Tahafo ny Toe-tsain’i Jesosy

¹ Efa tena tia ny Zanak’Andriamanitra isika, na dia mbola tsy nahita azy mihitsy aza, noho ireo fitantarana an-tsoratra momba ny fiainany sy ny fanompoany. (1 Pet. 1:8) Nankatò ny Rainy izy, ka nandao ny toerana be voninahitra notanany tany an-danitra ary tonga tetỳ an-tany. Nanompo ny hafa izy rehefa lasa olombelona, ary tsy nitady tombony tamin’izany. Nanome ny ainy ho an’ny olombelona koa izy. (Matio 20:28) Mampirisika antsika toy izao ny Tenin’Andriamanitra: ‘Aoka ho ao aminareo foana izany toe-tsaina izany, izay tao amin’i Kristy Jesosy koa.’ Ahoana no hanahafantsika ny toe-tsainy feno fahafoizan-tena?​—Fil. 2:5-8.

² Rehefa mahatsiaro ho reraka: Nety reraka i Jesosy, na dia olombelona lavorary aza. Nanazava tsara momba ny Fanjakan’Andriamanitra tamin’ny vehivavy samaritanina iray izy, indray mandeha, na dia efa “reraky ny dia” aza. (Jaona 4:6) Miatrika zava-tsarotra mitovy amin’izany ny Kristianina maro amin’izao fotoana izao. Reraky ny asa mandritra ny herinandro isika, ka mety ho zara raha hanana hery handraisana anjara amin’ny asa fitoriana. Hamelombelona antsika anefa ny fanompoana kristianina, raha mandray anjara tsy tapaka amin’izany isika.​—Jaona 4:32-34.

³ Nisy fotoana koa nankanesan’i Jesosy sy ny mpianany tany amin’ny toerana mangina mba hiala sasatra kely. Nisy vahoaka be nahafantatra izany anefa, ka nihazakazaka nankeny aminy. Tsy nahasosotra azy izany fa vao mainka aza “nangoraka azy ireo” izy, ka “nampianatra azy zavatra maro.” (Marka 6:30-34) Tokony hanana toe-tsaina mitovy amin’izany isika rehefa hanomboka sy hitarika fampianarana Baiboly. Mitaky fikirizana sy tena fitiavana ny olona izany. Aza kivy mitady fampianarana Baiboly raha mbola tsy manana ianao izao.

⁴ Ataovy loha laharana ny asa fanompoana: Afaka manampy antsika hifantoka kokoa amin’ny fanompoana, ny fanaovana ny asan’ny mpisava lalana mpanampy. Nanoratra toy izao ny anabavy tanora iray: “Nampirisika anay roa vavy hanao ny asan’ny mpisava lalana mpanampy miaraka aminy mandritra ny iray volana ny renin’ny ankizivavy iray namako. Tena faly aho fa afaka niaraka taminy izahay. Faly aho nahafantatra bebe kokoa ireo anadahy sy rahavavy, ary tsy ela dia toy ny fianakaviako no niheverako azy ireo. Afaka niresaka bebe kokoa momba an’i Jehovah sy nampianatra ny fahamarinana mahatalanjona momba ilay Fanjakana koa aho, ka tena nahafinaritra ahy izany. Lasa nahatsiaro tena ho akaiky kokoa an’i Jehovah sy ny fandaminany aho noho izany rehetra izany.”​—Sal. 34:8.

⁵ Misy ady atrehintsika rehetra eo amin’ny nofontsika tsy lavorary sy ny faniriantsika hampifaly an’i Jehovah. (Rom. 7:21-23) Tsy maintsy manohitra ilay toe-tsaina tsy te hisahirana eo amin’izao tontolo izao isika. (Matio 16:22, 23) Afaka manampy antsika hahomby amin’izany i Jehovah, amin’ny alalan’ny fanahiny masina. (Gal. 5:16, 17) Eo am-piandrasana ny fanafahana antsika ho ao amin’ny tontolo vaovao sy marin’Andriamanitra, dia enga anie isika hanahaka ny toe-tsain’i Jesosy, ka hanao ny asan’ilay Fanjakana ary hanao izay hahasoa ny hafa, alohan’ny an’ny tenantsika.​—Matio 6:33; Rom. 15:1-3.

[Fanontaniana]

1. Inona no toe-tsaina nasehon’i Jesosy?

2. Zava-tsarotra inona no atrehin’ny Kristianina maro, ary inona no hanampy azy ireo handresy izany?

3. Ahoana no hanahafantsika ny fahavononan’i Jesosy hampianatra?

4. Nahoana ny asan’ny mpisava lalana mpanampy no afaka manampy antsika hanahaka ny toe-tsain’i Kristy?

5. Nahoana isika no tsy maintsy miezaka hanahaka foana ny toe-tsain’i Jesosy?