Inona no Azontsika Anampiana?
1 “Inona no azonay anampiana?” Matetika no manontany toy izany ny Vavolombelon’i Jehovah, rehefa mandre fa nisy loza nitranga tany amin’ny faritra iray eto an-tany. Hita amin’ny fitantarana ao amin’ny Asan’ny Apostoly 11:27-30, fa nanao fandaharana ireo Kristianina voalohany mba hanampiana an’ireo rahalahy tany Jodia, rehefa nisy mosary tany.
2 Ny sata mifehy ny fikambanantsika, dia mamela antsika hampiasa vola hanaovana asa soa, sy hanampiana ireo tra-boina noho ny hetraketraky ny natiora, na ireo mila vonjy rehefa misy zava-manahirana na voina hafa.
3 Rahalahy maro, ohatra, no nanome vola hanampiana an’ireo tra-boina vokatry ny tsunami (onjan-dranomasina nahatonga safodrano) tany Azia Atsimo, tamin’ny herintaona. Tena nankasitrahana tokoa ireny fanomezana vokatry ny fo ireny, izay narotsaka tao amin’ny tahirim-bola fanampiana an’ireo tra-boina. Rehefa voafaritry ny tompony mialoha anefa ny karazana loza tiany hampiasana ny vola omeny, dia takin’ny lalàna any amin’ny tany sasany ny hampiasana ilay izy araka ny nikasan’ilay tompony azy ihany, ary ao anatin’ny fe-potoana voafetra. Indraindray anefa dia mety ho efa voakarakaran’ny any an-toerana ireo rahalahy mila fanampiana.
4 Tsara àry raha harotsakareo ao amin’ny fanomezana ho an’ny asa maneran-tany, ny vola fanampiana an’ireo tra-boina. Ampiasaina mba hanampiana ireo tra-boina io tahirim-bola io, sady hikarakarana izay ilain’ireo rahalahy eo amin’ny lafiny ara-panahy. Raha misy te hanao fanomezana, ka marihiny hoe ho an’ny tra-boina ilay izy fa tsy ho an’ny asa maneran-tany, dia horaisina an-tanan-droa ihany izany ary hampiasaina any amin’ny toerana ilana azy. Na izany aza anefa, dia ankasitrahana raha toa ka tsy faritana mialoha ny toerana sy ny fomba hampiasana ilay fanomezana.
5 Raha harotsatsika ao amin’ny fanomezana ho an’ny asa maneran-tany ny fanomezana ataontsika, dia ho betsaka kokoa ny vola azo ampiasaina amin’ny asa rehetra mifandray amin’ilay Fanjakana, fa tsy amin’ny fanampiana tra-boina fotsiny. Mifanaraka amin’ny voalazan’ny Efesianina 4:16 izany, satria miara-miasa isika, ary manome izay ilaina mba ‘hampitombo ny vatana [ka] hiorenany ao anatin’ny fitiavana.’