Fandaharana Vaovaon’ny Fivoriambe Manokana Iray Andro
Mahatalanjona ny fomba nanamboarana ny maso. (Sal. 139:14) Zavatra iray ihany anefa no azon’izy io ifantohana. Marina izany na ara-bakiteny na an’ohatra. Tsy maintsy mifantoka amin’ny fanaovana ny sitrapon’Andriamanitra isika, raha tiantsika hahita tsara ny masontsika an’ohatra. Mihamaro ny zavatra mety hanelingelina eto amin’ity tontolon’i Satana ity. Mety tsara àry ny fandaharan’ny fivoriambe manokana iray andro amin’ny taom-panompoana 2006, izay hamelabelatra ny foto-kevitra hoe “Aoka ho Tsotra Foana ny Masonao”!—Matio 6:22.
Ahoana no hahazoantsika ny fitahian’i Jehovah? (Ohab. 10:22) Hamaly izany ilay anjara hoe “Mahazo Fitahiana Ireo Manana Maso Tsotra.” Hasongadina amin’ireo fanadinadinana ny soa mety ho azo, rehefa mampihatra ny toro lalan’ny Soratra Masina isika. Izao no lahateny voalohany hataon’ny mpandahateny mpitsidika: “Manàna Maso Tsotra Foana na dia Ratsy aza ity Tontolo Ity.” Izy io dia hampitandrina antsika amin’ireo zavatra mety hanasarotra ny fiainantsika sy hanakana tsikelikely ny fandrosoantsika. Hianarantsika koa ny dikan’ny hoe mifidy “ny tsara kokoa.”—Lioka 10:42.
Inona no azon’ny ray aman-dreny sy ny olon-kafa atao, mba hampirisihana ny tanora hanatratra tanjona eo amin’ny fanompoana an’i Jehovah? Hisy ray aman-dreny sy tanora hamaly io fanontaniana lehibe io, ao amin’ilay anjara hoe “Ry Ray Aman-dreny, Kendreo Tsara Izay Handefasanareo ny Zana-tsipìkanareo” sy ilay hoe “Tanora Miezaka Hanatratra Tanjona Tsara.” (Sal. 127:4) Hovelabelarin’ny mpandahateny mpitsidika amin’ny lahateny famaranana ny fomba hahafahan’ny isam-batan’olona, fianakaviana, ary ny fiangonana hiara-mandroso amin’ny fandaminan’i Jehovah.
Mila manana ‘maso tsotra foana’ isika, na vao manomboka mianatra ny fahamarinana, na efa nanompo an’i Jehovah am-polony taona. Hanampy antsika hanao izany indrindra ny fandaharana amin’ny fivoriambe manokana iray andro.