Manampy Ireo Matoky Azy i Jehovah
1 Maro no mihevitra fa ny vola sy ny fahefana ary ny fahaizana no antoky ny fahombiazana. (Sal. 12:4; 33:16, 17; 49:6) Manome toky kosa anefa ny Baiboly, fa ‘hery sy ampingan’ireo’ matahotra sy matoky azy i Jehovah. (Sal. 115:11) Ireto misy lafin-javatra roa tokony hanehoantsika fatokisana azy.
2 Eo amin’ny fanompoana: Tsy maintsy miantehitra amin’Andriamanitra isika, isaky ny mampianatra eo anivon’ny fiangonana na eny amin’ny fanompoana. Diniho ny amin’i Jesosy. Zanak’Andriamanitra izy, nefa niantehitra tanteraka tamin’ny Rainy tany an-danitra, fa tsy tamin’ny fahendreny na ny fahaizany. (Jaona 12:49; 14:10) Raha i Jesosy aza nanao toy izany, mainka fa isika! (Ohab. 3:5-7) Raha tsy noho ny fanampian’i Jehovah dia tsy hanome voninahitra azy sy hahasoa ny hafa mihitsy ny ezaka kely ataontsika.—Sal. 127:1, 2.
3 Asehontsika fa miantehitra amin’i Jehovah isika, rehefa mivavaka mba hahazo ny tari-dalany sy ny fanampian’ny fanahiny masina. (Sal. 105:4; Lioka 11:13) Asehontsika koa fa matoky an’Andriamanitra isika, rehefa miorina amin’ny Teniny ny fampianarantsika. Manan-kery hanohina ny fo sy hanova ny fiainana mantsy ny hafatra raketin’izy io. (Heb. 4:12) Omem-boninahitra i Jehovah, rehefa ‘manompo sady miantehitra amin’ny hery omeny’ isika.—1 Pet. 4:11.
4 Rehefa miatrika zava-manahirana: Mila mangataka ny fanampian’i Jehovah koa isika, rehefa miatrika zava-manahirana sy teren’ny toe-javatra. (Sal. 46:1) Ohatra: Rehefa tsy te hanome antsika andro tsy hiasana mba hanatrehana fivoriambe ny mpampiasa, na miatrika zava-tsarotra ny fianakaviantsika. Asehontsika fa matoky an’i Jehovah isika, rehefa mivavaka mafy sy manaraka tsara ny tari-dalana omeny amin’ny alalan’ny Teniny sy ny fandaminany. (Sal. 62:8; 119:143, 173) Rehefa manao izany ny mpanompon’i Jehovah, dia mahatsapa fa manampy azy ireo izy.—Sal. 37:5; 118:13, 16.
5 I Jehovah mihitsy no manome toky antsika toy izao: “Hotahina izay olona matoky an’i Jehovah, dia izay manana an’i Jehovah ho tokiny.” (Jer. 17:7) Enga anie hasehontsika eo amin’izay rehetra ataontsika fa matoky azy isika!—Sal. 146:5.