Fandaharam-potoanan’ny Fianakaviana—Fivorian’ny Fiangonana
1 Raha ray na reny kristianina ianao, dia irinao ho tia an’i Jehovah sy hanompo azy ny zanakao, ary hahazo ny fiainana mandrakizay ao amin’ny tontolo vaovao nampanantenain’Andriamanitra. Ahoana no azonao anampiana azy mba hanao ny fanompoana an’i Jehovah ho loha laharana eo amin’ny fiainany? Zava-dehibe ny ohatra omenao. (Ohab. 20:7) Nahatadidy ny ohatry ny reniny kristianina ny anabavy iray, ka nilaza hoe: “Tsy nisalasala mihitsy izahay hoe handeha hivory sa tsia.” Tena nisy vokany teo amin’ny fiainany izany.
2 Fantatry ny fianakavianao ve ny anton’ny fivorian’ny fiangonana? Mandrisika antsika hanao ny sitrapon’Andriamanitra hatrany ny fampianarana raisintsika any, ary tena mampahery antsika ny fiarahana amin’ireo rahalahy. (Isaia 54:13; Rom. 1:11, 12) Ny hanandratra fiderana ho an’i Jehovah eo anivon’ny fiangonana anefa no tena anton’ireny fivoriana ireny. (Sal. 26:12) Ahafahantsika maneho ny fitiavantsika an’i Jehovah sy manompo azy ny fivoriana kristianina.
3 “Mitandrema tsara hatrany”: Raha azontsika fa fanompoana masina no atao any am-pivoriana, dia ‘hitandrina tsara hatrany’ isika mba tsy ho lasa zatra tsy mivory noho ny antony tsy dia manao ahoana. (Efes. 5:15, 16; Heb. 10:24, 25) Ireo fivorian’ny fiangonana angamba no hosoratanao voalohany, rehefa manao ny fandaharam-potoanan’ny fianakavianao ianao. Tandremo sao misy zavatra hafa maka ny toerany. Ataovy loha laharana foana ny fanatrehan’ny fianakavianao ireo fivoriana.
4 Tsy manohina ny fontsika ve ny mahafantatra fa misy rahalahintsika, mandresy vato misakana lehibe mba hanatrehana fivoriana sy fivoriambe? Marina fa mety tsy ho sarotra toy ny azy ireny ny toe-javatra misy anao, nefa miatrika fitsapana koa ianao. Miezaka foana i Satana mba hahatonga ny fanompoana an’i Jehovah ho sarotra kokoa amin’ny vahoakan’Andriamanitra. Matokia anefa fa tsy maintsy ho voamariky ny zanakao, ny ezaka mafy ataonareo mianakavy mba hanatrehana ny fivorian’ny fiangonana. Manolotra fanomezana ara-panahy tsy hay hadinoina ho azy ireo tokoa ianao, raha manao izany ezaka izany.