Ahazoana Valisoa ny Fiaretana
1 “Raha miaritra ianareo dia ho voavonjinareo ny ainareo.” (Lioka 21:19) Anisan’ny faminanian’i Jesosy momba ny “fifaranan’ny rafitr’ity tontolo ity” ireo teny ireo. Ahariharin’izy ireo fa tsy maintsy vonona hiatrika fitsapana maro isika, raha te hanaporofo fa tsy mivadika. Noho ny herin’i Jehovah anefa, dia afaka “miaritra hatramin’ny farany” isika tsirairay, ka “hovonjena.”—Matio 24:3, 13; Fil. 4:13.
2 Mety ho tena mafy ny andro tsirairay noho ny fanenjehana, aretina, olana ara-bola, ary fahoriam-po. Tsy tokony hohadinointsika mihitsy anefa, fa miezaka mitarika antsika hivadika amin’i Jehovah i Satana, ilay Mpiteny Ratsy azy. Efa anisan’ny mamaly ny fiampangany isika, raha tsy mivadika amin’ilay Raintsika mandritra ny iray andro monja. Tena mahafaly ny mahafantatra, fa tsy hadinon’i Jehovah ny ‘ranomasontsika’ eo am-piatrehana fitsapana! Sarobidy aminy izany, ary faly ny fony rehefa tsy mivadika isika!—Sal. 56:8; Ohab. 27:11.
3 Manatsara toetra ny fitsapana: Ao anatin’ny fahoriana no mety hiharihary fa tsy ampy finoana ny olona iray, na manana toetra ratsy toy ny avonavona na ny tsy fananana faharetana. Tsy hitady fomba tsy araka ny Soratra Masina isika, mba hialana amin’ny fitsapana na hampitsaharana azy io. Tokony harahintsika kosa ilay torohevitry ny Tenin’Andriamanitra hoe: ‘Avelao hamita ny asany ny fiaretana.’ Nahoana? Satria hanampy antsika ho “lavorary sy tsy hisy tsiny amin’ny lafiny rehetra” ny fiaretana fitsapana sy ny tsy fivadihana. (Jak. 1:2-4) Ny fiaretana dia manampy antsika hanana toetra tena tsara, toy ny fahaizana mandanjalanja sy fiaraha-miory ary famindram-po.—Rom. 12:15.
4 Vita sedra ny finoana: Vita sedra ny finoantsika rehefa miaritra fitsapana isika. Tena sarobidy eo imason’Andriamanitra ny finoana toy izany. (1 Pet. 1:6, 7) Manampy antsika tsy hivadika mihitsy mandritra ny fitsapana hafa izy io. Ho tsapantsika koa fa ankasitrahan’Andriamanitra isika, ka ho mafy orina sy ho azo antoka kokoa ny fanantenantsika.—Rom. 5:3-5.
5 Asongadin’ny Jakoba 1:12 ny valisoa lehibe indrindra azo rehefa miaritra. Izao no voalaza ao: “Sambatra izay olona miaritra hatrany rehefa iharam-pitsapana, satria rehefa ankasitrahana izy, dia hahazo ny satroboninahitry ny fiainana.” Aoka àry isika tsy hivadika mihitsy amin’i Jehovah, ka hatoky fa hanome valisoa be dia be ho “an’ireo tia azy mandrakariva” izy.