Aoka Ianao Hiahy ny Olona ka Jereo Tsara Izy
1 Mijery ny olona eo amin’ny masony isika matetika, alohan’ny hiresahantsika aminy, rehefa mitory isan-trano na eny amin’ny toerana falehan’ny olona. Mety ho hitantsika amin’ny endriny, mandritra izay fotoana fohy izay, na tiany na tsia ny hiresahantsika aminy. Mety ho fantatsika amin’izany mihitsy aza na faly izy na sorena. Mety hahatsikaritra zavatra maro amintsika koa izy. Hoy ny vehivavy notsidihin’ny Vavolombelona iray: ‘Tsaroako fa nitsikitsiky izy, ka hitako fa milamin-tsaina. Nanitikitika ny saiko izany.’ Nanjary nihaino ny vaovao tsara àry ilay vehivavy.
2 Fomba iray mandaitra ahafahantsika manombo-dresaka ny mijery ny olona eo amin’ny masony, rehefa mitory eny an-dalana isika na eny amin’ny toerana falehan’ny olona. Nijery ny olona nifanena taminy, ohatra, ny rahalahy iray. Nitsiky izy rehefa nifanojo ny mason’izy ireo, ary nanolotra gazety avy eo. Afaka nanao resaka mahafinaritra tamin’ny olona maro àry izy, ary nahapetraka gazety betsaka.
3 Fantaro izay tsapan’ny olona: Ho afaka hamantatra izay tsapan’ny olona isika rehefa mijery azy. Matetika, ohatra, no ho hita amin’ny endriny raha tsy azony na tsy ekeny izay lazaintsika, na efa manomboka tsy manam-paharetana izy, na sahirana. Ho azontsika hafohezina na ampifanarahina amin’izany ny resaka ataontsika. Tena miahy ny hafa isika, raha mahay mamantatra izay tsapany!
4 Porofon’ny fahatsorana sy fatokiana: Heverina ho feno fahatsorana ny olona mijery ny hafa eo amin’ny masony, any amin’ny tany maro. Mariho izay nataon’i Jesosy rehefa nanontany azy ny mpianany hoe: “Koa iza àry no ho voavonjy?” Hoy ny Baiboly: “Nibanjina azy ireo i Jesosy sady niteny taminy hoe: ‘Tsy hain’olombelona izany, fa hain’Andriamanitra ny zava-drehetra.’ ” (Matio 19:25, 26) Hita teo amin’ny mason’i Jesosy fa natoky izay nolazainy izy, ka azo antoka fa vao mainka nampanan-kery ny teniny izany. Toy izany koa isika rehefa mitory ny hafatra momba ilay Fanjakana: manampy antsika ho feno fahatsorana sy hatoky ny zavatra lazaintsika ny fijerena ny olona eo amin’ny masony.—2 Kor. 2:17; 1 Tes. 1:5.