Mahakasika Anao ny Fanafihan’ireo Miaramila An-tsoavaly
1 Toy ny kotroka ny firodorodon’ireo “miaramila an-tsoavaly” niisa “roa alina ampitomboina iray alina”, rehefa “nitsoka ny trompetrany ny anjely fahenina.” Tsy miaramila toy ny fahita andavanandro akory izy ireo. ‘Tahaka ny lohan’ny liona ny lohan’ny soavaly’, ary nisy afo sy setroka ary solifara nivoaka tamin’ny vavany. ‘Toy ny bibilava ny rambon’izy ireo.’ Ravarava avokoa ny toerana rehetra nandalovan’ireo miaramila an-tsoavaly an’ohatra ireo. (Apok. 9:13-19) Fantatrao ve hoe nahoana no mahakasika anao ny fanatanterahana an’io fahitana miavaka io?
2 Miara-miasa amin’ny sisa voahosotra ny ondry hafa namany, rehefa manambara ny didim-pitsaran’Andriamanitra. Vokatr’izany dia nanjary niharihary tanteraka fa maty ireo Kristianina anarana raha eo amin’ny lafiny ara-panahy. Andeha isika hijery lafin-javatra roa momba io fahitana io, anasongadinana hoe inona no manampy ny mpanompon’Andriamanitra mba hahomby eo amin’ny fanompoany.
3 Nampiofanina sy ampy fitaovana mba hitondra ny hafatr’Andriamanitra: Nampiofanina hilaza tsy amin-tahotra ny hafatr’Andriamanitra ny mpanompony, amin’ny alalan’ny Sekolin’ny Fanompoana sy ny fivoriana hafa alamin’ny fiangonana. Manahaka an’i Jesosy sy ny mpianany izy ireo ka mitory amin’ny toerana rehetra mety hahitany olona, mba hitady izay mendrika. (Matio 10:11; Marka 1:16; Lioka 4:15; Asa. 20:18-20) Hita fa tena mahomby tokoa io fomba fitory atoron’ny Baiboly io.
4 Baiboly, boky, bokikely, ary gazety an’arivo tapitrisa no efa nozarain’ireo mpitory, rehefa nanatanteraka ny asa nanirahan’Andriamanitra azy izy ireo. Misy amin’ny fiteny latsaka kelin’ny 400 ireo boky sy gazety ireo. Miresaka foto-kevitra maro samihafa izy ireo, ary mampiasa fomba isan-karazany mba hanintonana ny karazan’olona rehetra. Hainao ve ny mampiasa tsara ireo fitaovana ireo?
5 Fitarihana sy fanampiana avy amin’Andriamanitra: Miharihary avy amin’io fahitana io koa fa manohana ny asa ataon’ireo miaramila an-tsoavaly an’ohatra Andriamanitra. (Apok. 9:13-15) Tsy noho ny fahendren’olombelona na ny heriny mantsy no nahavitana ny fitoriana eran-tany, fa noho ny fanahin’Andriamanitra. (Zak. 4:6) Anjely no ampiasain’i Jehovah hitarika an’io asa io. (Apok. 14:6) Eo koa ny ezaka ataon’ireo Vavolombelony olombelona, izay ampiany mba hitarika ny mpandefitra hanatona azy.—Jaona 6:45, 65.
6 Tsy voasakana ny vahoakan’i Jehovah, satria efa voaofana sy tsara fitaovana mba hitondra ny hafatr’Andriamanitra, ary miasa eo ambany fitarihan’ny anjely. Koa aoka àry isika handray anjara hatrany amin’ny fanatanterahana an’io fahitana mampientam-po io.
[Fanontaniana]
1, 2. Nahoana no mahakasika ny mpanompon’Andriamanitra ny fanatanterahana an’ilay fahitana ao amin’ny Apokalypsy 9:13-19?
3. Inona no fampiofanana nomena anao, mba hahombiazanao rehefa mitory ny hafatr’Andriamanitra?
4. Inona avy no fitaovana azon’ny mpitory ampiasaina mba hanatontosana ny asany?
5, 6. Inona no mampiseho fa manohana ny vahoakany i Jehovah?