Manakana Anao Tsy Hitory ve Izy Io?
1 Be atao ny ankamaroan’ny olona. Anisan’ny olona be atao indrindra ny Vavolombelon’i Jehovah, satria eo ny fianarana Baiboly sy ny famonjena fivoriana, ary ny fanompoana. Mbola eo koa anefa ny asa fivelomana, ny fikarakarana tokantrano, ny entimody ary ny andraikitra maro hafa izay samy mitaky fotoana. Tena zava-tsarotra izany, indrindra ho an’ny raim-pianakaviana.
2 Angamba tsy maintsy miasa be kokoa sy mafy kokoa ny loham-pianakaviana mba hivelomana, satria sarotra ny fiainana any amin’ny toerana maro. Rehefa mitaky fotoana sy hery be loatra aminy anefa ny asa fivelomana, dia kely sisa ny fotoana hitoriany. Mety hihevitra ny sasany fa voafetra ihany ny fotoana azony anaovana fanompoana, satria tsy maintsy mamelona ny ankohonany izy. (1 Tim. 5:8) Marina fa mila miezaka mafy isika, vao mahazo izay zavatra ilaina eo amin’ny fiainana. Tsy voatery hanakana ny olona iray tsy hitory anefa izany. (Marka 13:10) Tsara àry raha mandinika ny toe-javatra misy antsika ankehitriny isika.
3 Koa satria miova foana ny sehatr’ity tontolo ity, dia mety hirona hampitombo tafahoatra ny fotoana hiasany ny raim-pianakaviana, mba hoe hanangonany vola hitsinjovana ny vodiandro ho merika. (1 Kor. 7:31) Marina fa mety ho afaka hividy zavatra vaovao na ho afaka hampitombo ny fialam-boly ianao rehefa miasa be kokoa. Ho sambatra sy ho afa-po kokoa ve anefa ny fianakavianao amin’izay, raha lasa natao ambanin-javatra ny zavatra ara-panahy sy ny famonjena fivoriana tsy tapaka? Azo antoka fa tsy maniry hamela na inona na inona hanembantsembana ny fahasalamantsika ara-panahy isika. Fahendrena àry ny hanarahantsika ny torohevitr’i Jesosy hoe tokony ‘hihary harena any an-danitra’ sy ‘hanankarena ny amin’Andriamanitra’ isika.—Matio 6:19-21; Lioka 12:15-21.
4 Katsaho aloha ny tombontsoan’ilay Fanjakana: Nampianatra ny mpanara-dia azy i Jesosy, mba hanao ny zavatra ara-panahy eo amin’ny toerana voalohany. Hoy izy: “Aza manahy hianareo ka manao hoe: Inona no hohaninay? na: Inona no hosotroinay? na: Inona no hotafinay?” Nahoana no nilaza izany izy? Hoy izy: “Fa fantatry ny Rainareo Izay any an-danitra fa tokony ho anareo izany rehetra izany.” Raha tena mino izany isika, dia tsy hisy hanakana antsika tsy hanaraka izao tenin’i Jesosy izao: “Katsaho aloha ny fanjakany sy ny fahamarinany, dia hanampy ho anareo izany [zavatra ilaina] rehetra izany.” Hataon’Andriamanitra tokoa izay hananantsika ireo zavatra tena ilaina ireo! (Matio 6:31-33) Tsy tokony hiahy be loatra ny amin’ny zavatra ara-nofo intsony àry isika amin’izao fotoana izao, na haniry ho tsara toerana eto amin’ity tontolo efa ho rava ity.—1 Pet. 5:7; 1 Jaona 2:15-17.
5 Matoa isika miasa dia ny mba hahazoana izay ilaina. Inona avy anefa no ilaintsika? Hoy ny apostoly Paoly: “Raha manan-kanina sy fitafiana isika, dia aoka hianina amin’izany.” Ta hahazo zavatra bebe kokoa noho izany ve isika? Raha izany no izy, dia mety hihatra amintsika izao zavatra efa nampitandreman’i Paoly izao: “Izay ta-hanan-karena dia latsaka amin’ny fakam-panahy sy ny fandrika ary ny filana maro tsy misy antony sady mandratra, izay mandentika ny olona ao amin’ny fandringanana sy ny fahaverezana.” (1 Tim. 6:8, 9; Matio 6:24; Lioka 14:33) Ahoana no ahafantarana fa voahelingelin’ny faniriana tafahoatra isika?
6 Raha faran’izay kely ny fotoana ahafahantsika manompo noho ny asantsika, na raha hadinontsika fa mila manao sorona noho ny vaovao tsara isika, dia mila hovana ny fomba fijerintsika ny amin’izay zava-dehibe kokoa. (Heb. 13:15, 16) Hanampy antsika handresy io vato misakana ny fitoriantsika io ny fananana fiainana tsotra kokoa. Ny tombontsoan’ilay Fanjakana no tokony handaniantsika hery sy fotoana voalohany indrindra.
7 Tsy very maina ny ezaka ataontsika: Mampirisika antsika i Paoly mba ‘hahefa be mandrakariva amin’ny asan’ny Tompo, satria fantatsika fa tsy foana tsy akory ny fikelezantsika aina ao amin’ny Tompo.’ (1 Kor. 15:58) Ny asa fitoriana momba ilay Fanjakana sy ny fanaovana mpianatra no “asan’ny Tompo” lehibe indrindra. (Matio 24:14; 28:19, 20) Mba hahafahana handray anjara betsaka araka izay azo atao, dia tokony hanana fandaharam-potoana hanaovana fanompoana isan-kerinandro isika, ary hiezaka mba tsy hanao zavatra hafa amin’io fotoana io. (Efes. 5:15-17) Amin’izay, na ny asantsika, na ny zavatra hafa, dia samy tsy hanelingelina ny fanompoantsika.
8 Tsapantsika fa mahasambatra tokoa ny manome rehefa manolo-tena hizara ny fahamarinana ara-baiboly amin’ny hafa isika. (Asa. 20:35) Afaka mibanjina ny hoavy amim-pahatokiana isika amin’ny fanohizana ny asa fitoriana momba ilay Fanjakana, satria ‘Andriamanitra tsy mba tsy marina hanadino ny asantsika sy ny fitiavana izay nasehontsika ho voninahitry ny anarany.’—Heb. 6:10.