Ampianaro Handeha Amin’ny Lalan’Andriamanitra ny Mpandefitra
1. Inona no tanjontsika rehefa mampianatra?
1 Voalaza fa nanaraka “Ny Lalana”, ny mpianatr’i Kristy tamin’ny taonjato voalohany. (Asa. 9:2) Tokony ho hita taratra eo amin’ny fomba fiainan’ny olona iray koa raha tena Kristianina izy. (Ohab. 3:5, 6) Tsy ny hampita ireo fampianaran’ny Baiboly fotsiny àry no tanjontsika rehefa mampianatra. Tsy maintsy ampiantsika koa ny olona mba handeha amin’ny lalan’i Jehovah.—Sal. 25:8, 9.
2. Inona no hanampy ny mpianatra, ho vonona hitandrina ny didin’Andriamanitra?
2 Fitiavana an’i Jehovah sy Jesosy: Tena sarotra amin’ny olona tsy lavorary ny manova ny fisainany, fihetsiny, fiteniny, ary ny fitondran-tenany, mba hifanaraka amin’ny sitrapon’Andriamanitra! (Rom. 7:21-23; Efes. 4:22-24) Vonona hanao izany anefa ireo mpandefitra, noho ny fitiavany an’Andriamanitra sy ny Zanany. (Jaona 14:15; 1 Jaona 5:3) Ahoana àry no hanampiantsika ny mpianatra Baiboly mba hanana izany fitiavana izany?
3. Ahoana no hanampiantsika ireo mpianatra mba ho tia an’i Jehovah sy Jesosy?
3 Ampio ny mpianatrao hahafantatra tsara ny toetran’i Jehovah. Hoy ny rahalahy iray: “Sarotra ny ho tia olona tsy fantatra. Dieny eo am-boalohany àry, dia asehoko an’ilay mpianatra ny anaran’Andriamanitra ao amin’ny Baiboly, ary miezaka foana aho manasongadina ireo toetran’i Jehovah.” Hahafantatra tsara ny toetran’i Jehovah ireo mpianatra, raha resahintsika aminy ny ohatr’i Jesosy. (Jaona 1:14; 14:9) Ampiasao koa ireo fanontaniana famerenana ao amin’ny boky Ampianarina, mba hanampiana ilay mpianatra hisaintsaina momba ny toetran’Andriamanitra sy ny Zanany.
4. a) Nahoana no sarotra amin’ny mpianatra sasany ny mitory? b) Ahoana no hanampiantsika azy ireo rehefa hanomboka hitory izy?
4 Aoka ianao ho modely: Mpampianatra sy mpitari-dalana isika, ka tokony ho hita amin’ny ataontsika fa mandeha amin’ny lalan’Andriamanitra isika. (1 Kor. 11:1) Mety hatahotra hitory amin’ny olon-tsy fantatra, ohatra, ny mpianatra sasany. Mila faharetana sy fahaizana àry isika hanampiana azy hanana fitiavana sy finoana ary herim-po, mba handraisany anjara amin’ny fitoriana sy fampianarana. (2 Kor. 4:13; 1 Tes. 2:2) Tokony ho vonona hiaraka aminy isika mba hanampy sy hanohana azy, rehefa manomboka mitory izy.
5. Amin’ny lafiny inona avy ianao no tokony ho modely, mba hanampiana ny mpianatra hitandrina ny didin’Andriamanitra?
5 Tokony ho modely ho an’ny mpianatrao koa ianao, amin’ny lafin-javatra hafa. Hianatra haneho fitiavana izy, rehefa mahita anao mitsidika ny marary na miarahaba tsara an’ireo mpiara-mivory. (Jaona 15:12) Hianatra hanompo ny hafa izy, rehefa mahita anao manadio ny Efitrano Fanjakana na manampy ny hafa. (Jaona 13:12-15) Ho fantany koa ny atao hoe ‘mikatsaka ilay fanjakana aloha’, rehefa hitany fa tsotra ny fiainanao.—Matio 6:33.
6. Inona no tsapantsika rehefa manampy olona hanompo an’i Jehovah?
6 Tsy mora tokoa ny mitory ny Tenin’Andriamanitra sy manao mpianatra. Tena faly anefa isika rehefa mahita ny mpandefitra “mandeha hatrany ao amin’ny fahamarinana.”—3 Jaona 4.