Fizarana 2—Fitarihana Fampianarana Baiboly Mandroso
Fanomanana ny Fampianarana
1 Tsy ampy fotsiny ny midinika ilay toko ianarana sy mijery ireo andinin-teny voatonona, raha tiana handaitra ny fampianarana Baiboly. Ilaina ny manohina ny fon’ilay mpianatra, amin’ny alalan’ny fanazavana hita ao. Noho izany, dia mila miomana tsara isika sady mieritreritra ilay mpianatra.—Ohab. 15:28.
2 Fomba fanomanana: Mivavaha aloha amin’i Jehovah, momba ilay mpianatra sy izay ilainy. Angataho izy mba hanampy anao hanohina ny fon’ilay olona. (Kol. 1:9, 10) Jereo ny lohatenin’ilay toko na lesona, ireo lohatenikely, ary ireo sary, mba hahazoanao tsara ny loha hevitra. Manontania tena hoe: ‘Inona no tena kendren’ity toko ity?’ Afaka hanasongadina ireo hevi-dehibe ianao amin’izay, rehefa mampianatra.
3 Diniho amin’izay ny fehintsoratra tsirairay. Tadiavo ny valin’ny fanontaniana, ka ny teny milaza ny hevi-dehibe ihany tsipihina. Fakafakao ny ifandraisan’ireo andinin-teny voatonona sy ny hevi-dehibe eo amin’ilay fehintsoratra, ka fidio izay andinin-teny hovakina mandritra ny fianarana. Azonao soratana kely eo amin’ny sisin’ny boky ny hevitra ao amin’ilay andininy. Tokony ho azon’ilay mpianatra tsara, fa avy amin’ny Tenin’Andriamanitra ny zavatra ianarany.—1 Tes. 2:13.
4 Ampifanaraho amin’izay ilain’ilay mpianatra ilay lesona: Eritrereto mialoha ny fanontaniany sy ny zavatra izay mety tsy ho azony na tsy hekeny. Manontania tena hoe: ‘Inona no mbola tsy azony na mila iezahany mba hahafahany handroso? Ahoana no ahafahako manohina ny fony?’ Ataovy mifanaraka amin’izany ny fampianaranao. Mety hilainao koa ny hanomana fanoharana, na fanazavana, na fanontaniana mifampitohy, mba hanampiana ilay mpianatra hahazo hevitra na andininy sasany. (Neh. 8:8) Aza mampiditra fanazavana tsy mifandray firy amin’ilay loha hevitra anefa. Hanampy ilay mpianatra hitadidy ny hevi-dehibe ny famerenana fohy, rehefa vita ilay fianarana.
5 Faly tokoa isika rehefa misy olona vaovao mamoa vokatry ny fahamarinana ho fiderana an’i Jehovah! (Fil. 1:11) Manomàna tsara àry isaky ny hampianatra Baiboly, mba hahatratrarana izany tanjona izany.