Misakafo Tsara Ara-panahy ve Ianao?
1 ‘Izay voky no maharaka ny namany’, hoy ny fitenenana. Eny tokoa, ny sakafo hanintsika no mampahatanjaka sy mahasalama antsika. Misy vokany tsara na ratsy eo amintsika koa ny fahazarantsika misakafo ara-panahy, satria hoy i Jesosy: “Tsy mofo ihany no hiveloman’ny olona, fa ny teny rehetra izay aloaky ny vavan’Andriamanitra.” (Matio 4:4) Misakafo tsara ara-panahy àry ve ianao, sa miavon-kanina? Mihinana maimaika ve ianao, sa manokana fotoana tsy tapaka mba hankafizana sakafo ara-panahy mahavelona sy voalanjalanja?
2 Diniho ny fahazaranao misakafo: Manome “hanina amin’ny fotoana” sy “zavatra matavy” ho antsika, amin’ny alalan’ny mpanompo mahatoky sy malina, i Jehovah. (Matio 24:45; Isaia 25:6) Tsy maintsy miezaka isika mba hisakafo tsara ara-panahy, raha te handray soa feno amin’ireny sakafo nomena tamim-pitiavana ireny.
3 Manontania tena hoe: ‘Mamaky isan’andro ny andinin-teny ho an’ny andro sy ny fanazavana azy ve aho? Mamaky sy misaintsaina ny Baiboly isan’andro ve aho? Manomana ireo fivoriana ve aho ka mianatra mialoha ny zavatra hodinihina? Efa namaky ireo boky nivoaka farany ve aho, anisan’izany ny boky voalohany amin’ny Faminanian’i Isaia—Fahazavana ho An’ny Olombelona Rehetra?’
4 Nampanantena i Jesosy hoe: “Sambatra ny noana sy mangetaheta ny fahamarinana; fa izy no hovokisana.” (Matio 5:6) Aoka àry ianao hisakafo tsara ara-panahy, izany hoe fenoy fahalalana an’Andriamanitra ny sainao sy ny fonao.