hoy Jehovah, Tompon’ny maro”. (Zak. 4:6) Tsy misy na inona na inona afaka mampitsahatra ny asantsika satria manohana antsika i Jehovah!—Rom. 8:31.
5 Tsy tokony ho menatra, na hatahotra, na hihevi-tena ho tsy mahay mihitsy isika, rehefa mitory. (2 Kor. 2:16, 17) Manana antony mahery mba handrosoana amin’ny fampielezana ny vaovao tsara momba ilay Fanjakana isika. Noho ny fanampian’i Jehovah, dia hahavita izay ‘tsy haintsika’, isika!—Lioka 18:27.