Tokony Hoderaina Indrindra i Jehovah
Hankalazaina ny 16 Aprily ny Sakafo Harivan’ny Tompo
1 Mientam-po erỳ isika, arakaraka ny anatonan’ny 16 Aprily 2003. Hankalaza ny nahafatesan’i Jesosy isika amin’io alina io. Hidera ny anaran’i Jehovah isika, miaraka amin’ny mpiara-manompo an-tapitrisa eran-tany. Mendrika ny hoderaina tokoa i Jehovah noho izy nanome ny avotra. Amin’ny alalan’izy io no handrotsahany fitahiana mahatalanjona ho an’ny olombelona mankatò. Mihoby amin’ny fo rehetra àry isika, toa an’ilay mpanao salamo manao hoe: “Lehibe Jehovah ka tokony hoderaina indrindra.”—Sal. 145:3.
2 Tokony hisaintsaina ny hatsaram-panahin’i Jehovah Andriamanitra isika amin’io fotoana io. Tokony hotadidintsika koa fa adidintsika ny mankasitraka azy, noho izy naniraka “ny Zanani-lahy Tokana tamin’izao tontolo izao, mba hahavelona antsika amin’ny alalany.” (1 Jaona 4:9, 10) Vao mainka tsapantsika fa ‘mamindra fo sy miantra ary be famindram-po’ i Jehovah, rehefa mankatò ilay didy hankalaza ny Sakafo Harivan’ny Tompo isika. (Sal. 145:8) Ny avotra tokoa no fanehoam-pitiavana lehibe indrindran’i Jehovah ho an’ny olombelona. (Jaona 3:16) Voatosika hidera azy isika rehefa misaintsaina ny fitiavany sy ny tsy fivadihan’i Jesosy. Mbola hidera an’i Jehovah mandrakizay koa isika, satria noho ny fitiavany tsy manam-petra no ahazoantsika fiainana mandrakizay.—Sal. 145:1, 2.
3 Ampio ny hafa hidera an’i Jehovah: Ny avotra no fanomezana tsara indrindra nomen’Andriamanitra. Ny fahatakarantsika izany dia manosika antsika hanasa ny hafa hidera an’i Jehovah miaraka amintsika. Nahazo tsindrimandry hanoratra toy izao ny mpanao salamo: “Hanonona ny fahatsiarovana ny haben’ny fahatsaranao izy sy hihoby ny fahamarinanao.” (Sal. 145:7) Tamin’ny taon-dasa fotsiny, ohatra, dia nanokana ora arivo tapitrisa mahery ny Vavolombelon’i Jehovah mba hitoriana. Olona maherin’ny 5 100 teo ho eo no natao batisa isan-kerinandro. Mety hisy tokoa ny fitomboana raha heverina ireo 15 597 746 nanatrika ny Fahatsiarovana, anisan’izany ireo 9 tapitrisa mahery mbola tsy midera an’i Jehovah, satria mbola tsy mpitory ny vaovao tsara! Mahafaly antsika mpitory ilay Fanjakana ny miresaka ny vaovao tsara sy mampitodika ny olona ho amin’i Jehovah sy ny Zanany ary ilay Fanjakana.
4 Fomba tsara hampirisihana ny olona hanome voninahitra an’i Jehovah ny fanasana azy ireo hankalaza ny Sakafo Harivan’ny Tompo miaraka amintsika. Efa nataonao ve ny lisitr’ireo olona tianao hasaina, sy ireo mila hampahatsiahivina ny andro sy ora hanaovana ilay fankalazana? Efa nomenao fanasana ve izy rehetra ireo? Raha tsia, dia hararaoty ny fotoana sisa tavela hanasana azy ireo. Hazavao amin’izy ireo ny antony hanaovana ilay fankalazana. Amin’ny andron’ny Fahatsiarovana, dia arahabao ireo vahiny, ary ataovy tsapany fa raisina an-tanan-droa izy. Ampifankahalalao amin’ny hafa izy, ary derao noho ny fahatongavany.
5 Mety handrisika ireo vaovao handroso ara-panahy ny fanatrehana ny Fahatsiarovana. Nisy mpianatra ny Baiboly tonga nanatrika ny Fahatsiarovana, na dia tena sarotra aminy aza ny mandeha amin’ny toerana be olona, noho ny zavatra nanjo azy. Rehefa nanontaniana ny heviny momba ilay fivoriana, dia hoy izy: “Alina faran’izay niavaka iny natrehiko iny.” Nanomboka hatreo izy dia nivory foana.
6 Aorian’ny Fahatsiarovana: Inona no azo atao mba hanampiana ireo liana ho tonga mpidera an’i Jehovah? Hijery tsara izay vaovao nanatrika Fahatsiarovana ny anti-panahy, ary haniraka mpitory mahay hitsidika haingana azy ireny. Ireo mpitory ireo indray no hiara-midinika amin’izy ireny ny zavatra mamelombelona nianarany sy hitany nandritra ilay fankalazana. Mety hisy amin’izy ireny haniry hianatra Baiboly. Tokony hasaina hanatrika ny fivoriana rehetra alamin’ny fiangonana koa izy ireny, satria mampitombo ny fahalalany ny Baiboly ny fanatrehana tsy tapaka izany.
7 Ampaherezina hanatrika fivoriana tsy tapaka koa izao ireo mpitory tapatapaka, na ireo tsy nitory intsony. Aoka ianao ho vonona hiara-miasa amin’ny anti-panahy, raha angatahina hanampy olona tsy mitory intsony mba handray anjara indray amin’ny fanompoana. Manaraka an’ity fampirisihan’ny apostoly Paoly ity isika, raha miahy ny rahalahintsika toy izany: “Araka ny ananantsika andro hanaovana, dia aoka isika hanao soa amin’ny olona rehetra, indrindra fa amin’ny mpianakavin’ny finoana.”—Gal. 6:10.
8 Enga anie isika rehetra samy hanao ezaka manokana mba hanatrika ny Fahatsiarovana ny 16 Aprily. Tsy te ho diso anjara amin’io fotoana faran’izay miavaka hiderana an’i Jehovah io isika. Aoka àry isika hidera azy noho ny asany lehibe, dieny izao ka ho mandrakizay!—Sal. 145:21.